FILIPENGOLU 2

1Awa, nin jusu suma si soto Kirisita la kafuɲoxoya xono, nin ɲoxo jusudunŋo be xanuya to, nin kafuɲoxoya be sotola Ni Senunŋo fe, nin ɲumaya nin hinno be je, 2al'alu miirolu ke kilin ti, xa nte la ɲaɲo dafa, xa i taxama benŋo xono. Alu la xanuya xa ke kilin ti, alu xonolu xa ke kilin ti, alu kilinɲa ŋinin. 3Alu xana fusi ke fadinɲa la walla fanbunɲa xanma. Bari alu i majigi, xa tolu jaate xo i xa bun alu ti. 4Alu si xana í miiri alu fannu kilinnu la nafa ma, alu bee kilin kilin xa í miiri to dulu la nafa ma. 5Miiriya men tun be Isa Kirisita la, wo ɲoxon xa ke alu dulu la: 6Ate men tun keɲa nin Ala keɲa mu kilin ti, a man a nin Ala la xaaɲanŋo ke fen ti, a me bo notonin men na. 7Bari a buruta wo bee to, xa jonŋo keɲa ta, xa ke moxolu ɲoxonŋo ti. A x'é yita moxo ti tumo men, 8a x'a fan majigi, xa xulu fo saya, gengenyiro xan saya fan. 9Wo le x'a tu, Ala x'a xotota bete, xa toxo di a ma, toxo men xa bun toxo bee ti, 10walasa fen wo fen be sanŋo to, anin duguxulo xan, anin duguxulo xoto, wolu ɲongi Isa toxo la; 11anin xo nenŋo bee x'a fo xo Isa Kirisita mu Marigi ti, walasa bunɲa xa la n Fa Ala xan. 12Wo ɲa ma, ń badin xanuninŋolu, alu xa nte lame tuma bee, xa nte tu alu bata. Alu wo ke tugun xa tanbi folo xan, x'a tara nte nte alu bata. Alu xa kisilo men soto, alu baaro ke wo hukumo xono, silanɲa nin jarajaro to. 13Bawo Ala le be baaro kexan alu xono, a si sinŋo di alu ma, alu xa ke a la ku lategeninŋo xanubaxolu nin a kebaxolu ti. 14Alu kuwo bee ke x'a tara alu man daxotoxuma nin soosoli ke, 15walasa alu xa ke jalagibalolu nin senumanŋolu ti, alu xa ke Ala dinŋolu ti, fe nte mennu la ɲin duniya in moxo tilinbalolu nin moxo jaxu innu to. Alu xa xan xa mana i to í xo sanxulo ma loololu, 16xa xumo di i ma men be nilamaya dila. Wo banna kela, nte kunŋo si xotota Isa Kirisita nalunŋo alu la kuwo koso, bawo ń na baaro nin ń na sege me na ke fuwo ti. 17Haali nin nte jelo bonta xa ke í xo sadaxo, xa kafu alu la lannaya la baaro ma, nte si ɲaɲa le wo la, xa ɲaɲa alu bee fe. 18Alu dulu xa xan xa ɲaɲa wo kuwo la, xa kafu nte ma xa ɲaɲa. 19Nte yilo b'a ma, nin a keta Marigi Isa sago ti, xo dondin nte si Timote ki alu ma; walasa nte du xa jusudun alu xibaruya soto xanma. 20Bawo nin ate kilin nte, moxo xote nte je, ń nin men be xono ma. Alu la kuwo hanmo be ate kilin ne la soobe la. 21Tolu bee be hanmela i fannu la kuwo lelu la, i nte hanmela Isa Kirisita la kuwo la. 22Bari alu fannu x'a lon Timote x'a la xantigiya yita ɲa men: A nin nte xa xibaru Dimanŋo baaro ke, í xo dinŋo nin a fa. 23Ń hakilo b'a ma x'ate le ki alu ma, nin ń xa ń na ɲa lon tumo men. 24Nte be lanin a la Marigi barako to, xo a me me, nte fan si taxa alu je. 25Nte x'a mafele xo a xa xan nte xa Epaforodite lakoppa alu ma, nin wo mu nte badinxe nin nte baarakeɲoxo nin nte kafuɲoxo ti kelo to. Alu tunnu x'a ki xa na nte maakuɲanfenŋolu ti. 26Alu bee jo loxoba tun b'a la. A tun jusukunŋo be tooronin bawo alu x'a la jangaro xibaro me. 27Tonɲa le mu a jangaruta, fo a tun be ŋinin xa sa. Bari Ala hinnata a la, ate kilin nte, a hinnata nte du la, walasa jusuxasi xote xana kafu nte la jusuxaso ma. 28Wo le x'a tu, nte xa ń tariya x'a ki alu ma, walasa nin alu x'a je, do xa kafu alu la ɲaɲo ma. Wo to, do si bo nte la jusuxaso la. 29Nin a sita je, alu x'a kunben ɲaɲaba to, Marigi toxo la. Alu xa xan xa wo ɲoxon moxo lelu bunɲa, 30bawo a tun be ŋinin xa sa Kirisita la baaro le nofe. A bota a fan na nte deemalo le xanma, alu tunnu fannu me men no nte ɲen.

will be added

X\