1 Isa nin a la xarandinŋolu sutiyaninma Yerusaleme la, fo xa si Oliwe kuro ma, Betefaje galluda la, a x'a la xarandin fula ki. 2 A xo i ɲen xo: «Alu taxa gallo to, men be alu ɲafe. Nin alu sita doron, alu si falimuso do tara sitinin je, a dinŋo b'a senbo to. Alu s'i firin, xa na i di ń ma. 3 Nin do xa fen fo alu ɲen, alu s'a jaabi xo: “Marigi le haajo b'e ma.” A woman in si i bula xa na wo no bee to.» 4 Wo keta, walasa kila la ɲin xuma innu xa ke xo: 5 «Alu a fo Siyon gallo ɲen xo: “A fele, í la mansaxe be nanin í bata, mansaxe sabarininŋo, a be siginin falimuso xan, a be falindinŋo xan, falimuso dinŋo.” » 6 Xarandinŋolu taxata x'a ke í xo Isa x'a fo i ɲen ɲa men. 7 I nin falimuso nin a dinŋo nata, i x'e la faanolu feene i xan. Isa sigita a xan. 8 Moxo kiika x'e la faanolu feene silo to, dolu xa fitabulolu tege x'e feene silo xan. 9 Jama men tun be Isa xo nin a ɲa, wolu tunnu be fetenna xo: «Tanto be Dawuda Mamarinŋo ɲen! Men nato fele Marigi toxo la, duwawo be wo fe! Tanto xa ke Ala ɲen sanjanbalu to!» 10 Isa dunta Yerusaleme tumo men, gallo bee gidita xa bo. I tunnu be i son xo: «Ɲin mu jon ti?» 11 Jama xo: «Kila Isa le mu, Nasaretingo le mu xa bo Galile maro to.» 12 Isa dunta Alabatusuba xono. Moxo men tunnu bee be fiiro nin sanno la je, a xa wolu xoyi. A xa xaalisifalinnalu la tabalolu anin jenetuban fiirilalu la sigilanŋolu kundinmayelema. 13 Isa xo i ɲen xo: «A be safenin Kitaabo to xo: “Nte la bunŋo si kili xo Alamatarabunŋo,” bari atelu kennu x'a ke boyinxannilalu dugudula ti.» 14 Fiyonto dolu nin sin kilinŋolu x'e tosodun Isa la Alabatusuba xono, a xa wolu kendeya. 15 Dindinŋo dolu tunnu be Alabatusuba xono, wolu fetenta xo: «Tanto be Dawuda Mamarinŋo ɲen!» Sadaxalasibaxa kuntigolu nin sariya karanmoxolu xa Isa la kawaku keninŋolu je tumo men, xa dindinŋolu fetenxanŋo me, i diminta. 16 I xo Isa ɲen xo: «I be men foxan, í tulo be wo la ba?» Isa x'e jaabi xo: «Iyo, alu man a xaran Kitaabo to ba xo: “Ala xa tantuli donkilo dun dindinŋolu nin deenanolu da.” » 17 Wo xumolu foninŋo, Isa x'e tu je xa bo gallo xono, xa taxa Betani, xa si non. 18 Wo lun do saxo ma, Isa koppato xa taxa Yerusaleme gallo xono, xonxo x'a muta. 19 A xa turojuwo do je silada la, a x'é sodun wo la, bari a man fusi tara a la, fo fito doron. A xo turojuwo ɲen xo: «Í me din ke tugun fo abada!» Wo no bee to, turojuwo jata. 20 xarandinŋolu xa wo je tumo men, i dabaro banta xo: «Ɲin turoju in jata ɲa di ɲa kun kilin ma?» 21 Isa x'e jaabi xo: «Tonɲa la, ń b'a fola alu ɲen xo: Nin lannaya be alu la, nin alu nte sikkala muume, nte xa men ke turojuwo la, alu me dan wo ɲoxon ma. Haali nin alu x'a fo ɲin kuru in ɲen xo: “Wutu jan í xa taxa í fili xooxojiyo to,” wo si ke. 22 Alu je fen wo fen tara Ala la, lannaya to, alu si wo soto.» 23 Isa dunta Alabatusuba xono. X'a tu moxolu laxaranna, sadaxalasibaxa kuntigolu nin jamano moxobalu nata a bata x'a ŋininxa xo: «Fanga joman x'é bula ɲin ku innu kela? Jon x'é yanmaru xa fiirilalu xoyi jan?» 24 Isa x'e jaabi xo: «Nte du be nala alu ŋininxala ku kilin ne la. Nin alu xa nte jaabi, wo tumo, men xa fango di ń ma xa ɲin ku innu ke, ń du si wo fo alu ɲen. 25 Jon xa Yaya bula batiselo la, Ala ba, fo moxolu?» I xo i ɲoxo ɲen xo: «Nin n xo: “Ala le x'a ki”, a s'a fo xo: “Mun dun na alu man la a la?” 26 Nin n dunnu xo: “Moxo lelu x'a ki”, n xa xan xa sila jama ɲa, katugala moxolu bee be Yaya mutanin kila do le ti.» 27 Wo to, i xa Isa jaabi xo: «Ntelu man wo lon.» Isa du xo i ɲen xo: «Awa, men xa fango di nte ma xa ɲin ku innu ke, nte du nte wo fola alu ɲen.» 28 Isa xo: «Atelu xo di ɲin ku in to? Xe do le, dinxe fula b'a kun. A xo dinxe folo ɲen xo: “Ń dinxe, taxa baaro ke ń na resenfuuto to bi.” 29 Wo x'a jaabi xo: “Nte me taxa no.” Bari wo xo, a x'é miiri, a taxata. 30 Fa xa wo baaro fo dinxe fulananŋo du ɲen. Wo x'a jaabi xo: “Baaba, ń si taxa.” Bari a man taxa. 31 Wolu din fulo to, joman ne xa fa sago ke?» I x'a jaabi xo: «Folo.» Wo ɲa in, Isa xo i ɲen xo: «Tonɲa la, nte b'a fola alu ɲen xo, sagallemutalalu nin jadomusolu si dun alu ɲa Ala la Mansaya xono. 32 Bawo Batiselila Yaya nata alu ma, xa sila tilinninŋo le yita alu la; alu man son xa la a la. Bari sagallemutalalu nin jadomusolu lata a la. Haali alu xa wo je, wo bee nin a ta, alu man tuubi xa la a la.» 33 «Alu tali xote lame. Xe do le, a xa resenfuuto bo, x'a sansan. A xa resenjibodinxo jaga a xono, xa kantalibento lo. Wo xo, a xa resenfuuto xarifa senekela dolu ma, xa taxama. 34 Resenmo waxato sita tumo men, fuututigo x'a la jonŋo dolu ki resenfuuto senebaxolu ma, xo i x'a la resenmo di a ma. 35 Bari resenfuuto senebaxolu x'a la jonŋolu muta, xa do buwo, xa do faxa, xa do bun kurolu la. 36 Fuututigo xa jonŋo do xotelu ki, mennu xa sa fololu ti. Resenfuuto senebaxolu xa wo dulu muta í xo fololu. 37 A labanŋo la, a x'a dinxe ki i ma. A xo: “I si ń dinxe ken bunɲa.” 38 Bari kabirin resenfuuto senebaxolu x'a dinxe je, i xo i ɲoxo ɲen xo: “A ketabaxo fele. Alu na, alan x'a faxa. A ke si ke alan ta ti.” 39 I x'a muta x'a fili resenfuuto xo ma, x'a faxa. 40 «Awa, nin resenfuututigo nata, a si mun ke resenfuuto senebaxolu la?» 41 I x'a jaabi xo: «A si wo moxo jaxolu faxa, fo faxaɲa jaxu, xa resenfuuto xarifa moxo xotelu ma, mennu si a la resenmo di a ma a waxato.» 42 Wo xo, Isa xo i ɲen xo: «Alu man ɲin xaran Kitaabo to ba? “Kurubunlolalu x'e ban kuro men to, wo keta bunŋo jusigikuro ti. Marigi le xa wo ke. Kawakuwo le mu ntelu bulu!” 43 «Wo le x'a tu, nte b'a fola alu ɲen xo Ala la Mansaya si muta alu la x'a di siya xote ma, men be nala a silo taxamala, xa Ala sago ke. [ 44 Moxo men je boyi wo kuro to, wo tigo si tote. A je boyi men to, a si wo tigo nooni.]» 45 Sadaxalasibaxa kuntigolu nin Farisiyalu xa Isa la taliyo me tumo men, wolu x'a faamu xo a be ite lelu ma. 46 I tunnu be feere ŋininna x'a muta, bari i silata jama ɲa. Bawo bee tun be Isa jaatenin kila do le ti.
