MACU 19

1Isa x'é soto wo xaranŋo la tumo men, a bota Galile xa taxa Yude maro la, Yuruden ba boxo do. 2Jamaba x'a lo a nofe, a x'e to jangarutolu kendeya. 3Farisiya dolu x'e sodun a la x'a xotobo. I x'a ŋininxa xo: «A be dagenin xeba ɲen ba, x'a musu futuwo sa sabaabo bee la?» 4Isa x'e jaabi xo: «Alu man a xaran Kitaabo to ba, xo: “Folofolo, Dabaxo xa muso nin xe le da?” 5A xo du xo: “Wo le x'a tu, xeba si a na nin a fa bula x'é noto a musu la. I fulo si ke kilin ti.” 6Wo ɲa ma, i nte fula ti tugun, i mu kilin ne ti. Ala xa mennu kafu, moxo xana wolu tala.» 7Farisiyalu xa Isa ŋininxa xo: «Mun dun na Musa x'a waajibiya xo xeba xa futusakayito ke x'a di a musu ma, nin a b'a bulala?» 8Isa xo i ɲen xo: «Alu la sondonme xoleya le x'a tu nin Musa sonta alu xa wo ke. Nin wo nte, folofolo, a tun nte ten. 9Ń b'a fola alu ɲen xo: Moxo men je a musu bula, x'a tara a man fuyanɲa ke, xa do xote futu, wo xa fuyanɲa ke.» 10Isa la xarandinŋolu xo a ɲen xo: «Nin xeba la ɲa be wo ɲa in ne a musu ma, musufutubaliya le xa fisa mene.» 11Isa x'e jaabi xo: «Bee me ɲin xuma in faamu no, fo nin Ala xa wo sinŋo di men ma. 12Sabaabo kiika le be je mennu be moxolu bulala futubaliya la: Dolu nin i ta be wulula la; dolu la futubaliya mu moxo lelu no ti, bawo i x'e xeya faxa; do dulu nte sonna xa futu ke Ala la Mansaya xanma. Men si ɲin xuma innu faamu no, wo x'e faamu!» 13Moxo dolu nin dindinŋo dolu nata Isa bata nin a si a bulo la i xan, xa Ala matara i ɲen. Bari xarandinŋolu xa wolu madigaamu. 14Isa xo: «Alu dindinŋolu tu je i xa na ń bata, alu xana i bali, bawo Ala la Mansaya mu i ɲoxon nelu ta ti.» 15A x'a bulo la wo dindinŋolu xan, xa duwa i ɲen. Wo xo, a taxata xa bo je. 16Xe do x'é sodun Isa la x'a ŋininxa xo: «Karanmoxo, ń xa xan xa ku ɲuma joman ke walasa ń xa nilamaya banbalo soto?» 17Isa xo a ɲen xo: «Mun na í be nte ŋininxala ɲumaya kuwo la? Ala kilin doron ne mu ɲuma ti. Nin í b'a fe xa nilamaya banbalo soto, Ala la sariyalu labatu.» 18Xe x'a ŋininxa xo: «Wo mu sariya joman innu ti?» Isa x'a jaabi xo: «Í xana moxo faxa, í xana jadoya ke, í xana suuɲali ke, í xana xaro la í moxoɲoxo la. 19Í na nin í fa bunɲa, í xa í moxoɲoxo xanu í xo í fan.» 20Wo xamarindinŋo xo: «Nte xa ɲin sariya innu bee labatu, mun xote be xo haalisa?» 21Isa xo a ɲen xo: «Nin í b'a fe xa ke moxo dafaninŋo ti, taxa í bulufenŋo bee fiiri, xa wo xaaliso di segebaxantunŋolu ma. Nin wo keta, naafuluba si ke í kun sanŋo to. Wo xo, í si na a lo nte nofe.» 22Xamarindinŋo xa wo xumolu me tumo men, a nitokuwaninba wulita xa taxa, bawo naafulo kiika tun b'a kun. 23Isa xo a la xarandinŋolu ɲen xo: «Tonɲa la, ń b'a fola alu ɲen xo naafulubatigo dunŋo xa xole Ala la Mansaya xono. 24Ń b'a fola alu ɲen du xo ɲogomo dunŋo mesendiwuwo fe, wo xa newo xa tanbi naafulubatigo dunŋo ti Ala la Mansaya xono.» 25Xarandinŋolu xa wo xumolu me tumo men, i dabaro banta kujaxu fo i xo: «Jon dun si kisi no?» 26Isa x'e mafele x'a fo i ɲen xo: «Hadamadinŋolu bulu, wo me ke no, bari Ala me kori ku ma.» 27Wo to, Piyere xa xumo ta x'a fo xo: «A fele, ntelu buruta fenŋo bee to, x'a lo í nofe. Mun ne be kela ntelu ɲen?» 28Isa x'a fo i ɲen xo: «Tonɲa la, ń b'a fola alu ɲen xo nin Moxo Dinxe sigita a la mansasigilan nooroma xan duniya kuto to tumo men, atelu moxo tan nin fulo mennu x'a lo nte nofe, alu dulu si sigi mansasigilan tan nin fula xan, xa kiito tege Banisirayila bunda tan nin fulo xan. 29Moxo wo moxo je ɲiɲa a la luwo xo, walla a badinxelu, walla a badinmusolu, walla a fa, walla a na, walla a dinŋolu, walla a la fuutolu xo, nte toxo nofe, wo tigo si wo fenŋolu bee ɲoxon keme soto, xa saagi xa nilamaya banbalo soto. 30Ɲamoxo kiika si ke xomoxo ti, xomoxo kiika si ke ɲamoxo ti.»

will be added

X\