MACU 23

1Wo xo, Isa xumata jama nin a la xarandinŋolu ɲen. 2A xo: «Xa moxolu laxaran Musa la sariya la, wo mu sariya karanmoxolu nin Farisiya lelu la baaro ti. 3I je fen wo fen fo alu ɲen, alu wolu bee mara x'e ke. Bari alu xana i la ku ketalu ladigi, bawo i be men fola, i nte wo kela. 4I si doni xulinŋolu siti x'e la moxolu kun, bari i me son x'e buluxonondin kilin ke xa wolu deema x'e la donolu ta. 5I be i la kuwolu bee kela, walasa moxolu x'e je x'e lasaxa. Wo le x'a tu, i b'e fodalasafelu nin i buluxan na safelu kela belebeleba ti, x'e la doroke bunsanŋolu janɲa. 6Domoliba dulalu, ɲafesigidulalu xa di i ɲen. Alabatusuwo xono, ɲafesigilanŋolu xa di i ɲen. 7Don du xa di i ɲen moxolu x'e xonton bete beralu to anin x'e kili xo “Karanmoxo.” 8Bari atelu xana son moxo si x'alu kili xo “Karanmoxo”; bawo Karanmoxo kilin doron ne be alu ma. Alu bee mu badinma lelu ti alu nin i ɲoxo te. 9Alu xana moxo si kili duguxulu in xan xo alu “Fa”; bawo Fa kilinpe le be alu kun, men be sanŋo to. 10Alu xana son du alu xa kili xo “Kuntigo”; bawo Kuntigi kilinpe le be alu ma, nin wo mu Kirisita ti. 11Alu bee to moxoba le be kela alu la baaradinŋo ti. 12Moxo wo moxo je a fan xotota, wo si majigi; moxo wo moxo je a fan majigi, wo si xotota.» 13Isa xo: «Bone be alu sariya karanmoxolu anin Farisiyalu ɲen! Fulankafu innu! Alu be Ala la Mansaya dataxunna moxolu ɲa; alu fannu nte dunna anin mennu b'a fe xa dun, alu be wolu balila xa dun. [ 14«Sariya karanmoxolu anin Farisiyalu, bone be alu ɲen! Fulankafu innu! Alu be musujaxelu bulufenŋolu bee mutala i la, wo xo, xa taxa Alamatara janŋolu ke, x'alu fannu yita. Wo le x'a tu, alu la kiito si xoleya bete.] 15«Sariya karanmoxolu anin Farisiyalu, bone be alu ɲen! Fulankafu innu! Alu be taxama janŋo kela duguxulo nin jiyo xan, xa moxo kilin ŋinin x'a ladun alu la diino to. Bari nin wo moxo dunta, alu fannu si a yelema x'a ke jahanaba dunke ti, x'a lajaxuya fo sinɲa fula xa tanbi alu fannu xan. 16«Ɲamoxo fiyontolu, bone be alu ɲen! Ate mennu b'a foxan xo nin moxo wo moxondin je í xali Alabatusuba toxo la, wo xalilo me wo tigi muta; bari xo nin moxo wo moxondin je í xali Alabatusuba xono sano la, wo xalilo si wo tigo muta. 17Hakilintan innu! Fiyonto innu! Joman xa bun? Sano ba, walla Alabatusuba men be sano kela fen senunŋo ti? 18Alu xo du xo moxo wo moxo je í xali sadaxajanidula toxo la, wo xalilo me wo tigo muta. Bari sadaxo men be sadaxajanidula, moxo wo moxo je í xali wo la, wo xalilo si wo tigo muta. 19Fiyonto innu! Joman xa bun? Sadaxo ba, walla sadaxajanidula, men be sadaxo kela fen senunŋo ti? 20Awa, moxo wo moxo je í xali sadaxajanidula toxo la, fen wo fen b'a xan, a x'é xali wo bee le la. 21Moxo wo moxo be í xalila Alabatusuba la, wo be í xalila Alabatusuba nin Ala le la, wo men be siginin a xono. 22Moxo wo moxo be í xalila sanxulo la, wo tigi be í xalila Ala la mansasigilanŋo la anin a xansigibaxo. 23«Sariya karanmoxolu anin Farisiyalu, bone be alu ɲen! Fulankafu innu! Alu be naaxoxono fen mesenŋolu jakko bola: Nanaye, fenele, anin kumen. Bari alu be sariyalu bee la bunbumabalu tula je, nin wo mu tilinninɲa, nin hinno, anin xantigiya ti. Alu tunnu xa xan xa wo lelu ke, xa wo fen mesenŋo dulu kafu a ma. 24Ɲamoxo fiyontolu. Alu be alu minjiyo sensenna xa fen mesenŋolu bo a to, x'a tara fenŋo mennu be tanbila xa taxa alu xono, wolu si ɲogomo bo bunɲa to. 25«Sariya karanmoxolu anin Farisiyalu, bone be alu ɲen! Fulankafu innu! Alu be jitafelu nin tasolu xomala lelu kula x'e senuya, x'a tara i xonolu to be fanin alu la suuɲalifenŋolu nin alu nege jaxolu la. 26Farisiya fiyonto! Jitafe xono ku folo, wo to, a xomala du si senuya. 27«Sariya karanmoxolu anin Farisiyalu, bone be alu ɲen! Fulankafu innu! Alu be le í xo xaburo mennu laxuuruta; i xa bete ɲa la, bari i xonolalu be fanin fure xulu gansanŋo la, anin fen noxonin kiika. 28Alu dulu be ten. Alu be alu fannu kela moxo tilinninŋo ti moxolu ɲa xoto, bari alu jusukunŋo be fanin fulankafuya nin jaxuya la. 29«Sariya karanmoxolu anin Farisiyalu, bone be alu ɲen! Fulankafu innu! Alu be xaburu betolu darala kilalu ɲen, xa moxo tilinninŋolu la xaburolu jangu, x'a fo xo: 30“Nin n tunnu be balunin n benbalu la waxato, n me i deema xa kilalu faxa.” 31Wo ɲa ma, alu b'a yitala xo alu mu kilalu faxabaxolu mamarinŋolu ti. 32Awa, alu taxa ɲa, alu benbalu xa baara jaxo men damuta, alu wo dafa. 33Sa innu! Fofoonedin innu! Atelu si kisi jahanaba tooro ma ɲa di? 34Wo le x'a tu, nte be kilalu nin moxo hakilitigolu nin sariya karanmoxo soobe dolu kila alu ma. Alu si dolu faxa, xa dolu gengen yiro ma, xa dolu buwo gaɲo la alu la Alabatusuwolu xono, x'a lo i nofe, x'e tooro gallolu to taxanin. 35Wo ɲa ma, moxo tilinninŋo fen wo fen jelo bonta duguxulu in xan, wo bee haxxo si den alu la, x'é ta moxo tilinnin Abila jelo ma, fo xa taxa a bula Barasi dinxe Sakariya jelo ma, alu xa wo men faxa Alabatusuba nin sadaxajanidula te. 36Tonɲa la, ń b'a fola alu ɲen xo: Wo moxo mennu faxata ten, wo bee haxxo si den bi moxolu la.» 37«Yerusaleme, Yerusaleme, ite men be kilalu faxala, xa Ala la kiladinŋolu bun kuro la x'e faxa! Sinɲa kiika ti, nte keta a fe x'é la moxolu kamari í xo sisejibo be a dinŋolu kamarila a danfatanŋolu xoto ɲa men. Bari alu man son. 38A fele, alu la luwo toxulunŋo si tu alu bulu. 39Bawo nte b'a fola alu ɲen xo, alu me nte je bitugun, fo alu x'a fo lunŋo men xo: “Men nato fele Marigi toxo la, duwawo be wo fe!” »

will be added

X\