MACU 15

1Farisiya dolu nin sariya karanmoxo dolu bota Yerusaleme xa na Isa bata. I x'a ŋininxa xo: 2«Mun na í la xarandinŋolu be n na moxobalu la laadolu soosola? Bawo, i nte i bulolu kula jannin i xa domolo ke.» 3Isa x'e jaabi xo: «Mun na ate dulu be Ala la sariya soosola alu la laadolu ɲen? 4Bawo Ala xo: “Í na nin í fa bunɲa.” A xo du xo: “Moxo wo moxo je xuma jaxo fo a fa walla a na ma, wo tigo xa xan xa faxa.” 5Bari atelu xo xo nin do x'a fo a fa walla a na ɲen xo: “Nte tun xa xan xa í deema naafulo men na, wo dita Ala ma,” 6wo tumo, waajibi nte wo tigo x'a fa deema tugun. Wo ɲa ma, alu xa Ala la xumo ke fuwo ti, x'alu fannu la laadolu latimme. 7Fulankafu innu! Kila Esayi xa men fo alu ma, wo benta le fan. Ala x'a bula a fola xo: 8“Ɲin moxo innu be nte bunɲala i da le to gansan, bari i jusukunŋo nin nte xa jan i ɲoxo la. 9I be ń batula fu le; katugala i be moxolu laxaranna hadamadinŋolu la sariya daraninŋo lelu ma.” » 10Isa xa jama kili x'a fo i ɲen xo: «Al'alu tulolu lo xa faamuyalo ke. 11Fenŋo men be dunna moxo da, wo nte a noxola, bari fenŋo men be bola moxo da xono, wo le b'a noxola.» 12Isa la xarandinŋolu x'e sodun a la x'a fo a ɲen xo: «Í x'a lon xo í la xumo digita Farisiyalu la ba?» 13A x'e jaabi xo: «Nte Fa men be sanŋo to man yiri wo yiri tutu, wo si wutu xa bo je. 14Alu i tu je, i be i fiyonto ɲoxo lelu la guma sabala. Nin fiyonto x'a fiyonto ɲoxo la guma saba, i fulo bee si boyi dinxo xono.» 15Piyere xo a ɲen xo: «Ɲin tali in xoto fo ń ɲen». 16Isa xo: «Ate dulu, alu man faamuyali ke ba? 17Alu man a lon ba xo fen wo fen be dunna moxo da, wo be taxala a xono le to, wo xo a si bo? 18Bari men be bola moxo da, wo be bola a jusukunŋo le la, wo le be moxo noxola Ala ɲa xoto. 19Kuwo mennu be bola moxo jusukunŋo la, wolu mu miiriya jaxo lelu ti: Moxofaxo, fuyanɲa, malibaliya kuwolu, suuɲalo, faniya anin toxotiɲaxumolu. 20Wo kuwo lelu be moxo noxola, bari xa domolo ke í bulukubalo la, wo nte moxo noxola.» 21Isa bota non xa taxa Tire nin Sidon jamano to. 22Kanangamuso do tun be siginin non, wo nata Isa ma xa feten xo: «Marigi, Dawuda Mamarinŋo, hinna ń na! Jinno be ń dinmuso degunin kujaxu.» 23Bari a man sege fili a to. Isa la xarandinŋolu x'e sodun a la x'a fo a ɲen xo: «Musu in xoyi a xa taxa; bawo a be fetenna n nofe.» 24Isa x'e jaabi xo: «Nte man ki moxo si ma fo Banisirayila moxolu, wolu mennu be í xo saaxa sankoninŋolu.» 25Bari wo muso nata í ɲongi Isa xoto x'a matara xo: «Marigi, ń deema!» 26Isa x'a jaabi xo: «A man ɲin xa dindinŋolu la domolo ta i xoto, x'a fili wulundinŋolu xoto.» 27Musu in xo: «Marigi, wo mu tonɲa le ti. Bari domolo mennu be butunna wulundinŋolu marigilu xoto, i si wolu domo.» 28Wo to, Isa x'a jaabi xo: «Muso, í la lannaya xa bun, í diyanɲo mu men ti, wo xa ke í ɲen.» Wo waxato fan, a dinmuso kendeyata. 29Isa bota non xa taxa Galile dalaba da la. A yeleta kuro to x'é sigi je. 30Jamaba x'é sodun a la, i nin sinkilinŋolu nin fiyontolu nin muruxuntelu nin muumuwolu anin jangaruto kiika. I x'e bula a xoto, a x'e kendeya. 31Jama dabaro banta, bawo i x'a je muumuwolu be xumaxan, muruxuntelu be kendeyaxan, sinkilinŋolu b'e taxamaxan, fiyontolu be jelo kexan. Wo to, jama xa Banisirayila la Ala tantu. 32Isa x'a la xarandinŋolu kili x'a fo i ɲen xo: «Ɲin jama in maɲumo be nte la; bawo i tili sabo le je i be nte bata, domolifen dun nte i bulu. Ń nte a fe xa i xonxoto bula xa taxa, i barako xana taxa ban silo to.» 33Xarandinŋolu xo a ɲen xo: «Ntelu si domolo soto minto wula in xono jan, xa ɲin ɲoxon jamaba daŋinin?» 34Isa xo i ɲen xo: «Buurukun jelu be alu bulu?» I x'a jaabi xo: «Woorowula anin ɲege mesenŋo dolu.» 35A xa yanmaro di jama ma xa sigi dugo ma. 36A xa buurukun woorowula innu anin ɲege mese innu ta, xa barako bula Ala ɲen, x'e tokutun kutun x'e di a la xarandinŋolu ma. Wolu x'e di jama ma. 37I bee xa domolo ke, x'e fa. Xarandinŋolu xa sinsi woorowula fa domoli to la. 38Mennu xa domolo ke, wo tunnu mu wulu naani xeba le ti, musolu nin dindinŋolu sin nte wo la. 39Isa xa jama labula, wo xo, a dunta xulunŋo xono, xa taxa Magadan jamano to.

will be added

X\