MACU 10

1Isa x'a la xarandin tan nin fulo kili xa sinŋo di i ma xa jinnolu xoyi xa bo moxolu to, xa jangaruto ɲasifa nin felu bee kendeya. 2Kiladin tan nin fulo toxolu fele: Folo, Simon, nin a be kilila xo Piyere, nin a doxoxe Andere; Sebede dinxelu: Yaxuba nin a doxoxe Yaya; 3Filipe nin Baratelemi; Tomasi nin sagallemutala Macu; Alife dinxe Yaxuba nin Tade; 4Simon, men be kilila xo Seloti, nin Yudasi Isikariyoti men xa Isa janfa. 5Isa x'a la xarandin tan nin fulo ki xa taxa waajulo la, xa ɲin yanmaru innu di i ma xo: «Alu xana taxa siya tolu bata, alu xana dun Samaringo dulu la gallu si xono. 6Alu taxa Banisirayila moxolu bata, wo mennu mu saaxa sankoninŋolu ti. 7Alu taxato xa waajulo ke x'a fo moxolu ɲen xo Ala la Mansaya sutiyata. 8Alu jangarutolu kendeya, xa furelu lakuni, xa bagitolu senuya, xa jinnolu xoyi x'e labo moxolu to. Alu xa men soto Ala la fu, alu wo di moxolu ma fu. 9Alu xana sanu, walla xaalisi, walla xaalisi mesen bula alu kun. 10Alu xana fudi ta taxamo xanma, walla doroke fula, walla samatolu, walla guma. Baarakela nin a la domolo xa xan. 11«Nin alu sita gallu wo gallu to, galluba walla gallu mesendin, alu ŋininxalo ke nin moxo be je, men si alu jigiya a bata. Nin wo moxo sotota, alu tu non fo alu taxatumo xa si. 12Nin alu dunta luwo ma, alu xontonno ke. 13Nin wo luwo moxolu sonta x'alu jigiya, alu la heero si jigi wo luwo moxolu xan, bari nin i man son x'alu jigiya, alu la heero me jigi wo luwo xan. 14Awa, nin lu wo lu moxolu walla gallu wo gallu moxolu man alu jigiya, anin nin i man alu la xumolu lame, alu boto wo luwo walla wo gallo xono, alu si alu sinnabanxo konkon x'a bo alu sinŋolu la. 15Tonɲa la, ń b'a fola alu ɲen xo: Kiito lunŋo, Sodome nin Gomore gallolu la kiito si newoya xa tanbi wo gallo ta xan.» 16«A fele, nte be alu kila í xo saaxolu, warolu temo to. Alu kewuya í xo salu, xa ke jalagibalo ti í xo jenetubanŋo. 17Al'alu fannu korosi hadamadinŋolu ma, bawo i si alu muta xa taxa alu dun kiititegelalu bulu, x'alu buwo gaɲo la i la Alabatusuwolu xono. 18I si taxa alu ti goferenerolu nin mansaxelu ɲa xoto nte la kuwo koso. Wo si ke sabaabu ti, alu xa nte la kuwo seedeya wolu nin siya tolu ɲen. 19Bari nin i taxata alu ti kiititegedula, alu xana hanme alu la xuma foɲa walla alu la xuma fotalu la. Alu xa xan xa men fo, wo si dun alu da wo tumo fan. 20Bawo wo xumolu nte bola alu to, bari alu Fa fan ne be wo xumo dunna alu da a Niyo la. 21Moxo dolu s'i badinŋolu dun bulo to, i xa faxa; fa do dulu si wo ɲoxon ke i dinŋolu la. Dinŋo dolu si wuli i wulubaxolu xanma, x'e dun bulo to, i xa faxa. 22Moxo bee si alu jaxuya nte toxo nofe. Bari moxo men je wo toorolu muɲa lannaya to, fo labanŋo xa si, wo si kisi. 23Nin i x'alu tooro gallo do to, alu i bori xa taxa gallu xote to. Tonɲa la, ń b'a fola alu ɲen xo: Alu me Banisirayila gallolu bee taxama x'e ban, x'a tara Moxo Dinxe man na. 24«xarandinŋo man bun a karanmoxo ti, jonŋo du man bun a marigi ti. 25Xarandinŋo danŋo mu le a xa ke í xo a karanmoxo, jonŋo du danŋo mu le a xa ke í xo a marigi. Nin i xa lutigo kili xo Bilisa, toxo men je la luxonomoxolu la, wo me jaxuya lutigo ta ti ba?» 26«Wo xanma, alu xana sila moxolu ɲa! Fusi nte dugunin nin a me bo keno la. Fusi nte gullo to nin a me lon. 27Ń be men fola alu ɲen dibo to, alu wo fo keneya la. Men je kondikondi alu ɲen, alu wo gangu bunŋolu sanŋo to. 28Mennu si moxo faxa no, bari i me ku tiɲa a niyo ma no, alu xana sila wolu ɲa. Men si a no xa moxo balo nin a niyo halagi jahanaba xono, alu xa xan xa sila wo le ɲa. 29Titine fula nte fiirila kuseeti kilin na ba? Bari wo bee nin a ta, haali kilin me butun dugo ma x'a tara alu Fa Ala man son. 30Haali atelu kunsinolu, i bee jaateninŋo le mu. 31Wo to, alu xana sila. Alu xa fisa titinolu bee ti.» 32«Moxo men je a yita xo a mu nte ta ti moxolu ɲala, nte du s'a yita ń Fa ɲala, men be sanŋo to, xo wo tigo mu nte ta le ti. 33Bari moxo wo moxo je bo nte la, moxolu ɲala, nte du si ń bo wo tigo la ń Fa ɲala, men be sanŋo to.» 34«A xana ke alu ɲala xo ń nata benŋo le ti duguxulo xan. Ayi, ń man na benŋo ti, ń nata kelo le ti. 35Ń nata le xa dinxe nin a fa tala, xa dinmuso nin a na tala, xa bitanmusundinŋo nin bitanmusuba tala. 36Moxo badinŋolu si ke a jaxolu ti. 37Moxo wo moxo be a fa walla a na fe xa tanbi nte xan, wo tigo nin nte man xan. Moxo wo moxo be a dinxe walla a dinmuso fe xa tanbi nte xan, wo tigo nin nte man xan. 38Moxo wo moxo nte a fan gengenyiro tala, x'a lo nte nofe, wo tigo nin nte man xan. 39Moxo men b'a fe x'a niyo kisi, wo si bono a niyo to, bari moxo men je bono a niyo to nte la kuwo xanma, wo niyo si kisi.» 40«Moxo wo moxo je alu jigiya, wo xa nte le jigiya. Men du xa nte jigiya, wo xa ń kibaxo le jigiya. 41Moxo wo moxo je kila do jigiya a la kilaya xanma, kila be baraajo men sotola, wo tigo si wo ɲoxon soto. Moxo men du je Alaɲasilanɲabaxo do jigiya a la Alaɲasilanɲa xanma, Alaɲasilanɲabaxo be baraajo men sotola, wo tigo si wo ɲoxon soto. 42Moxo wo moxo je haali jitafe ɲa kilin jisuma di ɲin dindin innu do ma, x'a la a xan xo nte la xarandinŋo le mu, tonɲa la, ń b'a fola alu ɲen xo wo tigo me bono a la baraajo to.»

will be added

X\