YITALOLU 11

1Boguma dita nte ma a be í xo sumannikeguma. A fota ń ɲen xo: «Taxa Alabatusuba nin sadaxajanilanŋo suman anin mennu be batulo kela je. 2Bari í xa Alabatusuba lukeno tu je, í xana wo suman, bawo wo dita siya tolu ma, mennu si gallu senumanŋo toɲonxo, tan naani xaru anin xaru fula xono. 3Ń si sinŋo di ń na seede fulo ma, i xa kilaya ke wulu nin keme fula nin tan wooro tili xono, xa caake faano tu i xanna.» 4Seede fulo mu oliweju fulo nin lanpa fulo lelu ti, mennu be lonin duguxulotigi Marigi ɲafe. 5Nin moxo do b'a fe xa ku jaxo ke i la, ta si bo i da xono x'e jaxolu jani. Nin moxo wo moxo b'a fe xa ku jaxo ke i la, waajibo le mu wo tigo xa sa ten. 6Sinŋo be i ɲen xa sanxulo dataxun walasa sanji xana na i la kilaya lunŋolu. Sinŋo be i ɲen xa jiyolu yelema jelo ti, anin xa kasaaro kiika laboyi duguxulo xan, sinɲa jaate men je diya i ɲen. 7Nin i la seedeyalo banta tumo men, wara jaxo men be yelela xa bo dinxajironba danjebalo xono, wo si i kele, x'e no, anin x'e faxa. 8I furelu si tu wo galluba dakeno la. Xumaxotoma la, wo gallo si kili xo Sodome nin Misira, i Marigi gengenta yiro ma dula men. 9Jamanolu nin xabiilolu nin xanŋolu nin siyalu bee moxo si na i furelu mafele tili saba nin tala xono. I me son moxolu x'e lasi. 10Duguxulo xan moxolu si ɲaɲa i la kuwo la, x'e tulun, xa nilifenŋolu ki i ɲoxo ma, bawo wo kila fulo tunnu xa tooro kiika lasi hadamadinŋolu ma. 11Bari wo tili saba nin tala tanbo xo, nilamaya foɲo do bota Ala la, xa dun i to. I wulita x'e lo. Wo to, silanɲaba xa i mafelebaxolu muta. 12Kila fulo xa xumaxanba do me xa bo sanŋo to, wo x'a fo i ɲen xo: «Alu yele jan.» I yeleta sanŋo to, xabo to, x'e jaxolu ɲalu loninŋo tu i to. 13Wo waxato fan, duguxulu jarajaraba keta, gallo talaninŋo tan ti, tala kilinŋo boyita, wulu woorowula moxo tuta wo kasaaro to. Moxo mennu kisita, silanɲaba xa wolu muta, i xa sanxulotigi Ala bunɲa. 14Bone fulananŋo tanbita. Bone sabananŋo nato fele dondin. 15Meleke woorowulananŋo x'a la buutuwo fo. Xumaxanbalu bota sanŋo to x'a fo xo: «Kabirin saasa, duniya mansaya mu n Marigi nin a la Kirisita ta le ti, a si tu mansaya la fo abada!» 16Moxoba muxan nin naano mennu be siginin i la mansasigilanŋolu xan Ala ɲa xoto, wolu x'e boyi i ɲadalu xan dugo ma, xa Ala batu, 17x'a fo xo: «Marigi Ala, Sinŋobeetigo, n be barako bulala í ɲen, ite men be je, anin ite men tun be je, í x'é la sintigiyaba ke, x'é la mansaya sigi. 18Siyalu tunnu diminta, bari saasa ite la diminŋo nata. Furelu la kiito tege waxato sita. Waxato sita xa í la jonŋolu sara, nin wolu mu kilalu ti, anin i la moxo senumanŋolu nin í ɲasilanɲabaxolu, moxondin nin moxoba. Duguxulo tiɲabaxolu halagi tumo sita.» 19Alabatusuba men be sanŋo to, wo dayeleta, Kafuxanŋo waxande jeta Alabatusuba xono. Sanjimeɲenxolu nin xumaxanŋolu nin sanjifetenŋolu nin duguxulu jarajaro keta. Maramallekese kunba du nata.

will be added

X\