MACU 7

1«Alu xana kiiti tege moxo xan, kiiti me tege alu dulu xan, 2bawo alu be kiito tegela tolu xan ɲa men, kiito si tege alu dulu xan wo ɲa kilin in ma. Alu be tolu ta sumanna sumannilanŋo men na, alu ta si suman wo la. 3Mun na dokkondinŋo men be í badinŋo ɲa to, í be í ɲa lola wo to, x'a tara salo men be í fan ɲa to, í ɲa nte wo la? 4Í s'a fo ɲa di í badinŋo ɲen xo: “Í lo, ń xa dokkondinŋo bo í ɲa to,” x'a tara salo be í fan ɲa to? 5Fulankafu in, salo bo í fan ɲa to folo; nin wo keta, í si jelo ke a ɲa ma, xa dokkondinŋo bo í badinŋo ɲa to. 6«Alu xana fen senumanŋolu fili wulolu xoto, i xana taxa i yelema x'alu serende. Alu xana xononkese daxolenŋolu fili lelu xoto, i yelemato xana taxa lo i to. 7«Alu Ala matara, a si di alu ma; alu ŋininno ke, alu si soto ke; alu da konkon, da si yele alu ɲa. 8Moxo wo moxo je Ala matara, wo si soto ke; men je ŋininno ke, wo si fen je; men je da konkon, da si yele wo ɲa. 9Atelu to, moxo joman si son xa kuro di a dinŋo ma, nin a xa buuro ŋinin a la? 10Walla a si sa di a dinŋo ma nin a xa ɲego ŋinin a la? 11Atelu mennu xa jaxu, nin atelu xa fen ɲuma diɲa lon alu dinŋolu ma, alu Fa men be sanŋo to, wo me fen ɲumalu di a tarabaxolu ma bete bete ba, xa tanbi atelu xan? 12«Awa, fen wo fen nin alu b'a fe moxolu x'a ke alu ɲen, alu dulu xa wo ɲoxon ke i ɲen. Wo le fota Musa la sariya nin kilalu la kitaabolu xono. 13«Alu dun da doxomandinŋo fe. Bawo da men be taxala halagilo ma, wo da xa bun, a silo taxama xa di, a taxamabaxolu xa sa. 14Bari silo men be taxala nilamaya banbalo ma, wo da xa doxo, a silo taxama xa xole, a taxamabaxolu man sa. 15«Alu i korosi kila fanolu ma. I saaxama be nala alu ma, bari i xono to, i mu turuma lelu ti. 16Alu s'i lon i la kewalolu ma. Resendin moninŋo si xati ɲogonsaase la ba? Walla turodinŋo si xati ŋaninjuwo la ba? 17Yiri ɲuma si din ɲuma ke, bari yiro men man ɲin, wo si dinŋo ke men man ɲin. 18Yiri ɲuma me din ke no, men man ɲin. Yiro men du man ɲin, wo me din ɲuma ke no. 19Yiri wo yiri nin a nte din ɲuma kela, wo si tege xa fili ta to. 20Wo ɲa kilin in ma, alu si kila fanolu lon i la kewalolu ma. 21«Mennu be ń kilila xo: “Marigi, Marigi”, wolu bee nte dunna Ala la Mansaya xono, fo ń Fa men be sanŋo to sago kebaxolu. 22Kiito lunŋo, moxo kiika s'a fo ń ɲen xo: “Marigi, Marigi”, n man kilaya ke í toxo la ba? N man jinnolu xoyi moxolu to í toxo la ba? N man kawaku kiika ke í toxo la ba? 23Wo to, nte s'a fo wolu ɲen xo: “Ń man alu lon abada. Alu bo ń xoto, kujaxukela innu.” 24«Nte be men fola alu ɲen ɲin ti, xo moxo wo moxo be nte la ɲin xuma innu lamela, x'e ke, wo tigo be le í xo moxo hakilima, men x'a la bunŋo jusigi fataxulo xan. 25Sanjiyo nata, xolu woyota, foɲolu tegeta xa na wo bunŋo xan, bari a man boyi; bawo a tun be lonin fataxulo xan. 26Bari nte be men fola alu ɲen ɲin ti, nin moxo wo moxo be nte la ɲin xuma innu lamela, nin a nte i kela, wo tigo be le í xo hakilintanŋo, men x'a la bunŋo jusigi keɲo xan. 27Sanjiyo nata, xolu woyota, foɲolu tegeta xa na wo bunŋo xan, a woman in boyita muruxumerexe.» 28Isa x'é soto wo xaranŋo la tumo men, jama dabaro tuta bannin a la moxolaxaranɲa la, 29bawo ate tun nte i laxaranna í xo i la sariya karanmoxolu; katugala barako tun be ate la xaranŋo le to.

will be added

X\