MACU 8

1Isa jigininma xa bo kuro to, jamaba x'a lo a nofe. 2Bagito do x'é sodun, x'é ɲongi a xoto, x'a fo a ɲen xo: «Marigi, nin a xa di í ɲen, í si sin no xa nte kendeya, anin xa ń senuya.» 3Isa x'a bulo tosaba x'é maxa a la, a xo: «A diyata ń ɲen, senuya!» Wo no bee to, a senuyata, bago x'a bula. 4Wo xo, Isa xo a ɲen xo: «Í xana fen fo moxo si ɲen, bari taxa í yita sadaxalasibaxo la. Kila Musa xa sadaxo men waajibiya, wo bo, men s'a yita i la xo í senuyata.» 5Isa dunta Kaperenahun gallo xono tumo men, sorodasi jalatigiba do x'é sodun, x'a matara xo: 6«Marigi, ń na baaradinŋo be lanin luwo ma, a be muruxunin, a be degunin bete.» 7Isa xo a ɲen xo: «Ń si taxa a lakendeya.» 8Sorodasi jalatigiba x'a jaabi xo: «Marigi, nte nin a man xan í xa dun nte la luwo ma, bari xuma kilin doron fo, ń na baaradinŋo si kendeya. 9Bawo kuntigo dolu be nte kunna, nte du be sorodaso dolu kunna. Ń s'a fo do ɲen xo: “Taxa,” a si taxa. Ń s'a fo do xote ɲen xo: “Na,” a si na. Ń s'a fo ń na jonxe ɲen xo: “Ɲin ke,” a si wo ke.» 10Isa xa wo xumo me tumo men, a dabaro banta x'a fo a nofemoxolu ɲen xo: «Tonɲa la, ń b'a fola alu ɲen xo: Ń man ɲin ɲoxon lannaya je moxo si la, haali Banisirayila xono. 11Ń b'a fola alu ɲen xo moxo kiika si na xa bo koton nin tiliboyi x'e sigi, i nin Burehima nin Nsiyaxa nin Yaxuba, xa domolo ke sanxulo Mansaya xono. 12Bari men tunnu be kela Ala la Mansaya dinŋolu ti, wolu si fili banto to, dibo to. Xaso nin dafatakinŋo si ke non.» 13Wo xo, Isa x'a fo sorodasi jalatigiba ɲen xo: «Taxa, í xa men fo, wo si ke í ɲen, x'a la í la lannaya xan.» Wo waxato fan, a la baaradinŋo kendeyata. 14Isa taxata Piyere la luwo ma. A xa Piyere bitanmusu tara lanin, xando b'a la. 15Isa x'é maxa a bulo la tumo men, xando fatata a ma. A wulita xa Isa la haajolu ke. 16Suwo kuta tumo men, moxolu nin jinnetolu kiika nata Isa ma. A xa jinnolu xoyi a la xumaxanŋo la, xa jangarutolu bee kendeya. 17Wo ɲa ma, kila Esayi la xuma in keta xo: «A x'é dun n na toorolu xoto, xa n na jangarolu kendeya.» 18Isa xa jama je a lamininnin tumo men, a x'a la xarandinŋolu yanmaru xo i xa taxa dalaba boxo do. 19Sariya karanmoxo do x'é sodun a la x'a fo a ɲen xo: «Karanmoxo, í je taxa dula wo dula, ń s'a lo í nofe.» 20Isa xo a ɲen xo: «Wuwo be kunkuwulolu kun, ɲaxanŋo be xonolu kun, bari dula nte Moxo Dinxe bulu, a s'í tofoɲo jan men.» 21A la xarandin kilin xote x'a fo a ɲen xo: «Marigi, a tu folo, nte xa taxa ń fa fure lasi.» 22Isa x'a jaabi xo: «A lo ń nofe, a tu furelu x'e la furelu lasi.» 23Isa nin a la xarandinŋolu dunta xulunŋo xono. 24Ɲakun kilin ma, foɲoba wulita dalaba xan fo fanfe tun be ŋinin xa xulunŋo latunu. Wo x'a tara, Isa tun be sinnoxonin. 25Xarandinŋolu x'e sutiya a la, x'a lakuni, x'a fo a ɲen xo: «Marigi, n kisi! N je tu de!» 26Isa x'e jaabi xo: «Mun na alu be silala? Alu la lannaya xa doxo.» A woman in wulita xa xuma xolen foɲo nin jiyo ɲen. Wo keninma, foɲo lota, jiyo x'é mala lep. 27Bee dabaro banta, i xo: «Ɲin mu jon ti, nin haali foɲo nin jiyo b'a xumaxanŋo labatula?» 28Isa sita dalaba boxo do tumo men, Gadarangolu la jamano xan, jinneto fula bota xaburufe to xa na a kunben. I la jaxuya kujaxo, moxo si tun me fatiya xa tanbi wo silo fe. 29Wo jinnetolu kuleta xo: «Ala Dinxe, mun x'é si ntelu ma? Í nata le ba xa n tooro jan, jannin waxato xa si?» 30Legooreba do tun be dulajan, domolo la. 31Jinnolu xa Isa matara xo: «Nin í be n xoyila, n bula n xa taxa dun ɲin legoore in to.» 32Isa x'e jaabi xo: «Alu taxa!» Wo keninma, jinnolu bota xe fula innu to, xa taxa dun legoore in to. Wo ɲa in, wo legoore gidita, x'e parati kurumalanŋo la, xa jigi dalaba to, xa sa. 33Lenegaanilalu x'e bori xa taxa gallo xono, xa wo kuwolu bee laxali, anin men keta wo jinnetolu la. 34Wo ɲa in, gallo moxo bee bota xa taxa Isa kunben. I x'a je tumo men, i x'a matara xo a xa taxa, xa bo i la jamano xono.

will be added

X\