1 Isa bangeta Betileheme, Yude maro xono, mansaxe Herode tilo, a bangeninŋo xo, lonna dolu bota Koton xa si Yerusaleme, xa ŋininxalo ke xo: 2 «Yahudiyalu la mansaxe men birin bangela, a be min? N x'a la loolo je Koton, n nata x'a batu.» 3 Mansaxe Herode xa wo me tumo men, a hakilo ɲaxamita anin Yerusaleme bee. 4 A xa jamano sadaxalasibaxa kuntigolu bee nin sariya karanmoxolu kamari x'e ŋininxa Kirisita xa xan xa bange dula men. 5 I x'a jaabi xo: «Betileheme, Yude maro la», bawo kila xa men safe, wo felenti: 6 «Betileheme, ite men be Yuda jamano to, í nte gallundin ti Yuda gallubalu to; bawo kuntigo do be nala bola ite to, men si ń na jamano, Banisirayila mara.» 7 Herode xa lonnalu kili duguwo to, x'e ŋininxa loolo bowaxati jonjonŋo la. 8 Wo xo, a x'e ki Betileheme x'a fo i ɲen xo: «Alu taxa deenano xibaruya jonjonŋo ŋinin. Nin alu x'a je, alu na ń nabo a xalama, walasa ń du xa taxa a batu.» 9 I xa mansaxe la xumolu me tumo men, i taxata. I xa loolo je, i tunnu xa men nakorosi Koton, a bulata i ɲa, fo xa taxa í lo dindinŋo be dula men kunto. 10 I xa loolo je tumo men, i nitodiyata haali. 11 I dunta bugo xono, i xa dindinŋo nin a na Mariyama je. I x'e ɲongi, xa dindinŋo batu. Wo xo, i x'e la donolu tofirin x'a so sano nin digico la, anin fen suma dimanŋo do, men toxo xo mire. 12 Wo xo, Ala xa lonnalu lasobi siibo to xo i xana i koppa Herode bata ma. I xa je goori, xa taxa sila xote fe i la jamano xan. 13 Lonnalu taxaninma, Marigi la melekiyo do x'é yita Yusufu la siibo to, x'a fo a ɲen xo: «Wuli í xa dindinŋo nin a na ta, í x'é bori xa taxa Misira jamano xan. Tu je fo nte x'a fo í ɲen tumo men í x'é koppa; bawo Herode be nala dindinŋo ŋininna x'a faxa.» 14 Yusufu wulita suwo to, xa dindinŋo nin a na ta xa taxa Misira, x'é dugu non. 15 A tuta je fo Herode sata tumo men. Wo ɲa ma, Marigi xa men dun a la kila da, wo keta xo: «Ń xa ń dinxe kili xa bo Misira.» 16 Herode x'a lon tumo men xo lonnalu x'a janfa, a diminbeteta. A xa moxolu bula xa Betileheme nin a senbetogallolu dindinŋolu bee faxa, mennu siyo man tanbi san fula la, x'a ben lonnalu la waxati foninŋo ma. 17 Wo to, kila Yeremi la xuma foninŋo keta xo: 18 «Moxolu xa kulexanŋo me xa bo Rama gallo to, kule nin xasixanba, Raseli le be xasila a dinŋolu la saya la, a nte a fe a juso xa mafaxa, bawo i sata xa ban.» 19 Herode saninma, Marigi la melekiyo do x'a fan yita Yusufu la, siibo to, Misira jamano xan, 20 x'a fo a ɲen xo: «Wuli í xa dindinŋo nin a na ta, í nin i x'e koppa Banisirayila jamano xan, bawo men tunnu be dindinŋo nofe x'a faxa, wolu sata.» 21 Yusufu wulita wo ɲa in xa dindinŋo nin a na ta, x'é koppa Banisirayila jamano xan. 22 Bari kabirin a x'a me xo Arakelawusi bulata a fa Herode no to Yude mansaxeya la, a silata xa taxa non. Ala xa Yusufu lasobi siibo to, a taxata Galile maro xono. 23 A sigita gallo do to men toxo xo Nasareti. Wo ɲa ma, kilalu la ɲin xuma fonin in keta xo: «A si kili xo Nasaretingo.»
