1 Wo xo, nte xa felelo ke: Ń xa Saaxandinŋo loninŋo je Siyon kuro xan, a nin wulu keme nin tan naani wulu nin wulu naani moxo. Ate toxo nin a Fa toxo tun be safenin wo moxolu bee foda la. 2 Ń xa xumaxanŋo do me bola sanŋo to. A be í xo jiba sonxoxanŋo, a be í xo sanjifetenxanba. Ń tun xa xumaxanŋo men me, wo be le í xo kontinfolalu la kontinfoxanŋo. 3 Wo moxolu be donkili kuto do ma x'a la mansasigilanŋo ɲafe, anin fen nilama naano nin moxobalu ɲafe. Moxo si xote tun me wo donkilo digi no, nin wo wulu keme nin tan naani wulo nin wulu naano moxolu doronnu nte, mennu kunbota duguxulo xan. 4 Wolu man i fannu noxo musulu fe, bawo musulonbalo lelu mu. Saaxandinŋo je taxa dula wo dula, i si a lo a nofe. I kunbota moxolu to. I mu Ala nin Saaxandinŋo la fensotota folo lelu ti. 5 Faniya man soto i da. Jalagibalo lelu mu. 6 Wo xo, ń xa meleke xote je men tun be í baxan fo sanjanba to. Badabanŋo xibaru Dimanŋo tun b'a bulu x'a fo duguxulo xan moxolu ɲen, siyalu nin xabiilolu nin xanŋolu, anin jamanolu bee ɲen. 7 A tun b'a fola xanba to xo: «Alu sila Ala ɲa, x'a bunɲa, bawo a la kiito tege waxato sita moxolu xan. Alu sanxulo nin duguxulo nin xooxojiyo nin jibodulalu dabaxo batu.» 8 Meleke fulananŋo do x'a lo folo nofe, x'a fo xo: «Galluba Babilone boyita, a boyita! A xa siyalu bee lamin a la jadoya jaxo dolo la.» 9 Meleke sabananŋo x'a lo fula folo nofe, x'a fo xanba to xo: «Moxo wo moxo be wara jaxo nin a ɲoxonŋo daraninŋo batula, anin x'a taagumanseedo soto í foda la, walla í bulo to, 10 wo tigo du si Ala la diminba doloma min, men ɲaxamibalo yelemata a la diminŋo felinŋo xono. A si ɲaaga ta anin tinbiritiyo to, meleke senumanŋolu nin Saaxandinŋo ɲa xoto. 11 I la ɲaaga siisiyo si wuli fo abada. Mennu be wara jaxu in nin a ɲoxonŋo daraninŋo batula, anin a toxo taagumanseedo be moxo mennu xan, wolu me lafiya soto su fara tili xan.» 12 Wo le x'a tu, moxo senumanŋolu xa xan x'e timinadiya, mennu be Ala la sariyalu labatula anin mennu be lannaya marala Isa la. 13 Wo xo, ń xa xumaxanŋo do me xa bo sanŋo to xo: «Ɲin safe: “Moxo mennu be sala x'e tu Marigi la kafuɲoxoya xono kabirin saasa, heero be wolu ɲen!” Ni Senunŋo xo: “Iyo, tonɲa le mu, i s'i tofoɲo i la baarolu la bawo i la kuɲumalu be i nofe!” » 14 Ń xa felelo ke tugun, ń xa xaba xoyimanŋo do je, do be siginin wo xabo xan a be í xo hadamadinŋo. Mansakufune sanuma b'a kunna, woroto da dimanŋo b'a bulu. 15 Wo xo, meleke xote bota Alabatusuba xono, xa feten barako to xabo xan sigibaxo la xo: «Í la woroto lajigi xa tegelo ke. Senefennadara waxato sita, bawo duguxulo senefenŋolu mota!» 16 Wo to, men tun be siginin xabo xan, wo x'a la woroto lataxa duguxulo xan, duguxulo senefenŋolu ladarata. 17 Meleke xote bota sanxulo Alabatusuba xono, woroto da dimanŋo be a du bulu. 18 Wo xo, melekiyo do xote bota sadaxajanilanŋo dula. Fango tun be wo bulu ta xan. A fetenta barako to fan dadimantigo la xo: «Í la woroto da dimanŋo lajigi xa duguxulo resenjuwo sunjiyolu tege, bawo a resendinŋolu mota.» 19 Melekiyo x'a la woroto lataxa duguxulo xan, a xa duguxulo resenjuwo sunjiyolu tege, x'e fili Ala la diminŋo dinxaba xono, men be í xo resenjibodinxaba. 20 I xa resendinŋolu toɲonxo resenjibodinxo xono, gallo xofe. Jelo bota resenjibodinxo xono xa yele fo xa si suwolu xarabe haxxo ma, xa woyo kilometere keme saba ɲoxon xan.
