MACU 27

1Saxo yeleninma, sadaxalasibaxa kuntigolu nin jamano moxobalu bee x'e ɲoxo tara Isa faxo latego xanma. 2I x'a siti xa taxa a dun Goferenere Pilate bulu. 3Yudasi men tun xa Isa dun bulo to, wo x'a lon tumo men xo Isa faxalo lategeta, a nimisita. Sadaxalasibaxa kuntigolu nin jamano moxobalu tunnu xa xaalisixoyi tan sabo men di a ma, a xa wolu lasaagi i ma. 4A xo i ɲen xo: «Ń xa junubo ke; xa moxo jalagibalo dun bulo to faxalo xanma.» Wolu x'a jaabi xo: «Ntelu la mun be wo to? Wo mu í kunku ti je.» 5Yudasi xa xaalisi innu fili Alabatusuba xono, xa bo non xa taxa a fan den julu xutuntanŋo la, x'a fan faxa. 6Sadaxalasibaxa kuntigolu xa xaalisi in tonbon, i xo: «A nte dagenin ɲin xaalisi in xa bula Alabatusuba xaalisimaradula, bawo jelu xaaliso le mu.» 7I benta a to, xa wo xaaliso ke xa daxadala la fuuto san, xa non ke luntan furelasidula ti. 8Wo le x'a tu, wo fuuto be kilila xo «Jelu fuuto» fo xa na a bula bi la. 9Kila Yeremi tun xa xumo men fo, wo keta ten xo: «I xa wo xaalisixoyi tan sabo muta, Banisirayila dinŋolu xa wo jaate a sonŋo ti; 10xa wo ke xa daxadala la fuuto san, í xo Marigi tun x'a fo ń ɲen ɲa men.» 11I xa Isa lalo Goferenere Pilate ɲa xoto, wo x'a ŋininxa xo: «Í mu Yahudiyalu la mansaxe le ti ba?» Isa x'a jaabi xo: «Nte mu wo le ti, a be í xo í x'a fo ɲa men.» 12Sadaxalasibaxa kuntigolu nin jamano moxobalu xa Isa jalagi fen wo fen to, a man wolu si jaabi. 13Wo to, Pilate x'a ŋininxa xo: «I be í jalagila kuwo mennu bee to, í tulu nte wolu la ba?» 14Bari Isa man Pilate jaabi fen si la. Wo xa Pilate dabaro ban bete. 15San wo san, Tanbinxansallo to, Goferenere Pilate tun si kasolamoxo kilin bula. Jama je men ŋinin a la, a si wo bula. 16Wo tumo, xe do tun be kaso la, a toxo xo Barabasi. Bee tun x'a lon a la kujaxuko fe. 17X'e kamarininŋo tu, Pilate xa jama ŋininxa xo: «Alu b'a fe ń xa jon kilin ne bula, Barabasi ba, walla Isa, men be kilila xo Kirisita?» 18Pilate x'a lon xo Isa la kuwo kiiliya le x'a tu, i x'a dun bulo to. 19Xa Pilate tu siginin kiititegedula, a musu xa kila bula a ma xo: «Fusi xana dun í nin ɲin moxo tilinnin in te, bawo suwo to, nte toorota siibo to kujaxu a la kuwo to.» 20Sadaxalasibaxa kuntigolu nin moxobalu xa jama xonotosuruxu, xo i x'a fo Pilate ɲen xo a xa Barabasi le bula, xa Isa faxa. 21Goferenero x'e ŋininxa tugun xo: «Ɲinnu fulo to, alu b'a fe ń xa jon kilin bula?» I x'a jaabi xo: «Barabasi.» 22Pilate x'e ŋininxa xo: «Ń dun si mun ke Isa la, men be kilila xo Kirisita?» I bee x'a jaabi xo: «A gengen yiro ma!» 23Pilate xo: «A xa mun kujaxu le ke?» I fetenbeteta xo: «A gengen yiro ma!» 24Pilate x'a je tumo men xo ate me fusi ta no ku in to, xo murutilo be ma xa jaxuya, a xa jiyo ta x'a bulolu ku jama ɲala. A xo: «Nte sin nte ɲin moxo tilinnin in faxalo to de, wo be alu fannu ma je.» 25Jama bee x'a jaabi xo: «A la saya xa den ntelu nin n dinŋolu la.» 26Wo to, Pilate xa Barabasi bula, a x'a tu Isa xa buwo gaɲo la, wo xo, x'a dun i bulu, a xa gengen yiro ma. 27Goferenere Pilate la sorodasolu nin Isa taxata goferenero la xube la, x'e toɲoxolu bee kamari a ma. 28I xa Isa la faanolu bo a ma, xa dorokeba wulenŋo do dun a xanna. 29I xa mansakufuno dara ŋaninŋo la, x'a ke a kunŋo la, xa guma dun a kininbulo to. Wo xo, i x'e ɲongi a xoto, xa jele a ma, i xo: «Yahudiyalu la mansaxe, í nin sege!» 30I xa dajiyo tuppu a ma, x'a lippa a kunŋo to guma la. 31I x'e soto jelela a ma tumo men, i xa dorokeba bo a xanna, x'a fan na faanolu dun a la. Wo xo, i taxata a ti, x'a gengen yiro ma. 32X'e taxato tu, i nin Sireningo do benta xo Simon. Sorodasolu xa wo diyakuwa, x'a bula Isa gengenyiro tala. 33I sininŋo dula do xo Goligota, wo xoto: «Kunxuludula», 34i xa dolo nin fen xunimanŋo do ɲaxamininŋo di a ma. A x'a nene tumo men, a man son x'a min. 35I xa Isa gengen yiro ma tumo men, i xa dokkolo ke, x'a la faanolu tala i ɲoxo te. 36Wo xo, i x'e sigi x'a lakorosi. 37Isa jalagikunŋo safeta yiro ma a kunnamato xo: «Ɲin mu Isa le ti, Yahudiyalu la mansaxe.» 38I xa boyinxannila fula gengen a senbo to. Kilin b'a kininŋo, do b'a numanŋo. 39Tanbibaxolu tunnu si a nani, x'e kunŋolu todon xo: 40«Ite men be Alabatusuba tela, x'a tolo tili saba xono, í fan kisi xo. Nin í mu Ala Dinxe le ti, jigi xa bo gengenyiro xan!» 41Sadaxalasibaxa kuntigolu nin sariya karanmoxolu anin moxobalu du tunnu be jelela Isa ma xo: 42«A xa dolu kisi, bari a korita a fan kisila. Ate le nte Banisirayila mansaxe ti ba? A xa jigi xa bo gengenyiro xan, n si la a la! 43A x'a gigo la Ala xan, x'a fo xo: “Ń mu Ala Dinxe le ti!” Nin Ala b'a xanunin, a dun me a bo bulo to!» 44Haali a nin boyinxannila mennu gengenta yiro ma i ɲoxo fe, wo du tunnu b'a nanila ten. 45Kabirin tilinkunte, dibo dunta jamano bee xono, fo xa si wura ma. 46Wo tumo, Isa fetenbeteta xo: «Eli, Eli, lama sabaxxatani?» Wo xoto xo: «Ń na Ala, ń na Ala, mun na í xa ń bula?» 47Moxo men tunnu be lonin je, wolu dolu xa wo me tumo men, i xo: «A be kila Eli kilila!» 48Do woman in x'é bori xa taxa fuulanŋo bula binegaro to, x'a den guma la, x'a di Isa ma, nin a s'a suusu. 49Tolu xo: «Alu i lo, alan x'a mafele nin kila Eli si na a kisi.» 50Isa fetenbeteta tugun, wo xo, a niyo bota. 51Wo no bee to, faanuba men tun be Alabatusuba xonototegenin, wo farata fula ti, x'a ta santo ma fo xoto. Duguxulo jarajarata, kurolu fetenta. 52Xaburolu dayeleta, Ala la moxo men tunnu sata, wolu kiika kunita. 53I bota xaburolu xono. Isa kunininma, i dunta Yerusaleme, dugu senumanŋo xono, x'e fannu yita moxo kiika la. 54Sorodasi jalatigiba nin sorodasi to men tunnu be Isa lakorosixan, wolu xa duguxulu jarajaro nin ku keninŋolu je tumo men, i silabeteta. I xo: «Tonɲa la, ɲin xe in tun mu Ala Dinxe le ti!» 55Musu kiika tunnu be lonin dulajan, x'a mafele. Wo tunnu x'a lo Isa nofe kabirin Galile, x'a haajolu ɲiɲa. 56Magidala Mariyama, Yaxuba nin Yusufu na Mariyama, anin Sebede musu tunnu be wolu to. 57Wura sita tumo men, Arimate naafulutigo do nata. A toxo xo Yusufu, a du tun mu Isa la xarandinŋo do le ti. 58A taxata Pilate bata, xa Isa fure ŋinin a la. Pilate x'a yanmaru xo a xa di a ma. 59Yusufu xa fure ta, xa lenfaanu kuto ke x'a kasanke, 60xa taxa a lasi xaburu kuto xono, a tun xa men jaga kuro to a fan xanma. Wo xo, a xa kuru belebeleba do birigintin, xa xaburo dataxun wo la, xa taxa. 61Magidala Mariyama nin Mariyama do tunnu be siginin x'e ɲatilin xaburo ma. 62Wo lun do, nin wo tun mu tofoɲolunŋo tobenlunŋo lun do ti, sadaxalasibaxa kuntigolu nin Farisiyalu x'e ɲoxo tara Pilate bata. 63I x'a fo a ɲen xo: «Kuntigo, n hakilo b'a la xo xa moxolafilila in tu í nila, a xo xo a saya tili sabo, a si kuni xa bo furelu to. 64Wo le x'a tu, n b'a fe í xa yanmaruya di xa xaburo korosi fo tili sabananŋo, walasa a la xarandinŋolu xana na a fure ta, x'a fo moxolu ɲen xo a kunita xa bo furelu to. Wo lafililo si jaxuya xa tanbi folo xan.» 65Pilate xo i ɲen xo: «Garadolu fele, alu taxa xaburo korosi, í xo a xa di alu ɲen ɲa men.» 66I taxata xa xaburo korosilikuwo ɲalabo, xa taagumanseedo do ke kuru belebeleba xan, men tun b'a dataxunnin, nin moxo me a dayele, xa sorodasolu bula je x'a korosi.

will be added

X\