MACU 9

1Isa dunta xulunŋo xono, xa dalaba tege xa taxa a la gallo to. 2Moxolu nata xe muruxunte do ti a bata, a be lanin laranŋo to. Isa xa wo moxolu la lannaya je tumo men, a xo xe muruxunte ɲen xo: «Ń din, í hakilo lasigi! Í la junubolu yaafata!» 3Wo to, sariya karanmoxo dolu xo i xonoto xo: «Ɲin xe in be Ala toxo tiɲala.» 4Isa x'e la miiriya lon, a xo: «Mun na ɲin miiri jaxu in be alu jusukunŋo la? 5X'a fo: “Í la junubolu yaafata,” walla: “Wuli, í x'é taxama.” Wo xuma fulo to, joman fo xa di? 6Bari ń b'a fe le alu x'a lon xo a sinŋo be Moxo Dinxe ɲen xa junubolu yaafa duguxulo xan.» Wo to, a xo muruxunte ɲen xo: «Ń x'é yanmaru, wuli, í x'é la laranŋo ta, xa taxa í bata!» 7Xe wulita wo ɲa in, x'a la laranŋo ta, xa taxa a bata. 8Moxolu xa wo je tumo men, i silata. I xa barako bula Ala ɲen, bawo a xa ɲin ɲoxon sin di hadamadinŋolu ma. 9Isa tanbito dula do la, a xa xe do je siginin sagallemutadula, wo tun toxo xo Macu. Isa xo a ɲen xo: «A lo ń nofe.» Macu wulita x'a lo a nofe. 10Isa tun be domolo la Macu bata; x'a tu non, sagallemutala kiika nin kujaxukela xotelu nata kafu a nin a la xarandinŋolu ma xa domolo ke. 11Farisiyalu xa wo je tumo men, i xo Isa la xarandinŋolu ɲen xo: «Mun na alu karanmoxo nin sagallemutalalu nin kujaxukelalu be domolo kela i ɲoxo fe?» 12Isa xa wo xumolu me tumo men, a xo: «Moxo kendolu maaku nte dogotooro la, jangaruto lelu maakuwo b'a la. 13Alu taxa i miiri ɲin xuma innu xoto ma xo: “Men xa di ń ɲen, wo mu hinno le ti, marafen sadaxa nte.” Bawo moxo mennu be i fannu jaatenin moxo tilinninŋolu ti, nte man na wolu kili, nte nata junubeto lelu kili, x'e kisi.» 14Wo to, Batiselila Yaya la xarandinŋolu x'e sodun Isa la, x'a ŋininxa xo: «Mun na ntelu nin Farisiyalu be sunna, x'a tara ite la xarandinŋolu nte sunna muume?» 15Isa x'e jaabi xo: «Maaɲoxe toɲoxolu si nitokuwa no ba, x'e nin maaɲoxe tu i ɲoxo fe? Abada, wo me ke no. Bari lunŋo si na, maaɲoxe si buusi i la, nin wo keta, i si sun. 16«Moxo si me faanuxono kuto la faanu xoto ma. Nin wo keta, wo kuto si xotomanŋo saba, x'a fara fo faraɲa jaxu. 17Moxo me dolo kuto ke sumalle xotolu to. Nin wo keta, dolo kuto kumuto si sumallolu te; bono si ke dolo to, sumallolu si tiɲa. Bari, dolo kuto kedula mu sumalle kuto lelu ti. Nin wo keta, i bee si lamara bete.» 18Xa Isa tu wo xumo la, Yahudiyalu la ɲamoxo do nata í ɲongi a xoto, x'a fo a ɲen xo: «Ń dinmuso birin banna saasa. Í me na í bulo la a xan ba, nin a si nilamaya?» 19Isa nin a la xarandinŋolu wulita x'a lo a nofe. 20Laada banbalo tun be muso do la, kabirin san tan nin fula. Wo nata Isa xo ma, x'é sodun a la, x'é maxa a la dorokexuwo la. 21Bawo a tun be í son a xonoto xo: «Nin haali ń maxata a la doroko la, ń si kendeya.» 22Isa x'é xofele, x'a je, a xo a ɲen xo: «Ń dinmusu, í hakilo lasigi, í la lannaya x'é kendeya» Wo nondin kilinŋo to, muso kendeyata. 23Isa sita ɲamoxo in na luwo ma tumo men, xa fulefolalu je anin jama, wolu be sonxola, a xo: 24«Alu bo jan; bawo dindinŋo man sa. A be sinnoxonin ne.» I jeleta a ma. 25Jama labota banto to tumo men, Isa dunta bunŋo xono, xa dindinŋo saninŋo muta a bulo ma doron, a wulita. 26Wo xibaro wanwanta jamano dula bee. 27Isa taxata xa bo non, a tanbito, fiyonto fula x'a lo a nofe, i be kulexan xo: «Dawuda Mamarinŋo, hinna n na!» 28Isa sita luwo ma tumo men, fiyontolu x'e sodun a la, Isa x'e ŋininxa xo: «Alu be lanin a la xo nte si alu ɲalu yele no ba?» I x'a jaabi xo: «Iyo, Marigi.» 29Wo to, Isa x'é maxa i ɲalu la x'a fo xo: «A xa ke alu ɲen x'a ben alu la lannaya ma.» 30I ɲalu yeleta. Isa x'a xoleya i ma xo: «Alu xana a tu moxo si x'a lon de!» 31Bari, kabirin i bota, i xa Isa toxo fo wo jamano dula bee. 32I be nala taxala tumo men, moxolu nata xe jinneto do ti Isa bata, men tun mu muumuwo ti. 33Kabirin Isa xa wo jinno xoyi, muumuwo xa xumo damuta. Jama dabaro banta. I xo: «Ɲin ɲoxon man je Banisirayila abada.» 34Bari Farisiyalu tunnu b'a fola xo: «A be jinnolu xoyila xa bo moxolu to jinnolu la kuntigo le barako la.» 35Isa tun be taxaxan gallubalu nin gallundinŋolu to, xa moxolu laxaran i la Alabatusuwolu xono, xa Ala la Mansaya xibaru Dimanŋo fo. A tun be jangaru ɲasifa nin felu bee kendeyala. 36Isa xa jama je tumo men, i hinno x'a muta; bawo i tunnu segeta, anin i gigo meseyata, í xo negaanibaxa nte saaxo mennu ma. 37Wo to, a x'é xantu a la xarandinŋolu ɲen xo: «Senefen nadarata xa sa, bari baarala xa doxo. 38Wo to, alu fuututigo matara, walasa a xa baarala kiika bula i xa taxa a la senefenŋolu ladara.»

will be added

X\