MACU 1

1Isa Kirisita burujuwo fele: Isa bota mansaxe Dawuda to, Dawuda bota Burehima to. 2Burehima xa Nsiyaxa bange, Nsiyaxa xa Yaxuba bange, Yaxuba xa Yuda nin a badinxelu bange. 3Yuda xa Faresi nin Sera bange, wolu na tun mu Tamare le ti. Faresi xa Eseron bange, Eseron xa Arama bange. 4Arama xa Aminadabe bange, Aminadabe xa Nason bange, Nason xa Salumon bange, 5Salumon xa Bowasi bange, wo na tun mu Arahabu le ti. Bowasi xa Yobede bange, wo na tun mu Ruti le ti. Yobede xa Yese bange. 6Yese xa mansaxe Dawuda bange. Mansaxe Dawuda xa mansaxe Sulemani bange, wo na tun mu Uri musu le ti. 7Sulemani xa Robuwamu bange, Robuwamu xa Abiya bange, Abiya xa Asafu bange, 8Asafu xa Yosafati bange, Yosafati xa Yoramu bange, Yoramu xa Osiyasi bange, 9Osiyasi xa Yowatamu bange, Yowatamu xa Asasi bange, Asasi xa Esekiyasi bange. 10Esekiyasi xa Manase bange, Manase xa Amon bange, Amon xa Yosiyasi bange. 11Yosiyasi xa Yekoniya nin a badinxelu bange, Banisirayila dinŋolu mutata xa taxa Babilone tumo men. 12Banisirayila dinŋolu taxaninma Babilone jamano xan, Yekoniya xa Salatiyeli bange, Salatiyeli xa Sorobabeli bange, 13Sorobabeli xa Abiyode bange, Abiyode xa Eliyakime bange, Eliyakime xa Asore bange, 14Asore xa Sadoke bange, Sadoke xa Asime bange, Asime xa Eliyude bange, 15Eliyude xa Eleyasare bange, Eleyasare xa Matan bange, Matan xa Yaxuba bange, 16Yaxuba xa Mariyama xe Yusufu bange, Isa men be kilila xo Kirisita, Mariyama xa wo bange. 17X'a ta Burehima ma fo xa si Dawuda ma, yelemakun tan nin naani le tanbita. Wo xo, x'a ta Dawuda ma fo xa si Banisirayila dinŋolu muta waxato ma xa taxa Babilone jamano xan, yelemakun tan nin naani le tanbita. X'a damuta wo waxato ma fo xa si Kirisita bange tumo ma, yelemakun tan nin naani le tanbita. 18Isa Kirisita la wuluwo naɲa fele: A na Mariyama tun mu Yusufu mamutamuso le ti. Jannin Yusufu x'a lon musu ti, a arajigeta Ni Senunŋo barako to. 19A xe Yusufu tun mu moxo tilinninŋo le ti. A tun nte a fe xa Mariyama toxo tiɲa. Yusufu x'a latege a fan xono x'a futukuwo dabula duguwo to. 20X'a tu í miirila wo ma, Marigi la melekiyo do nata a ma siibo to, x'a fo a ɲen xo: «Yusufu, Dawuda mamarinŋo, í xana sila xa Mariyama ta í musu ti, a arajigeninŋo be dinŋo men na, wo keta Ni Senunŋo le barako to. 21A be nala wulula dinxe la. Í si a toxola xo Isa, bawo a be nala a la moxolu kisila i la junubolu ma.» 22Wo kuwolu bee keta, walasa Marigi xa xumo men dun a la kila da, wo xa ke, 23xo: «Xarafandin xelonbalo si arajige, a si wulu dinxe la, men si toxola xo Emanuyeli», wo toxo xoto xo: «Ala nin ntelu mu». 24Yusufu wulininma sinnoxo to, a xa ɲin ku innu ke í xo Marigi la melekiyo x'a fo a ɲen ɲa men. A xa Mariyama ladun, 25bari ku man dun i nin i ɲoxo te jannin Mariyama xa wulu wo dinxe la. Yusufu xa dinŋo toxola xo Isa.

will be added

X\