LUKA 9

1Isa xa xarandin tan nin fulo kamari xa sinŋo nin fango di i ma xa jinnolu bee xoyi, anin xa jangarutolu kendeya. 2Wo xo, a x'e ki xa taxa Ala la Mansaya kuwo waaju, xa jangarutolu kendeya. 3A xo i ɲen xo: «Alu xana fusi ta taxamo xanma, guma wo, fudi wo, domolifen wo, xaalisi wo, alu nin wolu fen xana taxa. Alu nin doroke fula xana taxa. 4Alu je jatigila soto lu wo lu ma, alu tu non fo alu taxatumo xa si. 5Nin moxolu man alu jigiya dula wo dula, alu bo i la gallo to, x'alu sinnabanxo konkon x'a bo alu sinŋolu la. Wo s'i lasobi.» 6Xarandinŋolu taxata. I sita gallolu bee to, xa xibaru Dimanŋo fo, xa jangarutolu kendeya dula bee. 7Mansaxe Herode xa wo kuwolu bee xibaro me tumo men, a hakilo ɲaxamita, bawo moxo dolu x'a fo xo: «Batiselila Yaya kunita xa bo furelu to.» 8Do xote tunnu b'a fola xo: «Kila Eli le nata.» Do xotelu xo: «Folo kilalu to do le kunita.» 9Bari Herode xo: «Nte xa Yaya kunŋo tege. Ń be ɲin xuma innu bee mela xe men na kuwo to, wo dun mu jon ti?» A tun b'a fe xa Isa je. 10Kiladinŋolu x'e koppa xa na. I xa fen fen ke, i xa wo bee ɲa fo Isa ɲen. A nin i bota non, xa taxa i danna, Betesayida mafan. 11Bari jama xa wo me, i woman innu x'a lo a nofe. Isa x'e kunben, xa Ala la Mansaya xumo fo i ɲen. Men tunnu man kende, a xa wolu kendeya. 12Tilo boyita jigila; wo to xarandin tan nin fulo x'e sodun Isa la x'a fo a ɲen xo: «Jama labula walasa i xa taxa senbetogallolu nin senesuwolu la, nin i si domolo nin jatigila soto, bawo n be wulo le xono jan ti.» 13Bari Isa x'e jaabi xo: «Alu fannu xa domolo di i ma!» I xo: «Buurukun luulu anin ɲegexala fula doron ne be n bulu. Í b'a fe le ba n xa taxa domolo san ɲin jama in bee ɲen?» 14Awa, wulu luulu xeba ɲoxon ne tun be je. Isa xo a la xarandinŋolu ɲen xo: «Alu i tan luulu tan luulu lasigi.» 15Xarandinŋolu x'a ke ten, x'e bee lasigi sigi. 16Isa xa buurukun luulo anin ɲegexala fulo ta, x'a ɲa xotota sanŋo to, xa duwa i ma, x'e tokutun x'e di a la xarandinŋolu ma, xo i x'e tala jama te. 17I bee xa domolo ke x'e fa. Xarandinŋolu xa sinsi tan nin fula fa tokutunŋolu la. 18Lun do, xa Isa tu Alamatara la i danna, a la xarandinŋolu tunnu be a senbo to. A x'e ŋininxa xo: «Moxolu be mun fola ń na kuwo to?» 19I x'a jaabi xo: «Dolu xo x'é mu Batiselila Yaya le ti, dolu xo kila Eli, dolu xo x'é mu folo kilalu to do le ti, men kunita.» 20Isa xo i ɲen xo: «Atelu dunnu b'a fola xo ń mu jon ti?» Piyere x'a jaabi xo: «Í mu Ala la Kirisita le ti.» 21Isa x'a xoleya bete i ma, xo i xana wo fo moxo si ɲen. 22A xo: «Waajibo le mu Moxo Dinxe xa tooro bete; moxobalu nin sadaxalasibaxa kuntigolu nin sariya karanmoxolu x'e ban a to. A si faxa. A sa tili sabo, a si kuni.» 23Wo xo, a xo i bee ɲen xo: «Nin do b'a fe x'a lo nte nofe, wo x'é ban a fan to, x'a fan gengenyiro ta lun wo lun, x'a lo ń nofe. 24Moxo men je a fo xo a b'a fan niyo lakisila, wo si bono a niyo to. Bari moxo men je bono a niyo to nte la kuwo xanma, wo tigo si a niyo lakisi. 25Duniya bee soto si mun ɲan moxo ɲen, nin a be a fan sankola le, walla x'a fan halagi? 26Nin nte nin ń na xumolu je ke maluyaku ti moxo wo moxo bulu, wo tigo du si ke maluyaku ti Moxo Dinxe bulu, a je na a la nooro to lun men, anin a Fa la nooro anin meleke senumanŋolu la nooro. 27Tonɲa la, nte b'a fola alu ɲen xo, moxo dolu be jan, wolu me sa x'a tara i man Ala la Mansaya je.» 28Wo xumo fo xo loxokun ɲoxon, Isa nin Piyere nin Yaya nin Yaxuba taxata kuro xan xa taxa Ala matara. 29Xa Isa tu Alamatara la, a ɲada keɲa mayelemata, a la faanolu xoyiyata fo xa ŋelenxu. 30Ɲakun kilin, xeba fula nata, i nin Isa tun be xumala: Kila Musa nin kila Eli le tunnu mu. 31I x'e yita nooro xono. Isa be nala a la baaro men dafala Yerusaleme, xa sa, i tunnu be xumala wo le xan. 32Piyere nin a kafuɲoxolu tunnu sinnoxobeteta, bari i kunita xa Isa la nooro je, a nin xeba fulo men tunnu nin Isa mu. 33Wo xeba fulo be taxala tumo men xa bo Isa bata, Piyere xo a ɲen xo: «Karanmoxo, alan be jan, wo xa ɲin. Alan xa tillisi saba lo, ite ta mu kilin ti, kila Musa ta kilin, kila Eli ta kilin.» A be men ma x'a fo, a man wo lon. 34X'a tu wo xumo la, xabo do jigita i xan, x'e dugu. Wo xabo jiginxanŋo xa xarandinŋolu lasila. 35Xumaxanŋo do bota wo xabo to xo: «Ɲin mu ń Dinxe le ti, ń xa men sugandi. Alu a lame!» 36Wo xumaxanŋo xo, i man moxo xote je nin Isa kilin nte. Xarandinŋolu x'e de; i xa men je, wo waxato, i man fen fo moxo si ɲen wo kuwo to. 37Wo lun do, i jigita xa bo kuro xan. Jamaba nata Isa kunben. 38Xe do keta a ma xa feten jama to xo: «Karanmoxo, ń b'é matarala, í ɲa lo ń dinxe to, ń dinxe kilinŋo. 39Jinno do b'a mutala. Nin a x'a muta, wo no bee to, a s'a bula fetenna, x'a bula í seregeseregela, xa fuuta labo a da la; wo jinno bo xa xole, a boto s'a tooro bete. 40Ń x'e la xarandinŋolu matara x'e xa jinne in xoyi, bari i korita.» 41Isa xo: «Moxo lannayabalolu anin kukebalikelalu, nte si tu alu bata fo waxati joman, xa muɲa alu xoto? Na í dinxe ti jan.» 42Dindinŋo be sila a ma tumo men, jinno x'a ketu, x'a fili dugo ma, x'a bula í seregeserege xolenna. Isa xa jinno madigaamu, xa dindinŋo kendeya x'a di a fa ma. 43Moxo bee dabaro banta Ala la sintigiyaba xanma. Xa moxolu dabaro tu bannin Isa la ku ketalu bee la, a xo a la xarandinŋolu ɲen xo: 44«Ń be nala men fola alu ɲen, alu i tulo lo bete: Moxo Dinxe be nala dunna moxolu bulu.» 45Bari i man wo xumo faamu. A xoto duguta i ma, walasa i xana a faamu. I tunnu be silanin xa Isa ŋininxa wo kuwo la. 46xarandinŋolu keta a ma x'e ɲoxo masooso, xo i to, jon xa bun i bee ti. 47Isa x'e la miiriya je. A xa dindinŋo do muta x'a lalo a bata. 48A xo i ɲen xo: «Moxo men je ɲin dindin in mutakubete nte la kuwo la, wo xa nte fan ne mutakubete. Moxo men je nte mutakubete, wo xa ń Kibaxo du mutakubete. Alu to doxomandinŋo le mu alu la moxoba ti.» 49Yaya xa xumo ta, a xo a ɲen xo: «Karanmoxo, n xa moxo do je, men be jinnolu ma x'e xoyi í toxo la. Ntelu xo a ɲen xo a xana wo ke, bawo a tun nte n na kafo xono.» 50Isa xo a ɲen xo: «Alu xana a bali xa wo ke, katugala men nte alu jaxu ti, wo mu alu ɲinŋo le ti.» 51Isa tun xa xan xa bo duniya to xa taxa sanŋo to waxato men, wo sutiyaninma, a x'a latege xa taxa Yerusaleme. 52A xa kiladinŋolu bula a ɲa. Wolu taxaninŋo, i dunta Samari gallo do xono, walasa x'a maakuɲanfenŋolu bee toben. 53Bari non moxolu man son a xa jigi i bata, bawo a tun kun be Yerusaleme xan. 54A la xarandinŋolu Yaxuba nin Yaya xa wo je tumo men, i xo: «Marigi, n x'a fo ba xo ta xa jigi xa bo sanŋo to xa ɲinnu halagi?» 55Isa x'é tirimin i mafan x'e madigaamu. 56I woman innu taxata gallu xote to. 57X'e tu silo xan, xe do xo Isa ɲen xo: «Í je taxa dula wo dula, ń s'a lo í nofe.» 58Isa xo a ɲen xo: «Wuwo be kunkuwulolu kun, ɲaxanŋo be xonolu kun, bari dula nte Moxo Dinxe bulu, a s'í tofoɲo jan men.» 59A xo xe do xote ɲen xo: «A lo ń nofe!» Bari wo xe xo a ɲen xo: «Marigi, a tu folo, nte xa taxa ń fa lasi.» 60Isa x'a jaabi xo: «A tu furelu x'e la furelu lasi, ite ken xa taxa Ala la Mansaya xibaro fo.» 61Xe do xote xo tugun xo: «Marigi, ń s'a lo í nofe, bari í lo ń xa taxa ń sara ń na dinbaya la folo.» 62Isa xo a ɲen xo: «Moxo men xa saridabo muta, xa saagi í xo felenin, wo tigo nin Ala la Mansaya man xan.»

will be added

X\