YITALOLU 17

1Wo to, felin woorowulo tunnu be meleke woorowulo mennu bulu, wolu to kilin x'é sodun x'a fo ń ɲen xo: «Na, jadomusuba men be siginin xooxojiyolu senbo to, ń si wo la kiito kuwo yita í la. 2Duguxulo mansaxelu nin a xa jadoya ke. Duguxulo xan moxolu nin a xa jadoya ke x'e su a to, a be í xo moxo x'é su dolo la.» 3Melekiyo taxata ń nima ti fuxo do la. Ń xa muso do je non, a be siginin wara jaxu wulemanŋo do xan. Ala toxotiɲatoxolu be safenin wo waro dula bee xan. Kunxulu woorowula anin biɲa tan ne be wo waro ma. 4Faanu wulen daxolenŋolu tunnu be muso ma, anin sanu maɲarolu nin kuru daxolenŋolu anin xononŋolu. Sanufelinŋo do tun b'a bulo to, men be fanin ku haramuninŋolu nin a la jadoya ku noxoninŋolu la. 5Toxo do be safenin a foda la, men mu gullo ti: «Babiloneba, jadolu nin duguxulo ku haramuninŋolu wuluna.» 6Nte xa wo muso suninŋo je moxo senumanŋolu jelo la, anin Isa seedolu jelo la. Nte x'a je tumo men, ń dabaro bee le banta. 7Wo to, melekiyo xo ń ɲen xo: «Mun x'é dabaro ban? Ń si gullo fo í ɲen, muso mu men ti, anin a be wara jaxu kunxulu woorowulatigo nin biɲa tantigo men xan. 8Í xa wara jaxo men je, a tun be je, bari a nte je tugun. A si yele xa bo dinxajironba danjebalo xono, xa taxa halagi. Duguxulo xan moxo mennu toxo man safe nilamaya bukko xono kabirin duniya da tumo, wolu dabaro si ban nin i xa wara in je, bawo a tun be je, a nte je tugun, bari a si na tugun. 9«Lonŋo nin hakilitigiya le be ŋininnin jan. Kunxulu woorowulo mu kuru woorowula lelu ti, muso be siginin mennu xan. Mansaxe woorowula le dulu mu. 10Luulu boyita i to, wooronanŋo be mansaya la saasa, woorowulananŋo man na folo. Nin a nata, a be waxatindin doron ne kela. 11Wara jaxo men tun be je, nin a nte je tugun, wo fan mu mansaxe saginanŋo le ti. Ate mu wo woorowulolu to kilin ne ti, a be taxala halagilo dula. 12«Í xa biɲa tanŋo mennu je, wolu mu mansaxe tan ne ti, mennu man sigi mansaya la folo. Bari i si fango soto i nin waro, xa mansaya ke i ɲoxo fe leere kilin xono. 13Miiriya kilin ne be wo mansaxe tanŋo la, nin wo mu ɲin ti: X'e la sintigiya nin i la fango di waro ma. 14I si Saaxandinŋo kele. Bari Saaxandinŋo le be sinŋo sotola i xan, bawo ate mu marigolu Marigi le ti, anin mansaxelu la Mansaxe. Ate nin a la moxo kilininŋolu nin sugandininŋolu nin a la xantigolu si sinŋo soto i xan.» 15Melekiyo xo ń ɲen tugun xo: «Í xa jiyo mennu je, nin jadomuso be siginin i xan, wolu mu jamanolu nin jamalu nin siyalu anin xanŋolu do lelu ti. 16Í xa biɲa tanŋo mennu je, wolu nin wara jaxo si jadomuso jaxuya. I s'a bulufenŋolu bee muta a la, x'a balamaxulunŋo bula. I si a subo domo x'a to jani ta la. 17Katugala Ala x'a sago kelo dun i jusukunŋo la. I bee si ben a to x'e la mansaya fango bula waro la baaro la, fo Ala la xuma foninŋolu xa dafa. 18«Í xa muso men je, wo mu galluba le ti, men be siginin duguxulo xan mansaxelu kunna.»

will be added

X\