MACU 24

1Isa bota Alabatusuba xono. A taxato, a la xarandinŋolu x'e sodun a la xa Alabatusuba loɲa yita a la. 2A x'a fo i ɲen xo: «Alu ɲa be ɲin bee la de, xodi? Tonɲa la, nte b'a fola alu ɲen xo kuru si me tu kuru xan jan, i bee si boyi.» 3Isa taxata í sigi Oliwe kuro to. A la xarandinŋolu x'e sodun a la i danna, x'a ŋininxa xo: «Wo kewaxato fo n ɲen, anin í la na nin duniya banŋo taagumanseedo si ke mun ti.» 4Isa x'e jaabi xo: «Alu i korosi, moxo si xana alu lafili. 5Moxo kiika si na nte toxo la, x'a fo xo ite lelu mu Kirisita ti. I si moxo kiika lafili. 6Alu si kele xibarolu me, xa kele ŋuunuŋuunuxanŋolu me. Bari, alu xana sila. Waajibo le mu wolu xa ke bari wo kuwolu nte duniya wulo ti folo. 7Siya do si wuli siya do xanma, mansaya do du si wuli mansaya do xanma. Xonxobalu nin duguxulu jarajarolu si ke dula kiika. 8Wo kuwolu bee mu toorokuwolu damuto le ti, í xo muso la tinŋo wulito. 9«Wo to, moxolu si alu dun bulo to, x'alu tooro, x'alu faxa. Siyalu bee si alu jaxuya nte toxo nofe. 10Wo tumo, moxo kiika si lannaya bula, i si i ɲoxo janfa, x'e ɲoxo jaxuya. 11Kila fano kiika si wuli, i si moxo kiika bula filo xono. 12Jaxuya si siya, fo xanuya si doxoya moxo kiika jusukunŋo la. 13Bari moxo men je muɲa fo xa si labanŋo ma, wo si kisi. 14Ala la Mansaya xibaru Dimanŋo si jenjen duniya fanŋo bee, walasa siyalu bee xa wo seedeya me. Wo xo, duniya bantumo si si.» 15«Fen haramuninŋo men, nin kila Daniyeli x'a la xumo fo, alu si wo loninŋo je dula Senumanŋo. Men je ɲin xaran, wo x'a faamu! 16Wo je moxo mennu tara Yude maro xono, wolu x'e bori xa taxa kurolu to. 17Wo je men tara a la bilo sanŋo to, wo xana jigi xa taxa a la buguxono fenŋo ta. 18A je men tara a la fuuto to, wo xana í koppa xa taxa a la doroko ta. 19Musu xonomalu, anin dinŋo be mennu sunjiyo la, wolu si tooro bete wo lunŋolu. 20Alu Ala matara, walasa alu la boro xana ben neno waxato ma, a xana ben tofoɲolunŋo du ma. 21Bawo tooroba si ke wo lunŋolu, men ɲoxon man dali xa ke, kabirin duniya datumo, fo xa na a bula bi la. A ɲoxon du nte kela tugun. 22Nin Marigi tun man do bo wo lunŋolu la, moxo si tun me kisi. Bari a la moxo sugandininŋolu koso, do bota wo lunŋolu la. 23Wo to, nin do xo alu ɲen xo: “Kirisita be jan!” walla: “A be non,” alu xana la wo la. 24Bawo kirisita fanolu anin kila fanolu si wuli. I si taagumanseedebalu nin kawakuwolu ke, walasa xa moxolu lafili. Nin i tunnu si haali Ala la sugandininŋolu lafili no, i tunnu si wo ke. 25A fele, ń janxa alu lasobi. 26«Wo to, nin a fota alu ɲen xo: “A fele, a be wulo xono,” alu xana taxa je. Walla: “A felenti bugo xono,” alu xana la wo la. 27Awa, sanjimeɲenxo be bola koton ɲa men, xa keneya bo fo tiliboyi, Moxo Dinxe du la na si ke ten. 28Fen fure banna kela dula wo dula, dugolu si jigi non.» 29«Wo lunŋolu tooro tanbo xo, tilo si dibi, xaro me xoyi tugun, loololu si tege xa bo sanxulo ma, sanxulo sintigiyalu si jarajara. 30Wo to, Moxo Dinxe la taagumanseedo si je sanŋo to. Duniya siyalu bee si xasi. I si Moxo Dinxe nato je sanxulo xabolu xan, sintigiyaba nin nooroba xono. 31Buutuba si fo. A si a la melekiyolu bula xa taxa duniya tonxon naano to, xa Ala la moxo sugandininŋolu kamari, x'a damuta duniya kun do ma, fo xa taxa a bula a kun do la.» 32«Turojuwo be ɲayitalo men dila, alu wo faamu: Nin a bulolu nunguta, xa nerun, alu si a lon xo sama sutiyata. 33Wo ɲa ma, nin alu xa wo kuwolu bee je, alu a lon xo Moxo Dinxe nawaxato sutiyata, a be da la fan. 34Tonɲa la, ń b'a fola alu ɲen xo bi moxolu bee me sa, x'a tara ɲin ku innu bee man ke. 35Sanxulo nin duguxulo si sanko, bari nte la xumaxanŋolu me sanko abada.» 36«Moxo si man duniya banlunŋo nin a waxato lon. Melekiyo mennu be sanŋo to, wolu man a lon, Ala Dinxe du man a lon. Fa Ala kilinpe le x'a lunŋo lon. 37Kuwo mennu keta Nuhun tilo, wolu ɲoxonnu si ke Moxo Dinxe du nalunŋo. 38Bawo wo waxato, jannin waameba xa na, moxolu tunnu be domolo kela, x'e min, xa futuwo ke, x'e dinŋolu di futuwo la, fo Nuhun dunta xulunba xono lunŋo men. 39I tunnu nte sikkanin fusi to, fo waameba nata lunŋo men, xa taxa i bee ti. A si ke ten Moxo Dinxe du nalunŋo. 40Wo tumo, xeba fula si tara fuuto to, do si ta xa do tu je. 41Musu fula si tara jurilo la, do si ta xa do tu je. 42Wo to, alu hakili soto, bawo alu man alu Marigi nalunŋo lon. 43Alu x'a lon xo nin lutigo tun xa sunŋo nawaxato lon suwo to, a tun si tu a ɲala, walasa a xana dun a la luwo xono. 44Wo le x'a tu, alu dulu tobenninŋo xa tu, bawo alu hakili nte waxato men ma, Moxo Dinxe be nala wo waxato fan ne.» 45«Jon mu jon xantigo nin hakilima ti, men marigi x'a lasigi a la luwo kunna, xo a xa jon tolu la domolo di i ma a tumo to? 46Nin a marigi nata wo jonŋo tara wo baaro la, heero b'a ɲen. 47Tonɲa la, ń b'a fola alu ɲen xo a marigi si a lasigi a bulufenŋo bee kunna. 48Bari nin wo jon in xa jaxu, a si í miiri x'a fo a xonoto xo: “Ń marigi meta a man na.” 49A si a damuta x'a jon toɲoxolu buwo, xa domolo nin minno ke, a nin minnikelalu xa kafu x'e fa dolo la. 50Wo jonŋo marigi si na lunŋo do, a hakili nte lunŋo men ma, anin waxato do, a man men lon. 51A si wo jonŋo xoyi, x'a nin fulankafolu sara ke kilin ti, x'a bula dula do, xaso nin dafatakinŋo si ke jan men.»

will be added

X\