YITALOLU 13

1Wo xo, ń xa wara jaxo do je bola xooxojiyo to. Biɲa tan tun b'a ma, anin kunxulu woorowula. Mansakufuno tun be wo biɲolu do wo do la, Ala toxotiɲatoxolu be safenin wo kunxulolu bee xan. 2Nte xa waro men je, wo be le í xo maanoxo, a sinŋolu be í xo urusi waro sinŋolu, a da be í xo waraba da. Samaano x'a la sintigiya nin a la mansasigilanŋo nin fangaba di a ma. 3Wara jaxu in kunxulu kilin tun be jooginin x'a ke í xo a je sa le. Bari wo joogida men tun be a faxala, wo kendeyata. Duguxulo moxolu bee kawakuyata x'a lo wo waro nofe. 4Moxolu bee keta a ma xa samaano batu, bawo a tun xa fango di wara jaxu in ma. Bee xa wara jaxu in du batu x'a fo xo: «Waro ɲoxon be min? Jon s'a kele no?» 5Da dita wara jaxo ma a xa wasubaxanteya xumolu nin toxotiɲaxumolu fo Ala ma. Fango dita a ma xa kuwolu ke tan naani xaru anin xaru fula xono. 6A keta a ma xa xuma jaxo fo Ala ma, x'a toxo tiɲa, x'a la bun senumanŋo toxo tiɲa, anin mennu be siginin sanxulo to. 7Yanmaruya dita a ma a xa moxo senumanŋolu kele, x'e no. Fango dita a ma xabiilolu nin jamanolu nin xanŋolu nin siyalu bee xan. 8Duguxulo xan moxolu bee si a batu. Fen wo fen toxo man safe kabirin duniya da tumo, Saaxandinŋo men faxata wo la nilamaya bukko xono, wo lelu bee be wara jaxu in batula. 9«Tulu be men ma, wo xa lamelo ke! 10Nin do xa xan xa bula kaso la, wo tigo si taxa kaso la, nin do xa xan xa faxa fanŋo la, wo tigo si faxa fanŋo la. Wo le x'a tu, moxo senumanŋolu xa xan x'e timinadiya xa tu lannaya to.» 11Wo xo, ń xa wara jaxu xote je, men tun be bola duguxulo xoto. Biɲa fula tun b'a ma, mennu be í xo saaxandinŋo do biɲolu. A tun be xumala í xo samaano. 12A tun be wara folo la fango bee labaaraxan a ɲa xoto. A xa duguxulo nin a moxolu diyakuwa i xa wara folo batu, wo men na joogilida tun b'a faxala, bari a kendeyata. 13Ɲin wara fulanan in tun be kawakubalu kela, fo a tun be ta lajigixan duguxulo xan xa bo sanŋo to moxo bee ɲala. 14A xa duguxulo xan moxolu lafili kawakuwolu la, fango dita a ma xa mennu ke wara in ɲa xoto. Waro men tun joogita fanŋo la, nin a kendeyata, wara fulananŋo tun be i bulala wo waro ɲoxonŋo darala. 15Wara fulanan in xa fango soto xa niyo ke wara folo ɲoxonŋo daraninŋo to, walasa a xa sin xa xuma, anin xa moxo bee bula faxala, moxo fen wo fen je í ban x'a batu. 16Wara fulanan in tun be hadamadinŋolu bee diyakuwala, moxondin nin moxoba, fentigi nin segebaxantun, jon nin hooro, taagumanseedo do xa ke i kininbulo to, walla i foda la. 17Moxo si me sanni ke no, walla fiiri ke no nin wo taagumanseedo nte a la, nin wo mu waro toxo ti, walla a toxo jaate la. 18Hakilitigiya be ŋininna jan. Moxo men mu hakilitigo ti, wo tigo xa waro toxo xoto fo jaate la, bawo wo jaate be bennin moxo jaate do le ma. Wo jaate mu keme wooro nin tan wooro nin wooro le ti.

will be added

X\