MACU 14

1Wo tumo, mansaxe Herode xa Isa toxo me. 2A xo a la baaradinŋolu ɲen xo: «Ɲin mu Batiselila Yaya le ti. A kunita xa bo furelu to. Wo le x'a tu, a si kawakuwolu ke no.» 3Awa, mansaxe Herode tun x'a latege xo Yaya xa muta xa siti, x'a bula kaso la. Wo keta Herodiya le koso, nin wo mu a badinxe Filipe musu ti. 4Yaya tun x'a fo Herode ɲen xo: «A nte dagenin í xa í badinxe musu ta x'a nilama tu.» 5Herode tun b'a fe xa Yaya faxa, bari a silata jama ɲa; bawo wolu tunnu be Yaya jaatenin kila le ti. 6Herode bange lunŋo sanyelema tulunŋo do to, Herodiya dinmuso x'é don moxo kilininŋolu ɲa xoto. Wo diyata Herode ɲen 7fo a x'é xali xarafandin in ɲen, xo a je fen wo fen ŋinin a la, x'a si wo di a ma. 8Wo to, a na x'a xonotosuruxu, a xo: «Batiselila Yaya kunxulo di ń ma jan, miranŋo do la.» 9Mansaxe nitokuwata, bari a la xalixanŋo nin a domoliɲoxolu koso, a xa yanmaruya di xo Yaya kunxulo xa di a ma. 10A xa moxo do ki xa taxa Yaya kunxulo tege kasobunŋo xono. 11A kunxulo dita xarafandinŋo ma, miranŋo do la. Wo du taxata a di a na ma. 12Yaya la xarandinŋolu nata a fure ta, x'a lasi. Wo xo, i taxata wo xibaro fo Isa ɲen. 13Isa xa wo me tumo men, a dunta xulunŋo xono, xa bo non xa taxa wulo xono, a danna. Jama xa wo lon tumo men, i bota gallolu to x'a lo Isa nofe i sinŋo la. 14Isa bota xulunŋo xono tumo men, a xa jamaba je. I hinno x'a muta. Jangaruto men tunnu be i to, a xa wolu kendeya. 15Wura la, a la xarandinŋolu x'e sodun a la x'a fo a ɲen xo: «N be wulo le xono jan, suwo dun be ŋinin xa ku. Jama labula i xa taxa senbetogallolu to, nin i si domolo san i fannu ɲen.» 16Bari Isa x'e jaabi xo: «I taxakun nte dula to, alu fannu xa domolo di i ma!» 17Xarandinŋolu x'a jaabi xo: «Fen xote nte n bulu jan nin buurukun luulu anin ɲegexala fula nte.» 18Isa xo: «Alu na wolu di ń ma jan.» 19A xa yanmaro di jama ma xo i x'e sigi binŋo to. A xa buurukun luulo anin ɲegexala fulo ta, x'a ɲa xotota sanŋo to, xa barako bula Ala ɲen. Wo xo, a xa buurolu tokutun, x'e di a la xarandinŋolu ma, xo i x'e tala jama te. 20I bee xa domolo ke x'e fa. Xarandinŋolu xa sinsi tan nin fula fa tokutunŋolu la. 21Moxo haxxo men tun xa wo domolo ke, wo be taxala í lola xeba wulu luulu ɲoxon ma, musolu nin dindinŋolu sin nte wo la. 22Wo no bee to, Isa x'a la xarandinŋolu diyakuwa xo i xa dun xulunŋo xono, xa bula a ɲa, xa taxa dalaba boxo do, jannin a be jama labulala. 23A xa jama labula tumo men, a yeleta kuro to, xa Ala matara a danna. Suwo kuta x'a kilin tu je. 24Xulunŋo nin dandanŋo te janfayata. Fanfe tun be xulunŋo tinlaxula; bawo i nin foɲo tun be benna. 25Saxuyelenda la, Isa tun be í taxamala dalaba xan, taxanin a la xarandinŋolu ma. 26I xa Isa je í taxamala dalaba xan tumo men, i ja wulita, i xo: «Fure do le x'é yita n na.» I silaninŋo keta a ma xa xuure. 27Wo no bee to, Isa xo i ɲen xo: «Alu i ja sigi, nte le mu. Alu xana sila!» 28Wo keninma, Piyere xo a ɲen xo: «Marigi, nin í le mu, a yanmaru nte xa ń taxama jiyo xan xa taxa í bata.» 29Isa xo: «Na!» Piyere bota xulunŋo xono x'é taxama jiyo xan taxanin Isa ma. 30Bari a x'a je tumo men xo foɲo barako xa bun, a silata. A tun boyita dunna, a woman in xuureta xo: «Marigi, ń kisi!» 31Wo no bee to, Isa x'a bulo tosaba a ma, x'a muta. A xo a ɲen xo: «Í la lannaya xa doxo, mun na í sikkata?» 32I dunta xulunŋo xono doron, foɲo lota. 33Men tunnu be xulunŋo xono, wolu x'e ɲongi Isa xoto, i xo: «Tonɲa la, í mu Ala Dinxe le ti.» 34Isa nin a la xarandinŋolu xa dalaba tege, xa si tinto la, Genesareti jamano to. 35Wo dula moxolu xa Isa mategeninŋo lon, i xa jamano bee lalon a la. I nata jangarutolu bee ti a bata. 36Moxolu xa Isa matara xo a x'é lo i x'e maxa a la dorokebulo doron na. Moxo wo moxo x'é maxa a la, wolu bee kendeyata.

will be added

X\