YITALOLU 16

1Wo xo, ń xa xumaxanba do me, men bota Alabatusuba xono. Wo tun b'a fola meleke woorowulo ɲen xo: «Alu taxa Ala la diminŋo felinfa woorowulo bon duguxulo xan!» 2Meleke folo taxata x'a la felinŋo xono fenŋo bon duguxulo xan. Wo to, wara jaxo taagumanseedo tun be moxo wo moxo xan anin men tunnu b'a ɲoxonŋo daraninŋo batula, da jaxolu bota wolu bee ma x'e tooro bete. 3Meleke fulananŋo x'a la felinŋo xono fenŋo bon xooxojiyo to. Xooxojiyo bee keta jelo ti, í xo moxo faxaninŋo jelo. Nilamafenŋo fen wo fen be xooxojiyo to, a bee sata. 4Meleke sabananŋo x'a la felinŋo xono fenŋo bon bajiyolu nin jibodulalu xan, wolu bee keta jelo ti. 5Melekiyo men be jiyolu kunna, ń xa wo xanme a fola xo: «Í be tilinnin, ite men be je, anin ite men tun be je, ite men mu Senumanŋo ti, katugala í xa í la tilinninɲa yita xa kiito tege ten. 6Moxolu xa í la moxo senumanŋolu nin kilalu jelo bon, saasa í xa jelo di i ma i x'a min. I nin wo le xa xan!» 7Wo xo, ń xa xumaxanŋo do me, xa bo sadaxajanilanŋo dula xo: «Iyo, Marigi Ala, Sinŋobeetigo, í la kiitolu mu tonɲa lelu ti, anin i be tilinnin!» 8Meleke naaninanŋo x'a la felinŋo xono fenŋo bon tilo xan. Fango dita wo ma a xa moxolu jani a la ta la. 9Funtaniba xa moxolu jani. I xa Ala toxo tiɲa, sinŋo be wo men bulu wo toorokuwolu xan. Bari i man nimisi xa Ala bunɲa. 10Meleke luulunanŋo x'a la felinŋo xono fenŋo bon wara jaxo la mansasigilanŋo xan. A la mansaya dula bee bulata dibo to. Diminŋo men tun be moxolu xan, wo x'e bula i nenŋolu kinna. 11I xa sanxulo Ala toxo tiɲa, i la diminŋolu nin i la da jaxolu la kuwo xanma. Bari i man nimisi i la kewalolu la. 12Meleke wooronanŋo x'a la felinŋo xono fenŋo bon bajiba Efarati xan. Wo bajiyo jata, walasa mansaxe mennu be bola koton, silo xa toben wolu ɲen. 13Wo xo, ń xa ni jaxu saba je, mennu be í xo serantotolu, men tunnu be bola samaano nin wara jaxo nin kila fano da xono. 14Wo niyolu mu jinnolu niyo lelu ti. I be kawakuwolu kela anin i be taxala duniya mansaxelu bee bata, walasa x'e kamari kelo xanma, men be nala kela Sinŋobeetigi Ala la lunba lunŋo. 15Marigi xo: «A fele, ń be nala í xo sunŋo! Moxo men je tu í ɲala, x'a la faanolu mara, walasa a balamaxulunŋo xana í taxama, x'a maluya yita, heero be wo tigo ɲen.» 16Jinnolu xa mansaxelu kamari dula do, men be kilila heburuxanŋo to xo «Haramagedon.» 17Meleke woorowulananŋo x'a la felinŋo xono fenŋo bon foɲo fe. Xumaxanba do meta Alabatusuba xono, wo bota mansasigilanŋo xan x'a fo xo: «A keta xa ban.» 18Wo to, sanjimeɲenxolu nin xumaxanŋolu nin sanjifetenŋolu keta, anin duguxulu jarajaraba, men ɲoxon bada man ke kabirin hadamadinŋo sigita duguxulo xan. 19Galluba teta xa tala saba ti. Siyalu bee la gallubalu boyita. Ala man ŋina galluba Babilone kun. A x'a lamin a la felinŋo xono dolo la, nin wo mu a la diminba ti. 20Jisuttolu bee sankota, kurolu man je tugun. 21Maramallekese xulinbalu, mennu kilin wo kilin si kilo tan naani ɲoxon bo, wolu jigita moxolu xan xa bo sanŋo to. Moxolu xa Ala toxo tiɲa maramallo toorokuwo bulu, bawo wo toorokuwo tun xa jaxu fo xa danmatanbi.

will be added

X\