FILIPENGOLU 1

1Nte Poli nin Timote le be ɲin safe in kila, ntelu mennu keta Isa Kirisita la jonŋolu ti. N b'a kila Ala la moxo senumanŋolu bee ma Filipe gallo to, mennu nin Isa Kirisita kafuta, anin Ala la jama lakorosibaxolu nin a baaralalu. 2N Fa Ala anin Marigi Isa Kirisita xa neemo nin heero di alu ma. 3Nte xa ń miiri alu ma tuma wo tuma, ń si barako bula ń na Ala ɲen. 4Nin nte be Ala matarala alu bee ɲen tuma wo tuma, nte nitodiyaninŋo le be wo kela, 5bawo alu keta nte kafuɲoxolu ti xibaru Dimanŋo fo to, kabirin folofolo fo saasa. 6Ń be lanin a la xo Ala men xa ɲin baara ɲuma in damuta alu to, a si taxa ɲa fo a dafalunŋo, Isa Kirisita nalunŋo. 7A xa bete ɲin ɲoxon miiriya xa ke ń na alu bee la kuwo to, bawo alu la kuwo xa xole nte ma bete. Ala x'a la neemo di nte ma x'a la baaro men ke, alu bee xa do soto wo to, saasa xa nte tu kaso la, anin xa ń tu Xibaru Dimanŋo lafaasala, x'a sinsin. 8Ala mu ń seedo ti xo nte be alu bee xanunin bete, í xo Isa Kirisita be ń xanunin ɲa men. 9Ń be Ala matarala alu ɲen men na, wo fele: Ń b'a matarala, alu la xanuya xa bunɲa xa taxa a fe, lonniya soobe nin faamuyali dafaninŋo xono, 10walasa alu xa sin xa ɲuma lon. Nin wo keta, alu si senuya, xa ke jalagibalolu ti Kirisita la lunŋo. 11Alu si ke ku tilinnin kiika kebaxolu ti, Isa Kirisita barako to, mennu si nooro nin bunɲa la Ala xan. 12Ń badinŋolu, ń b'a fe alu x'a lon xo kuwo men xa nte soto, tonɲa la, wo keta sabaabu ti xibaru Dimanŋo xa taxa ɲa. 13Wo ɲa ma, goferenere la xube xono moxolu, anin a xoxanmoxolu bee x'a lon xo nte be kaso la Kirisita le la kuwo to. 14Badin lannayabaxolu tala bee x'e gigo senbe Marigi la, nte la kasolabulo koso. I xa jaxoleya soto bete, xa Ala la xumo fo x'a tara i man sila. 15Dolu kennu be Kirisita la kuwo waajula kiiliya le xanma, xa soosolo ke. Bari do dulu b'a kela ŋanneya ɲuma le la. 16Wolu be i la baaro kela xanuya la, bawo i x'a lon xo nte be jan Xibaru Dimanŋo lafaasalo le xanma. 17Bari tolu kennu be Kirisita la kuwo waajula fadinɲa le la. I ŋanneya man ɲin; i miiro mu le xa do kafu nte la tooro ma xa ń tu kaso la. 18Bari wo si nte fen ti. Ŋanneya jaxu tarata i la wo, ŋanneya bete tarata i la wo, a keta ɲa wo ɲa, Kirisita la kuwo be waajuxan moxolu ɲen, wo nitodiya be nte la. Ń be tula wo nitodiya xono, 19bawo ń x'a lon xo alu la Alamataralu barako to, anin Isa Kirisita Niyo la deemalo fe, wo kuwolu bee si falin nte la kisilo la. 20Nte keɲeninŋo be wo le ma, anin nte gigo be wo le xan, nte me malu abada. Bari xa nte hakilo lasigininŋo tu, saasa, anin tuma bee, Kirisita si bunɲa nte balo to, ń na nilamaya fe, walla ń na saya fe. 21Katugala nte bulu, xa nilamaya, Kirisita le mu. Nin ń sata, wo mu ń bulu tono le ti. 22Bari xa tu ń nila jan, nin wo si a tu ń xa baara nafama ke tugun, wo to, ń man a lon ń si men sugandi. 23Ń xono be talanin: A xa di ń ɲen xa duniya tu, xa ke Kirisita bata; wo le ken ɲoxon nte. 24Bari atelu la kuwo la, ń xa tu ń nila, wo le xa fisa. 25Nte be lanin wo la. Wo xanma, ń x'a lon xo nte si tu ń nila, xa ke alu bee senbo to, walasa alu xa taxa ɲa, xa ɲaxali lannaya to. 26Wo ɲa ma, nin nte saagita nanin alu bata, nte la kuwo si ke alu jangunnaku ti xa tanbi folo xan, Isa Kirisita la kafuɲoxoya la. 27Bari alu bosilo xa ben Kirisita la Xibaru Dimanŋo la fota ma; walasa nte taxata bo alu ma wo, ń man taxa wo, nte x'alu xibaro me xo alu balanninŋo be miiriya kilin na, x'alu tu kelo la jusukun kilin na, lannaya nofe, Xibaru Dimanŋo be men dila. 28Alu xana a tu alu jaxolu x'alu lasila fen si to. Wo si ke wolu la halagilo taagumanseedo ti i ɲen, anin xa ke taagumanseedo ti xo atelu be kisilo silo xan. Wo kuwo bota Ala le to. 29Ala xa ɲin don neemo ke alu ɲen alu xa la Kirisita la; wo doron nte, anin alu xa tooro ate ɲen du. 30Alu xa nte je kelo men na, nin alu x'a lon xo nte be wo la haalibi, alu dulu xa wo kelo ɲoxon ke.

will be added

X\