MACU 3

1Wo tumo, Batiselila Yaya bota, xa waajulo damuta Yude wulo xono xo: 2«Alu tuubi; katugala Ala la Mansaya sutiyata.» 3Kila Esayi xumata men na kuwo to, wo mu Yaya le ti, a xo: «Moxo do fetenxanŋo si bo wulo xono x'a fo xo: Alu Marigi la silo toben, x'a la sila mesenŋolu latilin!» 4Ɲogomati doroko le tun be Yaya xanna, a la tetositilanŋo tun mu gulo le ti. A baluwo tun mu tonŋo nin wulaxonoliyo le ti. 5Yerusaleme gallo moxolu, Yude maro moxo bee anin Yuruden babulo lamininŋo bee tunnu be nala a ma. 6I tunnu b'e loxan i la junubolu la. A tun be wolu batisela Yuruden bajiyo to. 7Yaya x'a je tumo men xo Farisiyalu nin Sadusen diino moxolu kiika be nala nin i si batise, a xo i ɲen xo: «Fofoonedinŋolu! Jon x'a yita alu la, alu si kisi ɲa men Ala la diminŋo ma, men be nanin? 8Alu kewalolu ke mennu s'a yita xo alu tuubita. 9Alu xana i miiri x'a fo alu xono to xo: “N mu Burehima mamarinŋolu ti.” Ń b'a fola alu ɲen xo Ala si sin no xa ɲin kuru innu yelema x'e ke Burehima bonsonŋolu ti. 10Ŋendo tata yirolu lillo tego xanma xa ban. Yiri wo yiri nte din ɲuma kela, wo si tege xa fili ta to. 11Nte ken be alu batisela jiyo le la x'alu latuubi. Bari men be nanin nte xo, wo barako xa bun nte ti. Haali nte nin a man xan xa a la samatolu bo a to. Wo si alu batise Ni Senunŋo nin ta la. 12A la ɲosurundulanŋo b'a bulu x'a la ɲo surundu. A si ɲokeso ke kurukuro xono, bari ŋaɲa, a si ta sabalo ke xa wo jani.» 13Wo tumo, Isa bota Galile xa na Yaya bata Yuruden bada la nin a s'a batise. 14Yaya tun man son. A xo a ɲen xo: «Nte le maakuwo b'a la ite xa nte batise, ite dun si nte haabandi ɲa di, xo ń x'é batise?» 15Isa x'a jaabi xo: «A tu wo xa ke saasa, bawo n xa xan xa Ala sago dafa.» Wo to, Yaya sonta. 16Isa batiseta doron, a yeleta xa bo jiyo to, sanxulo dayeleta, a xa Ala Niyo jigito je a xan í xo jenetubanŋo. 17Xumaxanŋo do bota sanŋo to xo: «Ɲin mu ń Dinxe baato le ti, men na kuwo xa di bete nte ɲen.»

will be added

X\