YITALOLU 1

1Ɲinnu mu Isa Kirisita la ku yitaninŋo lelu ti, Ala xa mennu di a ma, walasa kuwo men be nala kela dondin, a xa wo yita a la jonŋolu la. Kirisita x'a la melekiyo ki a la jonxe Yaya ma, walasa a xa wo kuwo yita a la. 2Wo xa fen wo fen je: Ala la xumo anin Isa Kirisita la seedeya, a xa wo fo. 3Moxo men be ɲin kilaya xuma innu xaranna, moxo mennu b'a lamela anin x'a xono xumolu labatu, heero be wolu ɲen bawo waxato sutiyata. 4Yaya le be ɲin safe in kila Ala la jama woorowulo ma, mennu be Asi maro xono: Neemo nin heero xa ke alu fe xa bo Ala dula, men be je, men tun be je, anin men be nala; anin xa bo Ala Ni woorowulo dula, mennu be a la mansasigilanŋo ɲafe, 5xa bo Isa Kirisita dula, ate men mu seede xantigo ti, ate men mu folo ti xa bo furelu to, anin duguxulo xan mansaxelu la Mansaxe. Kirisita be n xanula, a xa n kunbo n na junubolu ma a jelo bonno fe. 6A xa n ke mansaya nin sadaxalasibaxolu ti a Fa Ala ɲen. Tanto nin sintigiya be a ɲen fo abada! Amiini. 7A fele, a nato be xabolu temo to, moxo bee ɲa si a je, haali mennu x'a soxo. Duguxulo siyalu bee si xasi a la kuwo xanma. Iyo! Amiini! 8«Nte mu Alifa nin Omega le ti», Marigi Ala, Sinŋobeetigo xo ten, men be je, men tun be je, anin men be nala. 9Nte mu Yaya le ti, alu badinxe nin alu kafuɲoxo, tooro nin Mansaya nin timinadiya to, Isa kafuɲoxoya xono. Ń tun be Patimosi xooxoji sutto to, bawo ń xa Ala la xumo fo anin xa Isa seedeya. 10Marigi la lunŋo, Ni Senunŋo jigita nte to. Ń xa xumaxanba do me ń xofe men tun be í xo buutuwo. 11Wo xo: «Í ɲa be men na, wo safe bukko do to, x'a ki Ala la jama woorowulo ma: Efesi, Simirine, Peregame, Tiyatire, Sarade, Filadelifi anin Lawodise.» 12Ń xa ń xofele xo ń be ń xumanɲenbaxo mafelela. Wo to, ń xa sanu lanpa woorowula je. 13Do tun be wo lanpolu temo to, a be í xo hadamadinŋo. Dorokeba do tun b'a xanna, men be jigila fo a sinŋolu ma, sanu tetositilanŋo tun be baratunin a xaro to. 14A kunŋo tun be xoyinin a be í xo saaxati xoyimanŋo walla í xo kotondibuna. A ɲalu tunnu be í xo tamano. 15A sinŋo tunnu be ŋelenxula í xo silo men xolenta takenbuba to, x'a janxo b'a to. A xumaxanŋo be í xo jiba sonxoxanŋo. 16Loolo woorowula tun be a kininbulo to, fan dafula dimanŋo do tun be bola a da xono. A ɲada tun be manala í xo tilo, nin a be kun. 17Ń x'a je tumo men, ń boyita a sinŋolu xoto xa ke í xo fure. A x'a kininbulo la ń xan x'a fo xo: «Í xana sila! Nte mu folo nin labanŋo le ti. 18Nte le mu nilama ti. Ń tun sata, a fele ń be ń nila fo abada. Saya nin lahara xundinŋolu be ń bulu. 19Wo to, i safe, í xa fenŋo mennu je, mennu be je, anin mennu xa xan xa ke wo xo. 20Í ɲa be loolo woorowulo mennu la ń kininbulo to, anin sanu lanpa woorowulo, wolu gullo fele: Loolo woorowulo mu Ala la jama woorowulo la melekiyo lelu ti, lanpa woorowulo mu Ala la jama woorowulo ti.»

will be added

X\