MACU 26

1Isa x'é soto wo xumolu bee la tumo men, a xo a la xarandinŋolu ɲen xo: 2«Alu x'a lon xo tili fula be n nin Tanbinxansallo te. Wo tumo, Moxo Dinxe si dun bulo to, xa gengen yiro ma.» 3Wo to, sadaxalasibaxa kuntigolu nin jamano moxobalu x'e ɲoxo lakamari sadaxalasibaxa kuntigiba Kayife la luwo ma. 4I benta a to xo i si Isa muta xalixaliya la, x'a faxa. 5I tunnu b'e son xo: «A xana ke sallo to, nin wo nte, jama si muruti.» 6Xa Isa tu bagitoxe Simon na luwo xono Betani, 7muso do nin kurudaxandin daxolenŋo do x'é sodun a la. Wo tun be fanin tulu sumadiman daxolenŋo le la. A xa wo tulo bon Isa kunŋo xan x'a tu domolo la. 8xarandinŋolu xa wo je tumo men, i diminta. I xo: «Ɲin tiɲali in dun kunŋo mu mun ti? 9Wo tulu daxolenŋo tun si fiiri no xaalisiba la xa wo di segebaxantunŋolu ma.» 10Isa xa wo lon tumo men, a xo: «Mun na alu be ɲin musu in toorola? A xa ku ɲuma le ke nte ɲen. 11Alu nin segebaxantunŋolu b'e ɲoxo xan tuma bee. Bari alu nin nte nte tula kadawu. 12Ɲin musu in xa tulu sumadimanŋo bon nte xan, x'a ke nte kasanke ɲasigilanŋo le ti. 13Tonɲa la, nte b'a fola alu ɲen xo: Ɲin xibaru Diman in je fo duniya jan wo jan, musu in na ɲin kebaara in si laxali je, xa moxolu hakilo lajigi a kun.» 14Isa la xarandin tan nin fulo to kilin, men toxo xo Yudasi Isikariyoti, wo taxata sadaxalasibaxa kuntigolu bata, x'a fo i ɲen xo: 15«Alu si mun di ń ma, nin ń xa Isa dun alu bulu?» I xa xaalisixoyi tan saba jaate xa wo di a ma. 16Kabirin wo tumo, Yudasi tun be waxati ɲuma ŋininna nin a si Isa dun i bulu. 17Buurufuunulantan sallo lun folo, Isa la xarandinŋolu x'e sodun a la, x'a ŋininxa xo: «Í b'a fe n xa Tanbinxansallo domolo toben í ɲen min?» 18A x'e jaabi xo: «Alu taxa gallo xono, xe bata, ń xa men toxo fo alu ɲen xo: “Karanmoxo xo, xo ate la waxato sita, xo a nin a la xarandinŋolu be nala Tanbinxansallo kela í bata.” » 19Isa x'a fo ɲa men, xarandinŋolu x'a ke wo ɲa ma. I xa Tanbinxansallo domolo toben je. 20Suwo kuta tumo men, Isa nin a la xarandin tan nin fulo x'e sigi domolo la. 21X'e tu domolo la, Isa x'a fo i ɲen xo: «Tonɲa la, ń b'a fola alu ɲen xo, alu do be nala ń dunna bulo to.» 22Xarandinŋolu juso xasibeteta. I bee kilin kilin keta a ma xa Isa ŋininxa xo: «Marigi, nte le mu ba?» 23Isa x'e jaabi xo: «Nte nin men x'a bulo lajigi domolo to i ɲoxo la, wo tigo le be nala ń dunna bulo to. 24Moxo Dinxe si sa, í xo a be safenin a la kuwo to ɲa men. Bari moxo men be nala Moxo Dinxe dunna bulo to, bone be wo tigo ɲen. A tun xa fisa wo tigo ma, a xana haali bo duniya to.» 25Yudasi men tun b'a dunna bulo to, wo x'e xantu xo: «Karanmoxo, nte le mu ba?» Isa x'a jaabi xo: «Í fan ne x'a fo.» 26X'e tu domolo la, Isa xa buuro ta, xa barako bula Ala ɲen. Wo xo, a x'a tokutun, x'a di a la xarandinŋolu ma, x'a fo xo: «Alu hun, alu x'a domo. Ɲin mu ń balo le ti.» 27Wo xo, a xa minfen jipoto ta, xa barako bula Ala ɲen, x'a di i ma, x'a fo xo: «Alu bee xa do min. 28Ɲin mu ń jelo le ti, Ala la Kafuxanŋo jelo, men bonta moxo kiika ɲen, junubeyaafo xanma. 29Nte b'a fola alu ɲen xo, ń me ɲin resen in jiyo min bitugun, fo lunŋo men, nin ń nin alu be nala a kuto minna ń Fa la Mansaya xono.» 30I xa Alatantu donkilolu la tumo men, i bota xa taxa Oliwe kuro to. 31Wo to, Isa xo a la xarandinŋolu ɲen xo: «Bi su in to fan, alu bee si i bori xa ń kilin tu, bawo a be safenin Kitaabo to xo: “Ń si negaanila faxa, saaxolu si jenjen.” 32Bari nin ń kunita xa bo furelu to, nte si bula alu ɲa xa taxa Galile maro la.» 33Piyere xa xumo ta x'a fo a ɲen xo: «Haali nin bee x'e bori í ma, nte ken me ń bori í ma abada!» 34Isa xo a ɲen xo: «Tonɲa la, ń b'a fola í ɲen xo, bi su in to fan, jannin duntunŋo xa kokori, í si í xaro í xo sinɲa saba, xo í man nte lon.» 35Piyere xo a ɲen xo: «Haali nin nte nin í be sala le, nte me ń xaro a la, xo ń man í lon.» Xarandin to dulu bee xo ten. 36Wo to, Isa nin a la xarandinŋolu taxata yirifuuto do to, xo Jetisemane. A xo i ɲen xo: «Alu tu jan, ń be taxala Ala matarala non.» 37Isa nin Piyere nin Sebede dinxe fulo taxata i ɲoxo la. Jusuxaso nin silanɲaba boyita a mutala. 38Wo to, a xo i ɲen xo: «Ń juso be xasinin, fo ń be ŋinin xa sa. Alu tu jan, n xa tu i ɲala i ɲoxo fe.» 39A taxata ɲa dondin x'é boyi dugo ma, xa Ala matara ten xo: «Ń Fa, nin a si ke no, ɲin tooro jipoti in soobo nte la. Bari, nte sago xana ke, ite ta le xa ke!» 40Isa x'é koppa a la xarandin sabo dula, a x'e tara sinnoxonin. A xo Piyere ɲen xo: «Alu korita tula i ɲala, alu nin nte, haali leere kilin xono ba? 41Alu tu i ɲala xa Ala matara, walasa alu xana xotobo. Jusukunŋo be sonnin, bari balasubo barako xa doxo.» 42Isa x'é soobo i la sinɲa fulananŋo xa taxa Ala matara tugun xo: «Ń Fa, ɲin tooro in men be nanin nte ma, nin nte me kisi no wo ma, wo tumo í sago xa ke.» 43Wo xo, a nata tugun x'e tara sinnoxola, bawo sinnoxo tun be i ɲa to kujaxu. 44Isa x'e tu je xa taxa tugun, xa Ala matara sinɲa sabananŋo to, xa ate xuma kilin innu fo. 45Wo xo, a nata a la xarandinŋolu bata, x'a fo i ɲen xo: «Haalibi, alu be sinnoxola, x'e tofoɲo! Waxato sita. Saasa, Moxo Dinxe be nala dunna junubekelalu bulu. 46Alu wuli, n xa taxa! Moxo men be ń dunna bulo to, wo nato fele.» 47Xa Isa tu xumo la, Yudasi, nin wo mu a la xarandin tan nin fulo to do ti, wo nata, a nin jamaba. Fanŋolu nin gumalu tunnu be i bulu. Sadaxalasibaxa kuntigolu nin jamano moxoba le tunnu x'e ki. 48Yudasi men be nala Isa dunna bulo to, wo tun xa taagumanseedo do di a mutabaxolu ma. A xo: «Ń je men baataya xonton, wo le mu. Alu si wo muta!» 49Wo no bee to, Yudasi x'é sodun Isa la, x'a fo a ɲen xo: «Karanmoxo, í nin sege!» Wo xo, a x'a baataya xonton. 50Isa x'a jaabi xo: «Ń xanunte, í nata men xanma, wo ke.» Wo to, i x'e sodun Isa la, x'a muta. 51Isa nofemoxo do x'a la fanŋo boosi, xa sadaxalasibaxa kuntigiba la jonxe tulu kilinŋo carun. 52Isa xo a la xarandinŋo ɲen xo: «Í la fanŋo bula a la xono; bawo moxo mennu be fanŋo tala, wolu si faxa fanŋo la. 53Í man a lon ba xo nte si a no xa ń Fa matara, wo no bee to, a si melekiyo kelebulu tan nin fula di ń ma saasa? 54Bari nin wo keta, Kitaabu xumolu si ke no ɲa di? Wo mennu x'a yita xo waajibo le mu ɲin ku innu xa ke ten.» 55Wo xo, Isa xo jama ɲen xo: «Alu nin fanŋolu nin gumalu nata xa nte muta, a be í xo nin nte mu boyinxannila le ti. Nte tun nin alu be i ɲoxo xan lun wo lun Alabatusuba xono, xa moxolu laxaran. Alu dunnu man nte muta non de. 56Bari ɲinnu bee be kela le, walasa kilalu xa men safe Kitaabo to, wo bee xa ke.» Wo to, xarandinŋolu bee x'e bori, x'a tu je. 57Men tunnu xa Isa muta, wolu nin a taxata sadaxalasibaxa kuntigiba Kayife bata. Sariya karanmoxolu nin moxobalu tunnu be kamarinin non. 58Piyere x'é tu dulajan, x'a lo Isa nofe, fo xa si sadaxalasibaxa kuntigiba la luwo ma. A dunta luwo ma, x'é sigi garadolu bata, xa kuwolu labanŋo laxono. 59Sadaxalasibaxa kuntigolu nin Yahudiyalu la Kiititegekafo bee tun be seede jaxolu ŋininna, xa Isa jalagi i si a faxa ɲa men. 60Seede jaxo kiika bota, bari wolu si man sila soto. Labanŋo la, seede fula nata. 61I xo: «Ɲin xe in x'a fo xo: “Nte si sin no xa Alabatusuba te, x'a tolo tili saba xono”.» 62Sadaxalasibaxa kuntigiba wulita x'é lo, x'a fo Isa ɲen xo: «Ɲin moxo innu be men fola í ma, í nte wolu jaabila ba?» 63Isa man xuma. Sadaxalasibaxa kuntigiba xo: «Í xali Ala nilama toxo la, nin í le mu Kirisita ti, Ala Dinxe, wo fo n ɲen.» 64Isa x'a jaabi xo: «Ń mu men ti, í fan da janxa wo le fo. Bari ń b'a fola alu ɲen xo bi tanbininŋo xo, alu si Moxo Dinxe sigininŋo je, Ala, Sinŋobeetigo kininŋo xoto, x'a nato je xabolu xan, xa bo sanŋo to.» 65Wo to, sadaxalasibaxa kuntigiba diminta fo x'a fan na doroko tofara. A xo: «A xa Ala toxo tiɲa! N maakuwo be seede jomannu la tugun? Alu fannu birin a la Ala toxotiɲaxumo mela. 66Alu xo di?» I xo: «A xa xan ne xa faxa.» 67Wo xo, i xa dajiyo tuppu Isa ɲa to, x'a juri, dolu x'a fenta. 68I tunnu b'a fola a ɲen xo: «Kirisita, kilaya ke. Í lippabaxo fo n ɲen!» 69Piyere tun be siginin banto to, lukeno ma. Baaradinmuso do x'é sodun a la, x'a fo a ɲen xo: «Ite du tun nin Galilenga Isa be le i ɲoxo fe!» 70Bari Piyere x'é xaro a la moxolu bee ɲala, a xo: «Nte man a lon, ite b'a fe xa men fo.» 71A bota non x'é ɲatilin da mafanŋo la, baaradinmuso do xote x'a je. Wo x'a fo non moxolu ɲen xo: «Ɲin du tun nin Nasaretinga Isa be le i ɲoxo fe.» 72Piyere x'é xaro a la tugun, x'é xali xo: «Nte man ɲin xe in lon.» 73Wo xo dondin, moxo men tunnu be non, wolu x'e sodun Piyere la, x'a fo a ɲen xo: «Sikka nt'a to, í du mu moxo innu do le ti! Í xumaɲa be wo yitanin.» 74Bari Piyere x'é xali, x'a fan danga xo: «Nte man ɲin xe in lon.» Wo no bee to, duntunŋo do kokorita. 75Piyere hakilo jigita Isa la xumo la xo: «Jannin duntunŋo xa kokori, í s'í xaro nte la í xo sinɲa saba.» Wo to, Piyere bota banto to, xa taxa xasi bete.

will be added

X\