MACU 5

1Isa xa wo jamaba je tumo men, a yeleta kuro do xan. A x'é sigi tumo men, a la xarandinŋolu x'e sodun a la. 2A x'a damuta x'e laxaran xo: 3«Mennu x'a lon xo i mu fangantanŋo ti Ala ɲa xoto, heero be wolu ɲen; bawo Ala la Mansaya mu i lelu ta ti. 4«Mennu juso be xasinin, heero be wolu ɲen; bawo i juso si sumaya. 5«Mennu be sabarinin, heero be wolu ɲen; bawo i si duguxulo soto ke ti. 6«Tilinninɲa xonxo nin a mindoxo be mennu la, heero be wolu ɲen; bawo i si fa. 7«Hinno be mennu jusukunŋo la, heero be wolu ɲen; bawo hinno si ke wolu la. 8«Mennu jusukunŋo xa senu, heero be wolu ɲen; bawo i si Ala je. 9«Mennu be benŋo ŋininna moxolu te, heero be wolu ɲen; bawo i si kili xo Ala dinŋolu. 10«Mennu be tooronin tilinninɲa silo taxamo xanma, heero be wolu ɲen; bawo Ala la Mansaya mu i lelu ta ti. 11«Nin moxolu be alu nanila, x'alu tooro, xa jaxuxaro la alu la nte la kuwo koso, heero be alu ɲen. 12Alu ɲaɲa, xa ɲaxali; bawo baraajiba be alu ɲen sanŋo to. Kila mennu nata alu ɲa, wo dulu toorota wo ɲa in ne. 13«Ate lelu mu duniya xooxo ti. Nin xooxo diya bota a la, a si ke no xooxo ti ɲa di tugun? Nafa fusi nte a la tugun fo x'a bon banto to, moxolu x'e taxama a xan. 14«Ate lelu mu keneya ti duniya ɲen. Gallo men be siginin kuro kunte to, wo me dugu no. 15Moxo me lanpo lamana xa miranŋo do labuti a kun na. Bari í b'a lamanala le x'a sigi a sigilanŋo xan, nin a si keneya bo luxonomoxolu ɲen. 16Alu la keneya xa xan xa bo wo ɲa kilin in ne ma moxolu ɲa xoto, walasa nin i si alu la kewale ɲumalu je, x'alu Fa tantu, men be sanŋo to. 17«A xana ke alu ɲen xo nte nata le xa Musa la sariya nin kilalu la xumolu bo je. Ń man na x'e bo je, ń nata le x'e dafa. 18Tonɲa la, ń b'a fola alu ɲen xo: Jannin sanxulo nin duguxulo xa sanko, haali sariya safedin doxomandin kilin, walla a xumadin mesemandin kilin me bo je, fo kuwo bee xa si a danŋo ma. 19Wo le x'a tu, men je sariyalu bee to doxomandinŋo sooso, xa tolu digi wo la, wo tigo si doxoya bee ti Ala la Mansaya xono. Bari moxo wo moxo je sariya labatu xa tolu digi wo ɲoxon na, wo si bunɲa Ala la Mansaya xono. 20Ń b'a fola alu ɲen xo: Nin alu man tilin xa tanbi sariya karanmoxolu nin Farisiyalu xan, alu me dun Ala la Mansaya xono abada. 21«Alu x'a me xo a fota alu benbalu ɲen xo: “Í xana moxo faxa. Moxo wo moxo je a moxoɲoxo faxa, kiito xa xan xa tege wo tigo xan.” 22Bari nte b'a fola alu ɲen xo: Moxo wo moxo je dimin a moxoɲoxo xoto, wo tigo nin kiito xa xan. Moxo wo moxo je a moxoɲoxo kili xo “naluma”, Yahudiyalu la Kiititegekafo xa xan xa kiito tege wo tigo xan. Men b'a moxoɲoxo kilila xo “jage”, wo tigo nin jahanaba ta xa xan. 23Nin í nin í la sadaxo taxata sadaxajanidula, xo í b'a dila Ala ma, nin í hakilo jigita a la xo í x'é moxoɲoxo junubo ta, 24í la sadaxo tu sadaxajanidula, xa taxa benŋo ŋinin í nin í moxoɲoxo te folo. Wo xo, í si na í la sadaxo di Ala ma. 25«Nin í nin í keleɲoxo be taxanin kiititegedula, í tariya xa benŋo ŋinin í nin a te, x'alu tu wo silo xan, walasa a xana í dun kiititegela bulu, wo x'é dun garado bulu x'é bula kaso la. 26Tonɲa la, ń b'a fola í ɲen xo í me bo non abada nin í man wo julo bee sara. Haali kuseeti, a me tu í la. 27«Alu x'a me xo a fota xo: “Í xana fuyanɲa ke.” 28Bari nte b'a fola alu ɲen xo: Moxo wo moxo je wandimuso mafele, xa jarabi a la, wo tigo xa fuyanɲa ke a jusukunŋo la xa ban. 29Nin í kininbulu ɲakeso le be junubo lasila í ma, a woloxoti, x'a fili dulajan; bawo í xa bono í balasubo dula kilin to, wo xa fisa í balasubo muume xa fili jahanaba xono. 30Nin í kininbulo le be junubo lasila í ma, a tege x'a fili dulajan; bawo í xa bono í balasubo dula kilin to, wo xa fisa í ma, í balasubo muume xa fili jahanaba xono. 31«A fota tugun xo: “Nin men x'a musu futuwo sa, wo tigo xa xan xa futusakayito di a ma.” 32Bari, nte b'a fola alu ɲen xo: Moxo wo moxo je a musu bula, x'a tara a man fuyanɲa ke, wo b'a musu bulala fuyanɲa la; xe men du je musu futusaninŋo ta, wo xa fuyanɲa ke. 33«Alu x'a me tugun xo a fota n benbalu ɲen xo: “Í xana í xalixanŋo tiɲa, bari nin í x'é xali Marigi ɲa xoto, í xalixanŋo latimme.” 34Bari nte b'a fola alu ɲen xo alu xana i xali muume. Alu xana i xali sanxulo la, bawo wo mu Ala la mansasigilanŋo le ti; 35alu xana i xali duguxulo la, bawo wo mu Ala sinxoto korondome le ti; alu xana i xali Yerusaleme la, bawo wo mu Mansaba la gallo le ti. 36Í xana í xali í fan mansakunŋo du la, bawo í me a no xa í kunsina kilin laxoyiya walla x'a lafin. 37Alu la xumo xa ke “iyo” walla “ayi” doron ti. Nin do kafuta wo ma, wo bota Sentane le to. 38«Alu x'a me xo a fota xo: “Ɲa sara mu ɲa le ti, ɲinŋo sara mu ɲinŋo ti.” 39Bari nte b'a fola alu ɲen xo alu xana alu ta sara moxo jaxolu ma. Nin do x'é fenta í kininbulu tama to, boxo do du lo a ɲen. 40Nin do b'a fe xa í kili kiititegedula, xa í la dorokexotobulo ta, a tu je a xa í la dorokeba du ta. 41Nin moxo do xa í diyakuwa x'a la dono la í kun, xa kilometere kilin ɲoxon ke, a la í kun xa kilometere fula ke. 42Nin men x'é tara, wo so. Nin do b'a fe xa fen do donto í ma, í xana í ban wo ma. 43«Alu x'a me xo a fota xo: “Í moxoɲoxo xanu x'é ban í jaxo to.” 44Bari nte b'a fola alu ɲen xo: Al'alu jaxolu xanu. Mennu b'a lola alu nofe, x'alu tooro, alu Ala matara wolu ɲen, 45walasa alu xa ke alu Fa men be sanŋo to dinŋolu ti. Katugala ate b'a la tilo labola moxo jaxolu nin moxo betolu bee ɲen. A be sanjiyo lanala moxo tilinninŋolu nin moxo tilinbalolu bee ɲen. 46Nin alu be alu xanubaxolu doronnu xanula, alu si baraaji joman soto? Sagallemutala dulu nte wo ɲoxon kela ba? 47Nin alu be alu badinŋolu doron nelu xontonna, wo mu kuba ti ba? Alalonbalo dulu nte wo ɲoxon kela ba? 48Atelu kennu xa ke moxo dafaninŋolu ti, í xo alu Fa men be sanŋo to be dafanin ɲa men.

will be added

X\