MACU 22

1Isa xa taliyo do xote la i ɲen xo: 2«Ala la Mansaya be le í xo mansaxe do, men xa maaɲoya domolo toben a dinxe ɲen. 3A x'a la jonŋolu ki xo i xa taxa moxo kilininŋolu nofe, i xa na maaɲoya domolo ke. Bari wolu man son xa na. 4Mansaxe xa jonŋo do xotelu ki i ma xo: “Alu taxa a fo moxo kilininŋolu ɲen xo domolo banta saasa. Nte xa ń na tuuralu anin ń na marafen toloninŋolu kiika faxa. Fenŋo bee tobenta, alu na maaɲoya domolo la.” 5Bari moxo kilininŋolu man wo si jaate, i taxata i haajolu la. Do taxata a la fuuto to, do taxata a la jaago la. 6Tolu xa mansaxe la jonŋolu muta x'e tooro fo x'e faxa. 7Wo keninŋo, mansaxe diminta. A x'a la sorodasolu bula xa taxa wo moxofaxalalu faxa, x'e la gallo jani. 8Wo xo, a xo a la jonŋolu ɲen xo: “Maaɲoya domololu mota, bari moxo kilininŋolu nin i man xan. 9Alu taxa bedolu to, alu je moxo wo moxo je, alu si i kili xa na.” 10Jonŋolu wulita xa taxa bedolu to, i xa moxo wo moxo tara je, moxo bete mu ba, moxo jaxu mu ba, i xa wolu bee kili xa na, fo maaɲobunŋo fata domolila la. 11Mansaxe dunta xa wo moxolu mafele tumo men, a xa moxo do tara je, faanu ɲuma nte a xanna men si dun maaɲoya to. 12A xo wo tigi ɲen xo: “Ń terixe, í dunta jan ɲa di, x'a tara faanu ɲuma nte í xanna men si dun maaɲoya to?” Wo xe man sege fili a to. 13Mansaxe xo baaradinŋolu ɲen xo: “Alu a sinŋo nin a bulolu siti x'a fili banto to, dibo to, xaso nin dafatakinŋo be kela jan men.” 14Isa xo: “Moxo kiika be kilinin, bari sugandininŋo man sa”.» 15Wo to, Farisiyalu taxata i ɲoxo je, xa feere dara i si Isa muta a fan datoxanŋolu ma ɲa men. 16I x'e la xarandinŋo dolu nin Herode la moxo dolu ki, x'a fo Isa ɲen xo: «Karanmoxo, n x'a lon xo í mu tonɲatigo le ti. Í be moxolu laxaranna Alasilo ma x'a xoyiya. Í nte silala moxo si ɲa; bawo moxolu bee xa xan í ɲen. 17Ite bulu, a be dagenin ba ntelu xa sagallo sara Rome mansaxe ma, walla a nte dagenin?» 18Bari Isa xa i la korojugaya lon, a xo i ɲen xo: «Fulankafu innu, mun na alu be nte xotobola? 19Alu be xaaliso men kela xa sagallo sara, alu wo do yita ń na.» I xa deɲe xaalisi ganan kilin yita a la. 20Isa x'e ŋininxa xo: «Jon kunxulo nin jon toxo be safenin xaalisi in xan?» 21I x'a jaabi xo: «Rome mansaxe le mu». Wo to, Isa xo i ɲen xo: «Awa, mansaxe ta mu men ti, alu wo di a ma, xa Ala ta di Ala ma.» 22I xa wo jaabo me tumo men, i dabaro banta. I x'e soobo Isa la xa taxa. 23Wo lunŋo fan, Sadusen diino moxo dolu nata Isa bata. Wo lelu xo, xo furelu nte kunila. I x'a ŋininxa xo: 24«Karanmoxo, kila Musa x'a fo xo, nin xe do sata, x'a tara a musu man din soto, a badinxe xa xan xa wo muso ta, xa dinŋo do soto a ma, a badinxe saninŋo ɲen. 25Awa, ntelu to, badinxe woorowula keta je. Folo xa muso futu, wo sata, x'a tara a man din soto. A doxo du xa musu in ta. 26Badinxe fulananŋo nin sabananŋo ta keta wo ɲa kilin in ma, fo xa si woorowulananŋo ma. 27I bee saninŋo xo, muso du sata. 28Furekuniyo lunŋo, jontigi kilin ta be kela musu in ti; katugala i woorowulo bee kilin wo kilin x'a ta muso ti?» 29Isa x'e jaabi xo: «Alu be filo xono, bawo alu man Kitaabo xumolu lon, alu man Ala la sintigiya du lon. 30Furekuniyo xo, xe nte musu futula, musu du nte sigila xe kun, bari i be kela le í xo melekiyolu be ɲa men sanŋo to. 31Men mu furekuniyo kuwo ti, Ala xa men fo alu ɲen, alu man wo xaran ba? A xo: 32“Nte mu Burehima la Ala le ti, Nsiyaxa la Ala, anin Yaxuba la Ala.” Ala nte furelu la Ala ti, nilamalu la Ala le mu.» 33Jama xa wo xumo me tumo men, i dabaro banta a la xaranŋo ma. 34Farisiyalu x'a me tumo men xo Isa xa Sadusenŋolu xumada xati, i x'e ɲoxo lakamari. 35Sariya karanmoxo do tun be i to, wo x'a mafele xo a be Isa xotobola. A xa Isa ŋininxa xo: 36«Karanmoxo, Ala la sariyalu bee to, joman xa bun?» 37Isa x'a jaabi xo: «Í si Marigi í la Ala xanu í jusukunŋo bee la, í niyo bee la, í miiro bee la. 38Wo le xa bun sariyalu to anin wo le mu i to folo ti. 39Fulanan men be wo ma, nin a nin wo xa xan, wo fele xo: “Í xa í moxoɲoxo xanu í xo í fan.” 40Musa la sariya bee anin kilalu la xumolu bee be wo sariya fula in ne xono.» 41Xa Farisiyalu kamarininŋo tu i ɲoxo xan, Isa x'e ŋininxa xo: 42«Alu be mun fola Kirisita la kuwo to? Jon mamarinŋo mu?» I x'a jaabi xo: «Dawuda le mamarinŋo mu.» 43Isa xo i ɲen xo: «Mun dun na Dawuda x'a kili Ni Senunŋo barako to xo Marigi? Bawo Dawuda xo: 44“Marigi x'a fo nte Marigi ɲen xo: Í sigi ń kininŋo xoto, fo nte xa í jaxolu ke í sinxotofenŋo ti.” 45Nin Dawuda be a kilila xo Marigi, a dun si ke a mamarinŋo ti ɲa di?» 46Moxo si man sin xa Isa jaabi haali xuma kilin na. X'a bo wo lunŋo ma, moxo si man fatiya x'a ŋininxa tugun.

will be added

X\