MACU 4

1Wo xo, Ala Niyo taxata Isa ti wulo xono, walasa Sentane x'a xotobo. 2A xa tan naani tili nin tan naani su ke a nte domoli kela. Wo xo, xonxo x'a muta. 3Sentane x'é sodun a la x'a fo a ɲen xo: «Nin í mu Ala Dinxe le ti, a fo xo ɲin kuru innu xa yelema xa ke buurolu ti.» 4Isa x'a jaabi xo: «A be safenin Kitaabo to xo: “Moxo nte balula domolifenŋo doron na, bari xuma wo xuma be bola Ala da, a be balula wo lelu la.” » 5Wo xo, Sentane taxata a ti gallu senunŋo to, nin wo mu Yerusaleme ti, x'a lalo Alabatusuba sanŋo to, 6x'a fo a ɲen xo: «Nin í mu Ala Dinxe le ti, í butun dugo ma xo; bawo a be safenin Kitaabo to xo: “Ala si yanmarolu di a la melekiyolu ma í la kuwo la, i s'í ta i bulolu to, walasa í sinŋo xana xosi kuru la.” » 7Isa x'a jaabi xo: «A be safenin Kitaabo to xo: “Í xana Marigi í la Ala xotobo.” » 8Sentane taxata a ti tugun kurujanba do sanŋo to, xa duniya jamanolu nin i xono nafalu bee yita a la. 9A xo a ɲen xo: «Ń si ɲinnu bee di í ma, nin í x'é ɲongi ń xoto, xa ń batu.» 10Wo to, Isa xo a ɲen xo: «Taxa xa bo jan, Sentane! Bawo a be safenin Kitaabo to xo: “Í si Marigi í la Ala batu, xa baaro ke ate kilin doron ɲen.” » 11Wo xo, Sentane x'é soobo a la. Melekiyolu x'e sodun a la, x'a maakuwolu ɲiɲa. 12Isa x'a me tumo men xo Yaya bulata kaso la, a taxata Galile. 13A bota Nasareti xa taxa sigi Kaperenahun gallo to, wo men be siginin Galile dalaba da la, Sabulon nin Nefutali maro xono. 14Wo ɲa ma, kila Esayi xa xumo men fo, wo keta xo: 15«Sabulon maro, Nefutali maro, maro men be ɲatilinnin dalaba ma, anin men be Yuruden bajiyo xofe, Galile maro, ite men mu siya tolu sigidula ti! 16Jamano moxo men tunnu be siginin dibo to, wolu xa keneyaba je! Moxo men tunnu be siginin jamana dibima xono, anin men tunnu be saya bulu, keneya bota wolu ɲen.» 17Kabirin wo tumo, Isa xa waajulo damuta xo: «Alu tuubi, katugala Ala la Mansaya x'é sutiya!» 18Xa Isa tu í taxamala Galile dalaba senbo fe, a xa badinma fula je; Simon, nin a be kilila xo Piyere, anin a doxoxe Andere. I tunnu be jalafilo la dalaba to, bawo molila le tunnu mu. 19Isa xo i ɲen xo: «Alu a lo ń nofe, ń si alu ke moxoŋininnalu ti.» 20Wo no bee to, i x'e la jalalu bula, x'a lo a nofe. 21Isa taxata ɲa dondin tumo men, a xa badinma fula xote je; Yaxuba nin a doxoxe Yaya. Sebede dinŋo le mu wolu ti. I tunnu nin i fa Sebede le be i la xulunŋo xono, x'e la jalalu toben. Isa x'e kili. 22Wo no bee to, i x'e fa nin i la xulunŋo tu je, x'a lo Isa nofe. 23Isa tun be taxaxan Galile maro dula bee. A tun be moxolu laxaranna i la Alabatusuwolu xono, xa Ala la Mansaya xibaru Dimanŋo fo, xa moxolu la jangarolu nin i la felu bee kendeya. 24A toxo bota Siri jamano dula bee, i xa jangarutolu bee lasi a ma: Jangaru sifa kiika nin dimin kiika be moxo mennu la, jinnetolu, ketujangarutolu anin namatolu. Isa xa wolu kendeya. 25Jamaba x'a lo a nofe, xa bo Galile nin Dekapole maro xono, xa bo Yerusaleme nin Yude maro anin Yuruden ba xo.

will be added

X\