MACU 13

1Wo lunŋo, Isa bota luwo ma xa taxa í sigi dalaba da la. 2Jamaba kamarita je, fo Isa dunta xulunŋo do le xono, x'é sigi. Jama bee tun be lonin dalaba da la. 3A tun be fen kiika fola i ɲen taliyolu to, a xo: «Senekela do bota xa taxa sarilo ke. 4X'a tu sarilo la, keso dolu butunta silasenbo fe. Xonolu nata wolu sokki. 5Keso do xotelu butunta kurumadulalu, banxuba nte dula mennu. Wolu falinta tariya, katugala i man bula banxuba to. 6Tilo xuniyata tumo men, wolu fasanfasanta, xa ja lillintanɲa bulu. 7Keso dolu butunta ŋaninŋolu to, ŋaninŋolu bunɲata xa wolu muta. 8Do xotelu butunta duguxulu beto to. Wolu falinta, xa wulu. Kunŋo dolu xa kese keme ke, dolu tan wooro, dolu tan saba. 9Tulo be men ma, wo xa lamelo ke!» 10xarandinŋolu x'e sodun Isa la x'a ŋininxa xo: «Mun na í be xumala i ɲen taliyolu to?» 11Isa x'e jaabi xo: «Lonŋo dita ate lelu ma xa Ala la Mansaya gullolu soto, bari a man di wolu ma. 12Bawo fen be men bulu, do si di wo ma x'a siyaya, bari fen nte men bulu, haali dondinŋo men b'a bulu, wo si muta a la. 13Wo le x'a tu, ń be xumala i ɲen taliyo to; bawo i si felelo ke, i nte jeli kela; i s'i tulolu lo, i nte meli kela, i nte faamuyali kela. 14Kila Esayi tun xa kilaya xumo men fo, wo keta ɲinnu la kuwo to xo: Ala xo: “Alu si melo ke ɲa wo ɲa, bari alu me faamuyali ke. Alu si felelo ke ɲa wo ɲa, bari alu me jeli ke. 15Bawo ɲin siya in jusukunŋo xoleyata, i x'e tulolu sukki x'e ɲalu taxun, walasa i ɲalu xana jeli ke, i tulolu xana meli ke, i xana faamuyali ke i hakilolu la, i xana taxa i yelema nte Ala ma, nin nte si i kendeya.” 16«Bari atelu kennu, heero be alu ɲen; bawo alu ɲalu be jelo kela, alu tulo dulu be melo kela. 17Tonɲa la, nte b'a fola alu ɲen xo, kila kiika anin Alaɲasilanɲabaxo kiika tunnu b'a fe x'alu la ku jetalu je, bari i man i je; x'alu la xuma metalu me, bari i man i me.» 18«Awa, alu i tulo lo senekela la taliyo xoto la. 19Keso mennu butunta silasenbo fe, wo xoto mu le: Moxo mennu xa Ala la Mansaya xumo lame, nin i man a faamu, Sentane si na xa xumo bo wolu xono. 20Keso mennu butunta kurumadulalu, wo mu moxo lelu ti, mennu be Ala la xumo lamela, wo no bee to, i s'a muta, xa ɲaɲa a la. 21Bari lilli nte i xoto, i la lannaya mu waxatindin ne ti. Nin xoleya nata i ma, walla nin i xa tooro soto Ala la xumo nofe doron, i si lannaya bula. 22Keso mennu butunta ŋaninŋolu to, wolu mu moxo do lelu ti, mennu be Ala la xumo lamela, bari duniya to hanmekuwolu anin naafulo jarabo si i soto. Wo si ke sabaabu ti xa Ala la xumo naxasi, fo a me nafa dun. 23Keso mennu butunta duguxulu beto to, wolu mu moxo do lelu ti, mennu be Ala la xumo lamela, x'a faamu. Wolu be í xo lanfenŋo, mennu xa dinŋo ke. Kunŋo dolu xa kese keme ke, dolu tan wooro, dolu tan saba.» 24Isa xa tali xote fo i ɲen xo: «Ala la Mansaya be le í xo moxo do, men xa si ɲuma sari a la fuuto to. 25Lun do suwo to, moxolu sinnoxoninma, a jaxo do nata bin jaxo sari a la alixaamo ɲala, xa taxa a fan ɲen. 26Lannifenŋo boninma, xa wulu, xa keso ta, bin jaxu in du funtita. 27Fuututigo la jonŋolu nata a fo a ɲen xo: “Marigi, í man si ɲuma le sari í la fuuto to ba? Ɲin bin jaxu in dun bota min?” 28A x'e jaabi xo: “Jaxo do le taxata a sari je.” A la jonŋolu xo a ɲen xo: “Í b'a fe ba n xa taxa bin jaxo bo je?” 29A xo: “Ayi, alu xana bin jaxu in bo, alu xana taxa alixaamajuwolu wutu a fe. 30Alu i tu je, i xa bunɲa i ɲoxo fe fo tegelitumo. Wo lunŋo, ń s'a fo tegelilalu ɲen xo: Alu soxo bin jaxo ma, x'a siti, x'a jani. Wo xo, alu si alixaamo kamari x'a ke ń na buntunŋo xono”.» 31Isa xa taliyo do xote la i ɲen xo: «Ala la Mansaya be le í xo mutaradekeso. Moxo do xa wo lan a la fuuto to. 32A le kesolu xa doxo lannifenŋolu bee ti. Bari nin a falinta, a si bunɲa xa tanbi naaxoxonofenŋolu bee xan. A si ke yirijuwo ti, fo xonolu si ɲaxanŋolu la a bulolu la.» 33Isa xa taliyo do xote la i ɲen xo: «Ala la Mansaya be le í xo farinfuunulanŋo. Muso do x'a ta x'a nin farinŋo kilo muxan nin luulu ɲaxami, fo farinŋo bee fuunuta.» 34Isa xa wo xumolu bee fo moxolu ɲen taliyo lelu to. A tun me fusi fo i ɲen nin taliyolu to nte. 35Wo ɲa ma, kila xa xumo men fo, wo keta xo: «Nte si xuma i ɲen taliyolu to. Kuwo men tunnu be dugunin kabirin duniya da tumo, ń si wolu fo i ɲen.» 36Wo to, Isa bota jama to xa taxa dun bunŋo xono. A la xarandinŋolu x'e sodun a la x'a ŋininxa xo: «Taliyo men lata bin jaxo xan, wo xoto fo n ɲen.» 37Isa x'e jaabi xo: «Men be si ɲuma sarila, wo mu Moxo Dinxe le ti. 38Fuuto, wo mu duniya le ti. Si ɲuma, wo mu mennu sonta Ala la Mansaya ma lelu ti. Bin jaxo, wo mu Sentane dinŋolu ti. 39Jaxo men xa bin jaxo sari fuuto to, wo mu Sentane le ti. Tegelitumo, wo mu duniya labanŋo ti. Tegelilalu, wolu mu melekiyolu ti. 40Bin jaxo be wutula xa fili ta to, x'a jani ɲa men, a be kela wo ɲa kilin in ne ma duniya laban tumo. 41Moxo Dinxe si a la melekiyolu ki. Moxo mennu be i toɲoxolu suyila xa junubo ke, anin mennu be ku jaxo kela, melekiyolu si na wolu bee labo Ala la Mansaya xono, 42x'e fili takenbuba to, xaso nin dafatakinŋo be kela jan men. 43Wo tumo, moxo tilinninŋolu si ŋelenxu i Fa Ala la Mansaya xono í xo tilo. Nin tulu be men ma xa lamelo ke, wo xa lamelo ke! 44«Ala la Mansaya be le í xo naafuluba men be dugunin fuuto to. Xe do x'a je, a x'a todugu. Ɲaɲo bulu, a taxata a kunfenŋo bee fiiri, xa wo fuuto san. 45«Ala la Mansaya be le í xo jaagukela do, men be xononkese betemanŋolu ŋininna. 46A xa xononkese daxolenŋo do je tumo men, a taxata a bulufenŋo bee fiiri, xa wo xononkeso san. 47«Ala la Mansaya be le í xo ɲegemutajala, moxolu be men filila xooxojiyo to xa ɲege ɲasifa bee muta. 48Nin jala fata tumo men, ɲegemutalalu si a saba x'e sigi xanxunda la, xa ɲegolu totonbon. Mennu xa ɲin, i si wolu bula sinsolu xono; mennu man ɲin, i si wolu fili. 49Duniya laban tumo, a be kela wo ɲa kilin in ne ma. Melekiyolu si na xa moxo tilinninŋolu nin moxo jaxolu bo i ɲoxo to, 50xa moxo jaxolu fili takenbuba to, xaso nin dafatakinŋo be kela jan men.» 51Isa x'a la xarandinŋolu ŋininxa xo: «Alu xa ɲin xuma innu bee faamu ba?» I x'a jaabi xo: «Iyo.» 52Isa xo i ɲen xo: «Wo le x'a tu, sariya karanmoxo fen wo fen xaranta Ala la Mansaya la, wo be le í xo lutigo, men be fen kuto nin fen xoto bola a la naafulu maradula.» 53Isa x'é soto wo taliyolu lala tumo men, a bota non. 54A taxaninma a fasuwo la, a tun be moxolu laxaranna i la Alabatusuwo xono, fo i dabaro bee banta, i xo: «A xa ɲin hakilitigiya in soto min? A si ɲin kawaku innu ke no ɲa di? 55A fo yirileesula dinxe le nte ɲin ti? Mariyama le nte a na ti ba? A badinxelu nte Yaxuba nin Yusufu nin Simon anin Yude lelu ti ba? 56A badinmusolu bee nte siginin n kun jan ba? A dun xa ɲin sintigiya in bee soto minto?» 57Wo kuwolu sabaabo la, i man la a la. Isa xo i ɲen xo: «Kila me doxoya dula, nin a fasuwo la nte, anin a la luwo ma.» 58Isa man kawaku kiika ke non, moxolu la lannayabaliya koso.

will be added

X\