FILEMON 1

1Nte Poli men bulata kaso la Isa Kirisita la baaro nofe, anin n badinxe Timote, nte lelu be ɲin safe in kila n baarakeɲoxo xanuninŋo Filemon ma, 2anin n badinmusu Afiya nin Arasipe men mu n kafuɲoxo ti kelo to, anin Ala la jama ma, men be kamarila í la luwo ma. 3N Fa Ala anin Marigi Isa Kirisita xa neemo nin heero ke alu ɲen. 4Ń be barako bulala ń na Ala ɲen, xa ń hakilo tu í kun tumo bee, ń na Alamataralu xono; 5bawo nte b'a mexan xo xanuya nin lannaya be í la Marigi Isa la anin senumanŋolu bee ɲen. 6Nte be a ŋininna Ala fe xo n nin í mu kilin ti lannaya men to, wo xa baaro ke, walasa nafa mennu bee be n ɲen Kirisita la kafuɲoxoya to, í xa sin xa wolu lon bete. 7Ń badinxe Filemon, í la xanuya xa ɲaxaliba nin juso di nte ma, bawo í xa senumanŋolu jusudun. 8Wo to, haali x'a tara Kirisita la kafuɲoxoya xono, ń be yanmarunin x'é la keta fo í ɲen, 9a xa fisa nte ɲen x'é tara xanuya koso. Nte be ɲa men, nte Poli, xexotoba, nte men be kaso la saasa Isa Kirisita nofe, 10ń b'é tarala Onesime ɲen. A keta nte dinxe ti Isa Kirisita la kafuɲoxoya to, kaso la jan. 11Xotonin a keta í ma nafantanŋo ti, bari saasa, nafa b'a la ite nin nte ɲen. 12Ń b'a lasaagila í ma, ate men be í xo nte fan dula do. 13A tun si diya nte ɲen x'a tu ń senbo to, xa nte tu kaso la xibaru Dimanŋo koso, walasa a xa nte haajolu ke ite no to. 14Bari nte man ke a fe xa fusi ke x'a tara í man son men ma, walasa í xana ku ɲuma ke diyakuwa la, bari í x'a ke ŋanneya ɲuma la. 15A do to, í nin Onesime talata waxati le la, walasa a xa saagi í ma fo badabanŋo. 16A nte jonŋo ti tugun, a xa fisa jonŋo ti bete, badinxe xanuninŋo le mu. A la kuwo xa di nte ɲen haali. A la kuwo xa xan xa diya ite le ɲen xa tanbi nte xan, hadamadinɲa xanma, anin Marigi la kafuɲoxoya koso. 17Wo to, nin í be nte mutanin í badin lannayabaxo ti, a lamuta í xo nin nte le tun fan mu. 18Nin a x'é tooɲo kuwo do to, walla nin í la julo do b'a la, wo jaate nte kun. 19Nte Poli fan bulo le be ɲin xuma innu safela: Nte fan si í sara. Nte nte í hakilo lajigila a la xo ite du la julo do be nte la, wo mu ite fan ne ti. 20Iyo, ń badinxe, ń be í matarala xo í xa wo ku ɲuma ke nte ɲen Marigi xanuya koso: Nte jusudun Kirisita la kafuɲoxoya xanma. 21A be xoyiyanin nte ma, xa nte tu ɲin safe in kela í ɲen xo ń je fenŋo men ŋinin í fe, í si wo ke nte ɲen. Nte x'a lon du xo í be nala men kela, wo si tanbi nte la fota xan. 22Anin du, bunŋo do toben nte ɲen, bawo ń yilo b'a ma xo nte si saagi alu ma, alu la Alamataralu barako to. 23Epafarasi be í xontonna, nte nin wo men be kaso la Isa Kirisita la kuwo to. 24Nte baarakeɲoxolu: Maraka, nin Arisitarake, nin Demasi anin Luka dulu be í xontonna. 25Marigi Isa Kirisita la neemo xa ke alu fe!

will be added

X\