MACU 20

1«A fele, Ala la Mansaya be le í xo fuututigo do, a bota saxo ma junna xa baaradinŋo dolu ta x'e bula a la resenfuuto to. 2A nin i benta deɲe xaalisi ganan kilin to tilo xono. A x'e bula taxanin a la resenfuuto to, xa taxa baaro la. 3Tilo wololafa, a bota tugun xa moxo dolu loninŋo tara bera to, i tunnu nte fusi la. 4A xo wolu ɲen xo: “Alu dulu xa taxa baaro ke ń na resenfuuto to, alu nin sara men xa xan, ń si wo di alu ma.” 5Wo moxolu taxata resenfuuto to. Tilinkunte tumo, fuututigo bota xa do xotelu ta baaro la. Wura la, a bota tugun xa wo ɲoxon ke. 6Wurasuma la, a bota tugun xa moxo do xotelu tara lonin bera to, a xo wolu ɲen xo: “Mun na alu xa tilo muume bee ban jan, alu man baara ke?” 7I x'a jaabi xo: “Bawo moxo man n ta baaro la.” Fuututigo xo i ɲen xo: “Alu dulu xa taxa ń na resenfuuto to.” 8Fitiro ma, resenfuuto tigo x'a la kuɲabobaxo kili x'a fo a ɲen xo: “Baaradinŋolu kili, í xa bee la sara di a ma. Mennu labanta tala baaro la, í xa wolu folo sara, xa laban fololu ma.” 9Mennu xa baaro damuta wurasuma la, wolu nata. I bee xa deɲe xaalisi ganan kilin soto. 10Folo mennu xa baaro damuta dulu nata. Wolu tunnu ɲen x'e la xaaliso si siya tolu ta ti. Bari i dulu xa deɲe xaalisi ganan kilin ne soto. 11Wo xaaliso dita i ma tumo men, i xa fuututigo jalagi. 12I xo: “Ɲinnu mennu nata laban in na, i xa waxatindin doron ne baara. Bari í xa wolu nin ntelu xaaɲan, ntelu mennu xa tilo muume ke baaro la, xa tili funtano nin sege muɲa.” 13Fuututigo xa wolu kilin jaabi xo: “Ń terixe, ń man ku benbali ke í la. Alan man fata deɲe xaalisi ganan kilin ne ma ba? 14Í la sara ta í xa taxa. Ɲin men man baaro damuta junna, ń b'a sara nin í ta xaaɲanna le! 15Ń man xan ba xa ń na naafulo ke ń sago ti? Walla nte la ɲumaya moxolu ma, wo le be diginin í la ba?” » 16Wo xo, Isa xo tugun xo: «Wo ɲa kili in ma, xomoxolu si ke ɲamoxolu ti, ɲamoxolu si ke xomoxolu ti.» 17Isa tun be nala taxala Yerusaleme tumo men, a x'a la xarandin tan nin fulo kili i danna, x'a fo i ɲen xo: 18«Alan taxato fele Yerusaleme, Moxo Dinxe si dun sadaxalasibaxa kuntigolu nin sariya karanmoxolu bulu. I si a jalagi, x'a faxalo latege, 19x'a dun Alalonbalolu bulu xa jele a ma. I si a buwo gaɲo la, x'a gengen yiro ma. A sa tili sabo, a si kuni xa bo furelu to.» 20Wo to, Sebede musu nin a dinxe fulo x'e sodun Isa la. Wo muso x'é ɲongi Isa xoto x'a matara. 21Isa x'a ŋininxa xo: «Í be mun fe?» Muso x'a jaabi xo: «Nte dinxe fula innu mennu felenti, a latege nin í sigita í la Mansaya la, do xa sigi í kininŋo fe, do xa sigi í numanŋo fe.» 22Isa x'e jaabi xo: «Alu be men ŋininna, alu man wo lon. Nte xa xan xa ń min tooro jitafe men na, alu s'i min no wo la ba?» I x'a jaabi xo: «N si wo no». 23Isa xo i ɲen xo: «Tonɲa le mu, nte xa xan xa ń min tooro jitafe men na, alu dulu si i min wo la. Bari xa sigi ń kininŋo fe walla ń numanŋo fe, nte nte wo lategela. Nte Fa xa wo dulalu toben mennu ɲen, i be dila wo lelu ma.» 24To tanŋo xa wo me tumo men, i diminta wo badinxe fulo xoto. 25Bari Isa x'e kili x'a fo i ɲen xo: «Alu x'a lon xo jamanolu kuntigolu be i marala i la kuntigiya la, anin moxobalu be i la fango yitala i la. 26A man xan xa ke ten atelu tema. Bari nin men b'a fe xa ke moxoba ti alu to, wo tigo xa xan xa ke alu la baaradinŋo ti. 27Nin men b'a fe xa ke ɲamoxo ti alu to, wo xa ke alu la jonŋo ti: 28Wo ɲa ma, Moxo Dinxe man na xo moxo xa baaro ke a ɲen; bari a nata le, xa baaro ke moxolu ɲen, anin x'a niyo di, xa moxo kiika kunbo.» 29I boto Yeriko, jamaba x'a lo Isa nofe. 30Fiyonto fula tun be siginin silada la. Wolu x'a me tumo men xo Isa be tanbixan, i kuleta xo: «Marigi, Dawuda Mamarinŋo, hinna n na!» 31Moxolu x'e madigaamu xo i x'e de. Bari wo bee xan, i xa do kafu kule ma, x'a fo xo: «Marigi, Dawuda Mamarinŋo, hinna n na!» 32Isa lota. A x'e kili x'e ŋininxa xo: «Alu b'a fe ń xa mun ke alu ɲen?» 33I xo a ɲen xo: «Marigi, n b'a fe xa dula je!» 34I hinno xa Isa muta, a x'é maxa i ɲalu la. Wo no bee to, i xa dula je, i x'a lo Isa nofe.

will be added

X\