MACU 6

1«Al'alu fannu korosi, alu xana alu la Alaɲasilanɲa kuwolu ke x'alu fannu yita moxolu la. Nin alu xa wo ke, alu me na baraaji soto alu Fa la, men be sanŋo to. 2Nin í be sadaxo dila segebaxantunŋo ma, xana buutu fo í ɲa walasa moxolu x'é je x'é lasaxa. Fulankafo lelu b'a kela ten Alabatusuwolu xono anin bedolu to. I be wo kela nin moxolu s'i jagi. Tonɲa la, ń b'a fola alu ɲen xo i x'e la baraajo soto xa ban. 3Bari nin ite be sadaxo dila segebaxantunŋo ma, í numanbulo xana í kininbulo la ku keta lon, 4walasa wo xa ke fen duguninŋo ti. Nin wo keta, í Fa men be ku duguninŋolu jela, wo si í baraaji. 5«Nin alu be Ala matarala, alu xana a ke í xo fulankafolu b'a kela ɲa men; bawo a xa di wolu ɲen x'e lo Alabatusuwolu xono anin bedolu to xa Ala matara, walasa moxolu x'e je. Tonɲa la, ń b'a fola alu ɲen, wolu x'e la baraajo soto xa ban. 6Bari ite, nin í be Ala matarala, dun í la bugo xono, xa da taxun í da la. Í Fa matara non, men be dula duguninŋo. Ate men be ku duguninŋolu jela, wo si í baraaji. 7«Nin alu be Ala matarala, alu xana saagi xumolu xan fu sinɲa kiika ti, í xo Alalonbalolu b'a kela ɲa men. Wolu hakilo la x'e la xuma kiika le b'a tula i la taralolu be mutala. 8Alu xana wolu ladigi; bawo alu Fa men be sanŋo to x'a lon alu maakuwo be fenŋo mennu la, jannin alu xa wolu ŋinin a la. 9Atelu xa xan xa Ala matara ɲa men, wo fele: “N Fa men be sanŋo to, í toxo la senuya xa lon, 10na í la Mansaya ti, í sago be kela sanŋo to ɲa men, a xa ke duguxulo xan wo ɲa ma. 11N na bi baluwo di n ma, 12n na haxxolu yaafa n ma, í xo n dulu be yaafala n haxxetabaxolu ma ɲa men. 13Í xana a tu n xa dun xotoboliku xono, bari n kisi Jaxumanŋo ma. [Katugala mansaya nin sintigiya anin nooro mu ite le ta ti, fo abada. Amiini.]” 14«Nin alu be yaafala moxolu ma, alu Fa men be sanŋo to si yaafa alu dulu ma; 15bari nin alu nte yaafala tolu ma, alu Fa me alu dulu la haxxolu yaafa alu ma. 16«Nin alu be sunna, alu xana alu ɲalu tosiisi í xo fulankafolu b'a kela ɲa men. Wolu b'e ɲa tosiisila, walasa moxolu x'a lon xo i be sunnin. Tonɲa la, nte b'a fola alu ɲen xo i x'e la baraajo soto xa ban. 17Bari ite, nin í be sunna, í ɲada ku, xa latikolonŋo ke í kunŋo la, 18walasa moxolu xana a lon xo í be sunnin, fo í Fa men be dula duguninŋo kilin doron. Í Fa men ɲa be ku duguninŋolu la, wo si í baraaji. 19«Alu xana naafulu lakamari x'a lamara alu fannu ɲen ɲin duniya in to, tunbolu si a tiɲa jan men, sama walla sonŋo si a muta jan men, sunŋo dulu si dalu xati, xa suuɲalo ke jan men. 20Bari alu naafulo lakamari alu fannu ɲen sanŋo to; tunbolu me a soto non x'a tiɲa, sama me a muta non, sunŋolu me non dalu xati no xa talo ke. 21Bawo í la naafulo be jan men, í jusukunŋo du be kela non ne. 22«Moxo ɲa le mu a balo lanpo ti. Nin í ɲalu xa ɲin, í balo bee be keneya la. 23Bari nin í ɲalu man ɲin, í balo bee be dibo le to. Bari keneya men xa xan xa ke ite la, nin wo keta dibo ti, wo mu dibiba le ti de. 24«Moxo si me baaro ke no marigi fula ɲen. Nin a be kilin jaxuyanin, a be do xanunin ne. Walla nin a be notonin kilin na, a nte do jaatela. Alu me baaro ke no Ala nin xaaliso ɲen i ɲoxo la. 25«Wo le x'a tu, ń b'a fola alu ɲen xo: Alu xana hanme alu baluɲa la x'a fo xo: “Ntelu si mun domo, anin n si mun min?” Alu xana hanme alu feetofataɲa la x'a fo xo: “Ntelu si n feetofato soto ɲa di?” Nilamaya man xole domolo ti ba, fo balo man xole faano ti? 26Alu xonolu mafele, i nte fen lanna, i nte fen tegela, i nte fen nasawula kurukuru xono, bari alu Fa men be sanŋo to be i labalula. Atelu man fisa bete wolu ti ba? 27Jon be alu to, nin wo la hanmo si haali dondin kafu no a siyo ma? 28«Mun dun na alu be hanmela faanu kuwo la? Alu wulaxonobaxolu firo boɲa mafele. I nte baara kela, i nte wurundili kela. 29Wo bee nin a ta, nte b'a fola alu ɲen xo, haali mansaxe Sulemani nin a la saramaya bee, a la faanolu beteya man wolu kilin ta bo. 30Nin Ala be wulaxonobinŋo feetofatala ten, wo men be je bi, sinin a si fili ta to, a me atelu feetofata bete ba xa tanbi wo xan? Alu la lannaya xa doxo. 31Alu xana hanme x'a fo xo: “N si mun domo? N si mun min? N si mun ke xa n fannu feetofata?” 32Alalonbalo lelu be wo fenŋolu bee ŋininna tuma bee. Alu Fa men be sanŋo to x'a lon xo alu maakuwo be wo fenŋolu bee la. 33Alu Ala la Mansaya nin a la tilinninɲa ŋinin folo. Nin wo keta, wo fenŋolu bee si di alu ma xa kafu wolu ma. 34Alu xana hanme sinin kuwo la; bawo sinin be sinin ma. Lunŋo bee sege si a fan bo.

will be added

X\