MACU 18

1xarandinŋolu x'e sodun Isa la wo tumo, x'a ŋininxa xo: «Jon xa bun bee ti Ala la Mansaya xono?» 2Isa xa dindinŋo do kili x'a lalo i temo to, 3a xo: «Tonɲa la, ń b'a fola alu ɲen xo, nin alu man yelema xa ke í xo dindinŋolu, alu me dun no Ala la Mansaya xono. 4Men be í fan majigila xa ke í xo ɲin dindin in, wo le xa bun bee ti Ala la Mansaya xono. 5Moxo men je ɲin dindin in ɲoxon do mutakubete nte la kuwo la, wo xa nte fan ne mutakubete. 6«Ɲin dindin in mennu xa lannaya ke nte la, moxo men je ke sabaabu ti, xa wolu to kilin na lannaya tiɲa, a tun xa fisa wo tigo ma, xa kuru belebeleba siti a xanŋo la x'a fili xooxojiyo dinoya to. 7Bone be duniya ɲen bawo a be kela sabaabu ti xa moxolu bula junubo kela. A me ke nin moxolu man bula junubo kela, bari moxo men be kela a sabaabo ti, bone be wo ɲen. 8Nin í bulo walla í sinŋo le be junubo lasila í ma, a tege, x'a fili dulajan. Í bulu kilinma walla í sin kilinma xa dun arajanna xono, wo xa fisa don ti, í bulu fulama walla í sin fulama xa fili ta sabalo to. 9Nin í ɲakeso le be junubo lasila í ma, a woloxoti x'a fili dulajan. Í ɲa kilinma xa dun arajanna xono, wo xa fisa don ti, í ɲa fulama xa fili jahanaba ta to.» 10«Al'alu fannu korosi, alu xana ɲin dindin innu si jaate fuwo ti. Nte b'a fola alu ɲen xo i la melekiyolu be lonin nte Fa ɲa xoto tuma bee, men be sanŋo to. [ 11Mennu be sankonin, Moxo Dinxe nata wo lelu kisi.] 12«Alu xo di? Nin saaxa keme be moxo do kun, kilin xa sanko wolu to, a me tan xononto nin xononto tu kuro to ba, xa taxa sankoninŋo ŋinin folo? 13Nin a x'a je, tonɲa la, ń b'a fola alu ɲen, a si ɲaxali wo saaxa sankoninŋo la xa tanbi to tan xononto nin xononto xan, wolu mennu man sanko. 14Wo ɲa kilin in ma, alu Fa men be sanŋo to sago nte ɲin dindin innu si kilin xa sanko.» 15«Nin í badinŋo x'é haxxo ta, taxa a ma, í xa a la filo yita a la, í kilin nin a kilin. Nin a x'é lame, í nin í badinŋo keta i ɲoxo ɲen moxo ti tugun. 16Bari nin a man í lame, moxo kilin walla moxo fula la í fan xan, walasa kuwo bee xa ɲabo x'a la moxo fula walla saba la seedeya xan. 17Nin a man son xa wo dulu lame, a kuwo lasi Ala la jama ma. Nin a man son xa Ala la jama lame, í x'a muta í xo Alalonbalo, walla sagallemutala. 18«Tonɲa la, nte b'a fola alu ɲen xo, nin alu man son ku wo ku ma duguxulo xan, son me ke wo ma sanŋo to. Alu je son ku wo ku du ma duguxulo xan, sonŋo si ke wo ma sanŋo to. 19«Tonɲa la, ń b'a fola alu ɲen du xo, nin alu moxo fula benta ku wo ku to duguxulo xan, xa Ala matara wo la, ń Fa men be sanŋo to si wo di alu ma. 20Bawo moxo fula walla moxo saba je kamari dula wo dula nte toxo la, nte be wolu temo to.» 21Wo to, Piyere x'é sodun a la x'a ŋininxa xo: «Marigi, nin nte badinŋo tuta ń haxxo tala, ń xa xan xa yaafa a ma fo sinɲa jelu? Fo sinɲa woorowula ba?» 22Isa x'a jaabi xo: «Ń man a fo í ɲen xo fo sinɲa woorowula, bari í si yaafa a ma fo sinɲa woorowula sigidulama tan woorowula. 23Wo le x'a tu, Ala la Mansaya si xaaɲan ɲin ma: A be le í xo mansaxe do nin a la jonŋolu la jaatebo. 24A xa jaate damuta tumo men, i xa jonŋo do lasi a ma, mansaxe la talan xaaliso wulu tan tun be wo la. 25Wo xaaliso saraɲa tun nte wo jonŋo ɲen. A marigi x'a waajibiya xo a nin a musu nin a dinŋolu nin a bulufenŋolu bee xa fiiri, x'e ke a la julusara ti. 26Wo jonŋo x'é ɲongi a marigi xoto x'a matara xo: “Muɲa ń ɲen, ń s'í la julo bee sara.” 27Jon in hinno x'a marigi muta, a x'a la julo bula a ɲen, x'a bula xa taxa. 28Wo jonŋo boninŋo, a nin a jon ɲoxo do benta, a la xaalisindin tun be wo la. A xa wo muta a xanŋo to x'a fo a ɲen xo: “Ń na julo sara!” 29A toɲoxo in x'é ɲongi a sinŋo xoto x'a matara xo: “Muɲa ń ɲen, ń s'í sara.” 30Bari a man son wo ma. A taxata x'a bula kaso la fo a x'a la julo sara tumo men. 31A toɲoxolu xa wo je tumo men, i diminta kujaxu. Men keta, i taxata wo laxali i marigi ɲen. 32Wo to, wo marigo xa jon in kili, x'a fo a ɲen xo: “Jon jaxu in, ń yaafata í la julo bee ma, bawo í tun xa ń matara. 33Í du tun man xan ba xa hinna í toɲoxo la, í xo nte hinnata í la ɲa men?” 34A marigi diminbeteta, a taxata a bula kaso la x'a tooro, fo a x'a la julo bee sara tumo men. 35«Wo ɲa ma, nin alu dulu fen wo fen man yaafa alu badinŋo ma alu jusukunŋo bee la, nte Fa men be sanŋo to du si alu ke wo ɲa in.»

will be added

X\