MACU 12

1Wo tumo, Isa xa alixaamafuuto dolu tofara tofoɲolunŋo. Xonxo tun b'a la xarandinŋolu la, i woman innu xa kunŋo dolu tege, x'e keso ɲimi. 2Farisiyalu xa wo je tumo men, i xo Isa ɲen xo: «A fele, men nte dagenin tofoɲolunŋo, í la xarandinŋolu be wo kela.» 3Isa x'e jaabi xo: «Wo tumo Dawuda xa men ke, alu man wo xaran ba, tumo men xonxo x'a nin a nofemoxolu muta? 4Buurolu mennu be dila Ala ma sadaxo ti, a dunta Ala la bunŋo xono xa wolu ta, x'e domo. Wolu domo tun nte dagenin ate nin a nofemoxolu ma. I domo tun be dagenin sadaxalasibaxolu doron nelu ma. 5Alu man a xaran sariya to ba xo sadaxalasibaxolu be tofoɲolunŋo sariya tiɲala Alabatusuba baaro la, tofoɲolun wo tofoɲolun, x'a tara i nte jalagila? 6Ń b'a fola alu ɲen xo do be jan, men xa bun Alabatusuba ti. 7Nin alu tun xa Kitaabo la ɲin xuma innu xoto lon xo: “Men xa di ń ɲen, wo mu hinno le ti, marafen sadaxa nte”, alu tunnu me jalagibalolu jalagi. 8Bawo tofoɲolunŋo tigo mu Moxo Dinxe le ti.» 9Isa bota non xa taxa dun i la Alabatusuwo xono. 10Xe bulu saninŋo do tun be je. Farisiya dolu xa Isa ŋininxa xo: «A be dagenin tofoɲolunŋo xa moxo kendeya ba?» I xa wo fo, walasa x'a jalagi. 11Isa xo i ɲen xo: «Moxo joman be alu to nin saaxa kilin doron b'a bulu, wo saaxo xa bula dinxo xono tofoɲolunŋo, nin a me a saba x'a labo. 12Moxo man xole bete saaxo ti ba? Awa, a be dagenin xa ɲuma ke tofoɲolunŋo.» 13Isa woman in xo xe ɲen xo: «Í bulo tosaba!» A x'a bulo tosaba. A woman in bulo kendeyata xa ke í xo a bulu do. 14Farisiyalu bota xa taxa i ɲoxo je Isa faxaɲa xan. 15Isa xa wo lon tumo men, a bota non. Jamaba x'a lo a nofe, a xa wolu bee kendeya. 16Bari a x'a xoleya bete i ma, xo i xana a tu moxolu xa ate lon. 17Wo ɲa ma, Ala xa xumo men dun kila Esayi da, wo keta xo: 18«Ń na baaradinŋo fele, ń xa men sugandi, ń na baato, men na kuwo xa di ń ɲen haali. Ń be ń Niyo lajigila a xan. A si tonɲa silo yita siyalu la. 19A me soosoli ke, a me feten. Moxo si me a fetenxanŋo me bedolu to. 20A me badoxala laninŋo xati, a me lanpa sato faxa, fo tilinninɲa xa sigi dula bee. 21Siyalu bee s'i gigo la a xan.» 22Wo to, moxolu nin xe jinneto do nata Isa bata, men tun mu fiyonto nin muumuwo ti. Isa xa wo kendeya. A x'a damuta xa xuma. A ɲa dulu yeleta. 23Jama bee dabaro banta. I xo: «Ɲin mu Dawuda Mamarinŋo le ti ba?» 24Farisiyalu xa wo me tumo men, i xo: «Ɲin xe in be jinnolu xoyila xa bo moxolu to jinnolu la kuntigo Bilisa le barako la.» 25Isa tun x'e xonokuwo lon; wo to, a xo i ɲen xo: «Mansaya wo mansaya nin a boxo kilinŋo wulita a boxo do xanma, wo mansaya si te. Gallu wo gallu, walla lu wo lu nin a boxo kilinŋo wulita a boxo do xanma, wo gallo walla wo luwo si te. 26Nin Sentane be a fan ta do xoyila, a wulita a fan ne xanma. Awa, a la mansaya si tu siginin ɲa di? 27Nin nte be jinnolu xoyila xa bo moxolu to Bilisa le barako la, ate dunnu la moxolu be jinnolu xoyila jontigi barako la? Wo le x'a tu, itelu fan nelu be a yitala xo boloxo nte alu kun. 28Bari nin nte be jinnolu xoyila Ala Niyo le barako la, wo b'a yitala xo Ala la Mansaya sita alu ma. 29«Moxo joman si dun no xe barakema la luwo xono x'a bulufenŋolu ta, x'a tara a man wo xe barakema siti folo? Nin a xa wo ke le mu, a si a la luwo te. 30Moxo men nte ń ɲin ti, wo tigo mu ń jaxo le ti. Moxo men nte ń deemala xa kamarilo ke, wo be jenjenno le kela. 31Wo le x'a tu, ń b'a fola alu ɲen xo: Junubo ɲasifa bee, anin Ala toxotiɲakuwolu bee si yaafa moxolu ma, bari Ni Senunŋo toxo tiɲalo me yaafa muume. 32Moxo men je xuma jaxo fo Moxo Dinxe ma, yaafo si ke wo tigo ma, bari moxo men je xuma jaxo fo Ni Senunŋo ma, wo tigo me yaafo soto ɲin duniya in to, a me a soto lahara du.» 33Isa xo i ɲen xo: «A xa ke xo yiro do xa ɲin, a dinŋo du si ɲan, walla yiro do man ɲin, a dinŋo du me ɲan; bawo yiro be lonna a dinŋo le ma. 34Fofoonedinŋolu, ate mennu xa jaxu, alu si xuma ɲuma fo no ɲa di? Bawo moxo sondonmo be fanin men na, a da be wo le fola. 35Moxo ɲuma si ku ɲuma labo a sondonme ɲuma la. Moxo jaxo si ku jaxo labo a sondonme jaxo la. 36Ń b'a fola alu ɲen xo: Moxolu je xuma kuntanŋo fen wo fen fo, i si ŋininxa wolu la kiito lunŋo. 37Í la tilinninɲa soto be bola í la xuma fota lelu to, í la jalago du be bola í la xuma fota lelu to.» 38Wo ɲa in, sariya karanmoxo dolu nin Farisiyalu xo Isa ɲen xo: «Karanmoxo, n b'a fe í xa taagumanseedo do yita n na.» 39Isa x'e jaabi xo: «Bi moxo jaxu innu anin moxo banninŋolu be taagumanseedo do ŋininna, bari taagumanseede si me yita i la nin kila Yunusi ta nte. 40Kila Yunusi xa tili saba nin su saba ke ɲegeba xono ɲa men, wo ɲa ma, Moxo Dinxe du be nala tili saba nin su saba kela duguxulo xoto. 41Kiito lunŋo, Niniwengolu si wuli xa bi moxolu jalagi, bawo Niniwengolu nimisita i la junubolu la Yunusi la waajulo koso. Men dun fele, wo xa bun kila Yunusi ti. 42Kiito lunŋo, Worodugu mansamuso si wuli xa bi moxolu jalagi; bawo ate nata xa bo duguxulo danŋo ma, walasa xa mansaxe Sulemani la hakilitigiya xumolu lame. Men dun fele, wo xa bun Sulemani ti. 43«Nin jinno bota moxo do to, a si wula jarolu tobori, tofoɲodula ŋininno la. Bari a me dula soto. 44Wo to, a s'a fo a fan ɲen xo: “Ń be ń koppala ń na bunŋo ma, ń bota jan men.” A koppaninŋo si a tara xo wo bunŋo be toxulunɲanin, a be fitanin, a be tobennin. 45Wo to, a si taxa, xa na jinna woorowula xotelu ti, mennu xa jaxu xa tanbi ate xan. A nin wolu si dun x'e sigi je. Wo moxo labanɲa si jaxuya xa tanbi folo xan. Bi moxo jaxolu ta be nala kela ten ne.» 46Xa Isa tu xumala jama ɲen, a na nin a badinxelu tunnu be lonin banto to, i tunnu b'a fe x'a xumaɲoxoya. 47Moxo do xo a ɲen xo: «Í na nin í badinxelu be lonin banto to, i b'a fe x'e xumaɲoxoya.» 48Isa x'a jaabi xo: «Jon nin jon mu nte na nin ń badinxelu ti?» 49A x'a la xarandinŋolu ɲoomi xo: «Nte na nin ń badinxe lelu fele. 50Moxo men be ń Fa men be sanŋo to sago kela, wo le mu nte badinxe nin ń badinmuso nin ń na ti.»

will be added

X\