MACU 28

1Yahudiyalu la tofoɲolunŋo tanbo xo, loxokunŋo tili folo, nin wo mu alahado ti, Magidala Mariyama nin Mariyama do taxata xaburo mafele saxo ma junna. 2Ɲakun kilin, duguxulu jarajaraba keta. Marigi la melekiyo do bota sanŋo to, xa na kuro birigintin, x'a bo xaburo da la, x'é sigi a xan. 3A ɲada tun be í xo sanjimeɲenxo, a la faanolu xa xoyi í xo kotondibuna. 4Garadolu silata fo i si jarajara, anin i keta í xo furelu. 5Melekiyo xa xumo ta. A xo musolu ɲen xo: «Alu xana sila! Ń x'a lon xo alu be Isa le ŋininna, men gengenta yiro ma. 6A nte jan, a kunita xa bo furelu to, í xo a tun x'a fo ɲa men. Alu na a mafele, a tun be lanin dula men! 7Alu i tariya xa taxa a fo a la xarandinŋolu ɲen xo: “A kunita xa bo furelu to, a be alu ɲa Galile, alu b'a jela non ne.” Men tun be nte ma x'a fo alu ɲen, wo mu ɲin ne ti.» 8Musolu x'e tariya xa bo xaburuda la. I silaninŋo ɲaɲaninba x'e bori xa taxa xibaro fo xarandinŋolu ɲen. 9Wo ɲa in, Isa x'e kunben, x'e xonton xo: «Alu nin sege.» Musolu x'e sodun Isa la, x'e ɲongi a xoto x'a sinŋolu muta x'a batu. 10Isa xo i ɲen xo: «Alu xana sila! Alu taxa a fo ń badinŋolu ɲen xo i xa taxa Galile, i si nte je non.» 11Xa musolu tu silo to, sorodaso dolu, men tunnu be xaburo korosila, wolu wulita xa dun gallo xono. I xa fen wo fen je, i taxata a bee fo sadaxalasibaxa kuntigolu ɲen. 12Sadaxalasibaxa kuntigolu nin jamano moxobalu taxata i ɲoxo je wo kuwo to. I benta a to xa xaalisiba di sorodasolu ma. 13I xo: «Alu taxa a fo moxolu ɲen xo Isa la xarandinŋo lelu nata suwo to x'a fure suuɲa, x'alu tu sinnoxo la. 14Haali nin goferenero xa wo me, ntelu si a lafaamu walasa ku xana ke atelu la.» 15Sorodasolu xa xaalisi in muta, x'a ke í xo a fota i ɲen ɲa men. Wo xibaro jenjenta Yahudiyalu bata fo xa na a bula bi la. 16xarandin tan nin kilinŋo taxata Galile, xa yele kuro to, Isa tun xa men na xumo fo i ɲen. 17I xa Isa je tumo men, i x'e ɲongi a xoto, x'a batu, bari dolu sikkata. 18Isa x'é sodun i la x'a fo i ɲen xo: «Sinŋo bee dita nte ma sanŋo to anin duguxulo xan. 19Wo le x'a tu, alu taxa siyalu bee ke ń na xarandinŋolu ti, alu x'e batise Fa nin Dinxe anin Ni Senunŋo toxo la. 20Ń xa fen wo fen waajibiya alu ma, alu i laxaran xo i xa wolu bee labatu. A fele, nte nin alu mu lun wo lun, fo xa taxa duniya wuli.»

will be added

X\