MACU 11

1Isa x'é soto a la xarandin tan nin fulo laxaranna wo kuwolu la tumo men, a bota non xa taxa jamano gallubalu to, xa moxolu laxaran, x'e waaju. 2Xa Batiselila Yaya tu kaso la, a xa Kirisita la kebaarolu xibaro me. Wo tumo, a x'a la xarandinŋo dolu ki Isa ma xo: 3«Men xa xan xa na, ite le mu wo ti ba, walla n xa xan xa do xote le laxono?» 4Isa x'e jaabi xo: «Alu be men mela anin alu be men jela, alu taxa wo fo Yaya ɲen: 5“Fiyontolu be ma xa dula je, sin kilinŋolu b'e taxamaxan, bagitolu be senuyaxan, tuluxutiyolu be ma xa melo ke, furelu be kunixan, xibaru Dimanŋo be fola fangantanŋolu ɲen.” 6Moxo men man bo lanin nte la, heero be wo tigo ɲen.» 7Yaya la kiladinŋolu taxaninma, Isa x'a damuta xa xuma jama ɲen Yaya la kuwo to. A xo i ɲen xo: «Alu taxata mun fen mafele wulo xono? Alu taxata badoxala gansanŋo le mafele ba, foɲo be men namaxala? 8Alu dunnu taxata mun fen mafele? Faanubetetigo ba? Bari faanubetedunnalu be mansaxe lelu la luwolu xono. 9Alu dunnu taxata mun ne mafele? Kila do le mu ba? Iyo, kila do le mu. Nte b'a fola alu ɲen xo Yaya xa bun kila ti. 10A be safenin Kitaabo to ate le xan: “Ala xo: Ń fele ń na kiladinŋo kila í ɲa, xa í la silo toben í ɲen.” 11Tonɲa la, nte b'a fola alu ɲen xo: Din man nala dinnalaranŋo to, men xa bun Batiselila Yaya ti. Bari, wo bee nin a ta, Ala la Mansaya xono, moxolu bee to doxomandinŋo xa bun Yaya ti. 12Kabirin Batiselila Yaya la waxato fo bi, Ala la Mansaya be ŋininna barako le la, baraketigo lelu b'e balanna x'a soto. 13Kilalu bee anin kila Musa la sariya xumata Ala la Mansaya xan, fo xa na si Batiselila Yaya la waxato ma. 14Nin alu si son xa la ɲin na: Yaya le mu wo Eli ti, kila men tun na nalixumo fota. 15Tulo be men ma xa lamelo ke, wo xa lamelo ke! 16«Ń si bi moxolu xaaɲan jon ma? I be le í xo dindinŋolu be siginin beralu to x'e ɲoxo kili xo: 17“N xa fule fo alu ma, alu man i don. N xa sanŋabundala donkilo do la, alu man xasi.” 18Bawo Yaya nata, a tun nte domoli kela, a nte minfen minna. Bari a fota a ma xo ma xo: “Jinno le b'a to”. 19Moxo Dinxe nata, a be domolo kela, x'é min, i xo: “Ɲin xe in mu nuxuma nin dolominna le ti. A xanunte mu sagallemutalalu nin junubekela lelu ti.” Bari tonɲa dita Ala la hakilitigiya ma a la kebaarolu fe.» 20Wo tumo, Isa x'a la kawakuwolu kiika ke gallo mennu to, a x'a damuta xa wolu jalagi; bawo wo gallo moxolu man son x'e xodi i la junubolu la. 21A xo: «Korasin gallo moxolu, bone be alu ɲen! Betesayida gallo moxolu, bone be alu ɲen! Bawo kawakuwo mennu keta alu bata, nin wo tunnu keta Tire nin Sidon, biyan x'a tara non moxolu xa faanu kurunŋolu dun, xa bugutixoyo ke i kunŋo la, walasa x'a yita xo i tuubita. 22Wo le x'a tu, ń b'a fola alu ɲen xo kiito lunŋo, alu la tooro si bunɲa xa tanbi Tire nin Sidon ta xan. 23Ite dun Kaperenahun, í la miiro la xo í si xotota ba fo sanxulo ma? Ayi de! Í be majigila le fo lahara. Bawo kawakuwo mennu keta í bata, nin wo tunnu keta Sodome gallo xono, wo gallo tun si tu je fo bi. 24Wo le x'a tu, ń b'a fola alu ɲen xo kiito lunŋo, í la tooro si bunɲa xa tanbi Sodome ta xan.» 25Wo waxato, Isa xa xumo ta xo: «Ń Fa, sanxulo nin duguxulo Marigi, ń be barako bulala í ɲen; bawo í xa ɲin ku innu dugu hakilitigolu nin moxo xaranninŋolu ma, x'e yita dindinŋolu la. 26Ń Fa, a keta ten; bawo wo le diyata í ɲen. 27«Ń Fa xa kuwo bee dun ń bulu. Moxo si man Dinxe lon, fo Fa kilinpe. Moxo si du man Fa lon nin Dinxe kilinpe nte, anin a xa di Dinxe ɲen x'a yita mennu la. 28«Alu na nte ma, atelu mennu bee be segenin alu la dono xoto, nte si lafiya di alu ma. 29Alu ń na suwo ta, ń be men lala alu xanŋo la, x'a tu ń x'alu laxaran; bawo ń be sabarinin, ń be majiginin. Wo ɲa ma, alu si lafiya soto. 30Ń be alu bulala suwo men tala, wo ta man xole; ń na dono xa fe.»

will be added

X\