1 Wo xo, ń xa meleke barakema do xote je, men tun be jigixan xa bo sanŋo to. Xabo tun be buurinin a ma, Ala la fanŋo b'a kunŋo la. A ɲada be í xo tilo, a sinŋolu be í xo losin tamalu. 2 Bukke doxomandinŋo do dayeleninŋo tun be a bulu. A x'a kininbulu sinŋo lo xooxojiyo xan, x'a numanbulu sinŋo lo duguxulo xan. 3 A fetenta barako to í xo waraba be guutumela ɲa men. A fetenta tumo men, sanjifeten woorowulo xumaxanŋo meta. 4 Sanjifeten woorowulo xumata tumo men, nte tun b'a fe xa wo safe, bari ń xa xumaxanŋo do me xa bo sanŋo to xo: «Sanjifeten woorowulo xa men fo, wo gullo mara í xono, í xana a safe.» 5 Ń tun xa melekiyo men loninŋo je xooxojiyo nin duguxulo xan, wo x'a kininbulo xotota sanŋo la. 6 Men be í nila fo abada, a x'é xali wo toxo la, ate men xa sanxulo nin duguxulo nin xooxojiyo da, i nin i xan fenŋolu bee. Melekiyo xo: «Laxonoli nte kela bitugun! 7 Bari meleke woorowulananŋo je a la buutuwo fo damuta lunŋo mennu, wo to, Ala la gullo si dafa, í xo a tun x'a fo a la kilalu ɲen ɲa men, nin wolu mu a la jonŋolu ti.» 8 Wo xo, ń tun xa xumaxanŋo men me xa bo sanŋo to, wo xumata ń ɲen tugun ten xo: «Taxa bukke dayeleninŋo muta melekiyo la, men be lonin xooxojiyo nin duguxulo xan.» 9 Ń xa ń sodun melekiyo la x'a ŋinin a fe, xo a xa bukke doxomandinŋo di ń ma. A xo ń ɲen xo: «A muta í x'a domo. A si xuniya í xono, bari a si diya í da í xo liyo.» 10 Ń xa bukke doxomandinŋo muta melekiyo la x'a domo. A diyata ń da í xo liyo; bari ń x'a domo tumo men, a xuniyata ń xono. 11 A fota ń ɲen xo: «Í xa xan xa kilaya ke tugun jamanolu nin siyalu nin xanŋolu nin mansaxe kiika la kuwo to.»
