MACU 17

1Wo xo tili wooro, Isa taxata Piyere nin Yaxuba nin wo doxoxe Yaya ti i danna, kuru janba do sanŋo to. 2Isa sawuro mayelemata i ɲala je. A ɲada ɲarata í xo tilo. A la faanolu xoyiyata í xo kotondibuna. 3Ɲakun kilin, xarandinŋolu xa kila Musa nin kila Eli je, i nin Isa be xumala. 4Piyere xa xumo ta, a xo Isa ɲen xo: «Marigi, alan be jan, wo xa ɲin. Nin a xa di í ɲen, ń si tillisi saba lo jan, ite ta mu kilin ti, kila Musa ta kilin, kila Eli ta kilin.» 5Xa Piyere tu xumo la, xaba ɲaraninŋo do jigita i xan, x'e dugu. Xumaxanŋo bota wo xabo to x'a fo xo: «Ɲin mu ń Dinxe baato le ti, men na kuwo xa di bete nte ɲen. Alu a lame!» 6Xarandinŋolu xa wo xumaxanŋo me tumo men, i silata fo xa danmatanbi, i x'e ɲadalu buti dugo ma. 7Isa x'é sodun i la, x'a bulo la i xan x'a fo i ɲen xo: «Alu xana sila, alu wuli!» 8I x'e kunŋo xotota tumo men, i man moxo xote je nin Isa kilin nte. 9Xa i jigito tu xa bo kuro to, Isa x'a fo x'a xoleya i ma xo: «Alu xa men je, alu xana wo laxali moxo si ɲen, fo Moxo Dinxe xa kuni tumo men xa bo furelu to.» 10Xarandinŋolu xa Isa ŋininxa xo: «Mun na sariya karanmoxolu b'a fola xo kila Eli xa xan xa na folo?» 11Isa x'e jaabi xo: «Tonɲa le mu, Eli xa xan xa na folo, xa fenŋo bee toben. 12Bari nte b'a fola alu ɲen xo Eli nata xa ban, moxolu korita a lonna. I xa i sago bee ke a la. Moxo Dinxe du be toorola i bulu wo ɲa in ne.» 13Xarandinŋolu x'a faamu wo ɲa in ne, xo a tun be xumaxan i ɲen Batiselila Yaya le la kuwo to. 14Isa nin a la xarandinŋolu be sila jama ma tumo men, xe do x'é sodun Isa la x'é ɲongi a xoto. 15A x'a fo xo: «Marigi, hinna nte dinxe la; bawo ketujangaro le b'a la, a be tooronin kujaxu. Nin a x'a muta, tumo dolu a si boyi ta to, tumo dolu a si boyi jiyo to. 16Ń nata a ti í la xarandinŋolu bata, bari i korita a kendeyala.» 17Isa xo: «Moxo lannayabalolu anin kukebalikelalu, nte si tu alu bata fo waxati joman? Nte si muɲa alu xoto fo waxati joman? Alu na a ti jan.» 18Isa xa jinno madigaamu. Jinno bota dindinŋo to, a kendeyata wo dulandin kilinŋo bee. 19Xarandinŋolu x'e sodun Isa la xa taxa a ti i danna, x'a fo a ɲen xo: «Mun na ntelu korita ɲin jinna in xoyila?» 20Isa xo i ɲen xo: «Bawo alu la lannaya xa doxo kujaxu. Tonɲa la, nte b'a fola alu ɲen xo: Haali nin alu la lannaya tun xa bun í xo mutaradekeso, alu tunnu s'a fo ɲin kuru in ɲen xo: “Bo jan xa taxa je fen”, a si taxa. Alu me kori fusi ma. [ 21Bari ɲin jinne sifa in me xoyi no, nin Alamatara nin sunŋo kafuninŋo nte.]» 22Lun do, xa xarandinŋolu tu kamarinin i ɲoxo xan Galile, Isa xo i ɲen xo: «Moxo Dinxe be nala dunna moxolu bulu. 23I s'a faxa, bari a sa tili sabo, a si kuni xa bo furelu to.» Wo xa xarandinŋolu nitokuwa bete. 24Isa nin a la xarandinŋolu sita Kaperenahun tumo men, Alabatusuba xaalisi mutalalu x'e sodun Piyere la x'a ŋininxa xo: «Alu la karanmoxo nte Alabatusuba xaaliso sarala ba?» 25Piyere x'e jaabi xo: «Iyo, a b'a sarala.» Piyere dunta bugo xono tumo men, Isa folo xa xumo ta xo: «Simon, ite hakililata mu mun ti? Jon xa xan xa sagallo nin sagallendinŋo sara ɲin duniya in mansaxelu ma? Jamanadinŋolu walla luntanŋolu?» 26Piyere x'a jaabi xo: «Luntanŋolu». Isa xo a ɲen xo: «Wo tuma, jamanadinŋolu man xan x'a sara. 27Wo bee nin a ta, n nte a fe xa ɲin moxo innu lajusu. Taxa dolinŋo fili dalaba to; ɲege folo men j'í ta, wo muta. Nin í x'a muta, í s'a da yele xa xaalisi gananŋo tara je. Wo xaaliso ta xa taxa nte la sagallendinŋo nin í fan ta sara.»

will be added

X\