YITALOLU 12

1Wo xo, taagumanseedeba do bota sanŋo to: Muso do fele tilo be buurinin a ma, xaro be a sinŋolu xoto, loolo tan nin fula mansakufunema b'a kunna. 2A xonoma le tun mu, tinŋo diminŋo tun b'a bulaxan kulela. 3Wo xo, taagumanseede xote bota sanŋo to: Samaane wulenŋo do fele, kunxulu woorowula b'a ma anin biɲa tan. Mansakufuno tun be wo kunŋolu kilin wo kilin na. 4Sanxulo loololu talaninŋo saba ti, a xuwo tun be i tala kilinŋo fitaxan x'e labutun duguxulo xan. Samaano x'é lo muso ɲa xoto, men tun je na wulu, walasa x'a dinŋo domo a wuluwo xo. 5A xa dinxe wulu, men si siyalu bee mara negeguma la. A dinŋo tata xa taxa a ti Ala nin a la mansasigilanŋo senbo to. 6Wo to, muso x'é bori xa taxa wulafuxo xono, Ala tun xa dula do toben a ɲen jan men, walasa a xa labalu je tili wulu nin keme fula nin tan wooro xono. 7Wo to, kelo keta sanŋo to. Minkayilo nin a la melekiyolu xa samaano kele. Samaano du nin a la melekiyolu xa kelo ke. 8Bari samaano manota, i man dula soto sanŋo to tugun. 9Samaano filita keno ma. Ate le mu sa xoto ti, men be kilila xo jinnolu la kuntigo nin Sentane anin duniya bee lafilibaxo. A filita duguxulo xan, a nin a la melekiyolu. 10Wo xo, ń xa xumaxanba do me xa bo sanŋo to, men tun b'a fola xo: «Kisilo waxato fele! N na Ala la sintigiya nin a la Mansaya sita saasa, anin a la Kirisita la fangatigiya. Bawo n badinŋolu jalagibaxo filita keno ma, ate men tun be i jalagila n na Ala ɲen suwo nin tilo. 11N badinŋolu x'a mano Saaxandinŋo jelo barako to, anin i xa xumo men seedeya wo barako to. I bota i niyo la fo i tunnu nte silala saya ɲa. 12Wo le x'a tu, sanxulo nin a xono sigibaxolu, alu ɲaxali! Bari duguxulo nin xooxojiyo, bone be alu ɲen, bawo Sentane jigita taxanin alu ma, a diminninba, bawo a x'a lon xo waxatindin ne tuta a ɲen xo.» 13Samaano x'a je tumo men xo a filita duguxulo xan, a x'a lo muso nofe, men tun xa dinxe wulu. 14Bari bonba danfatan fula dita muso ma, walasa a x'é ba fo wula fuxo xono, a la dula, dula men bulaninŋo be a labalulo xanma, x'a tu tejanɲanin sa la, sanji saba nin tala xono. 15Wo to, sa xa jiba sari xa bo a da xono, men be í xo bajiyo, taxanin muso ma, walasa a xa taxa jiwoyo fe. 16Bari duguxulo xa muso deema: Duguxulo x'a da yele xa bajiyo min, samaano xa men sari xa bo a da xono. 17Xa samaano diminninba tu muso xanma, a taxata wo bonsonŋo to kele, mennu be Ala la sariyalu labatula, anin mennu be Isa la seedeya marala. 18Wo xo, a x'é lo xooxojida la keɲo xan.

will be added

X\