LUKA 8

1Wo xo, Isa taxata galluba nin galluba, anin gallundin nin gallundin, a tun be Ala la Mansaya xibaru Dimanŋo fola xa waajulo ke. A la xarandin tan nin fulo tun b'a bata. 2A tun xa jinnolu xoyi xa bo muso dolu to, x'e la jangarolu kendeya, wo du tunnu b'a bata: Mariyama men kilita xo Magidala Mariyama, jinna woorowula xoyita xa bo men to, 3anin Janne, nin wo mu Susa musu ti, wo mu mansaxe Herode la fankama do le ti, anin Susana nin moxo kiika xotelu mennu bota i bulufenŋolu la xa Isa nin a la xarandinŋolu deema. 4Jamaba bota gallu kiika to, xa na kamari Isa bata. A xa ɲin tali in la i ɲen, a xo: 5«Senekela do bota xa taxa a la siyo sari. X'a tu sarilo la, keso dolu butunta silasenbo fe: Moxolu x'e taxama wolu xan, xonolu nata wolu sokki. 6Keso dolu butunta fataxulo xan: Wolu falinninma, i jata, bawo sumaya tun nte i xoto. 7Keso dolu butunta ŋaninŋolu to: Wolu nin ŋaninŋolu bunɲata i ɲoxo la. Ŋaninŋolu xa wolu muta. 8Dolu butunta duguxulu beto to: Wolu falinta, xa wulu. Kun wo kun xa kese keme ke.» Wo xumo xo, Isa fetenta xo: «Tulo be men ma xa lamelo ke, wo xa lamelo ke!» 9A la xarandinŋolu x'a ŋininxa ɲin tali in xoto la. 10A x'e jaabi xo: «Lonŋo dita ate lelu ma xa Ala la Mansaya gullolu soto. Bari moxo tolu, fen bee be fola wolu ɲen taliyo lelu to, walasa i felelito xana jeli ke, i lamelito xana fen faamu.» 11Isa xo: «Tali in xoto fele: Siyo mu Ala la xumo le ti. 12Keso mennu butunta silasenbo fe, wo xoto fele: Moxo do lelu mu, mennu xa Ala la xumo lame, bari wo xo, Sentane si na xa wo xumo bo i xono, walasa i xana lannaya ke, xa kisi. 13Keso mennu butunta fataxulo xan, wolu mu moxo do lelu ti, mennu be Ala la xumo mutala ɲaɲo to, nin i x'a lame. Bari lilli nte i xoto, i la lannaya mu waxatindin ne ti. Nin i xa xotobolo soto doron, i si lannaya bula. 14Keso mennu butunta ŋaninŋolu to, wolu mu moxo do lelu ti, mennu xa Ala la xumo lame. Bari taxanin ɲa, hanmekuwolu nin naafulukuwo nin ɲin duniya in negefenŋolu si i naxasi, fo i me din moninŋo ke. 15Bari keso mennu butunta duguxulu beto to, wolu mu moxo do lelu ti, mennu xa Ala la xumo lame, x'a muta i jusukunŋo la, soobeya la. Wolu sinsinta Ala la xumo xan, xa dinŋo ke í xo lanfenŋo.» 16Wo xo, Isa xo i ɲen tugun xo: «Moxo si me lanpo lamana xa fe buti a kun na, walla x'a sigi bariyo xoto. Í s'a sigi a sigilanŋo le xan, walasa bugo xono dunbaxolu x'a keneya je. 17Fen wo fen be duguwo to, wo si bo keno xan. Gulle si du nte je nin a me wunjan xa bo keno xan. 18Alu i korosi alu la lameliɲa ma! Bawo fen be men bulu, do si di wo ma; bari fen nte men bulu, haali a miiro to xo dondinŋo men b'a bulu, wo si muta a la.» 19Isa na nin a badinxelu nata a bata, bari i tunnu me a lasoto no jama kun. 20Wo fota Isa ɲen ten xo: «Í na nin í badinxelu be banto to, i b'a fe x'é je.» 21Bari Isa xo jama bee ɲen xo: «Mennu be Ala la xumo lamela x'a latimme, wo lelu mu ń na nin ń badinxelu ti.» 22Lun do, Isa nin a la xarandinŋolu dunta xulunŋo xono. A xo i ɲen xo: «Alan xa taxa dalaba boxo do.» I woman innu taxata. 23X'e tu jiyo xan, Isa sinnoxota. Foɲoba wulita dalaba xan, xa xulunŋo fa jiyo la, fo i nin xulunŋo be ŋinin xa tu. 24Wo to xarandinŋolu x'e sodun Isa la x'a lakuni, x'a fo a ɲen xo: «Karanmoxo, karanmoxo, n je tu de!» Isa wulita xa xuma xolen foɲo nin jixutolu ɲen. Foɲo lota, jiyo x'é mafaxa. 25Isa xo xarandinŋolu ɲen xo: «Alu la lannaya be min?» I silata. I dabaro banninŋo keta a ma x'e ɲoxo ŋininxa xo: «Ɲin xe in dun mu jon ti? Haali a si xuma foɲo nin jiyo ɲen, wolu s'a xumaxanŋo labatu.» 26I sita Gadarangolu la jamano to, men be dalaba boxo do, Galile kuntilinŋo la. 27Isa boninma xulunŋo xono, wo gallo xe do x'a kunben. Jinnolu tunnu be wo xe to. Kabirin tuma jan, a tun nte faanu dunna, a nte lu ma, bari a tun kedula mu xaburufe to le ti. 28A xa Isa je tumo men, a kuleta, x'é boyi a xoto, xa feten xo: «Isa, Ala Xototaninba Dinxe, mun x'é si ń ma? Ń b'é matarala í xana ń tooro.» 29A xa wo xumo fo, bawo Isa tun x'a waajibiya jinno ma xo a xa bo a to. Jinne in tun si wuli a la tuma kiika ti. Nin a tun wulita xe in na, fo nin í x'a bulolu nin a sinŋolu siti negejoloxo la, walasa x'a lamara. Bari a tun si wo sitilanŋolu totege, jinno si taxa a ti wulo xono. 30Isa x'a ŋininxa xo: «Í toxondi?» A x'a jaabi xo: «Jamaba.» Bawo jinne kiika le tun dunta xe in to. 31Wo jinnolu xa Isa matara xo a xana i bula halagilo dinxajironba danjebalo xono. 32Wo x'a tara legooreba tun be non, i be domolo la kuro to. Jinnolu xa Isa matara xo a x'é lo i xa dun wo lelu to. Isa x'e yanmaru wo kela. 33Wo keninma, jinnolu bota xe to xa dun legoore in to. Legoore bee gidita x'e parati kurumalanŋo la, xa jigi dalaba to, xa sa jiyo to. 34Lenegaanilalu xa wo kuwo je tumo men, i x'e bori xa taxa wo laxali gallo nin senesuwolu la. 35Moxolu bota xa taxa wo kuwolu lasaxa. I nata Isa bata, xa xe je, jinnolu bota men to. Xe in tun be siginin Isa senbo to, faanolu b'a ma, a hakilo dafaninŋo. Wo to, moxolu silata. 36Mennu xa wo kuwolu bee je, wolu xa xe jinneto kendeyaɲa laxali moxolu ɲen. 37Wo keninma, Gadarangolu bee x'a ŋinin Isa fe, xo a xa taxa xa bo i la jamano xono, bawo i silata fo xa danmatanbi. Isa dunta xulunŋo xono xa taxa. 38Jinnolu bota xe men to, wo xa Isa matara nin a si tu a bata. Bari Isa x'a lakoppa x'a fo a ɲen xo: 39«Í koppa, í xa taxa í bata. Ala xa men ke í ɲen, í xa wo bee laxali.» Wo to, xe taxata. Isa xa fen wo fen ke a ɲen, a xa wo laxali gallo dula bee. 40Isa x'é koppa xa taxa dalaba boxo do tugun. Jama x'a kunben, bawo bee tun b'a laxononin. 41Xe do nata Isa ma, a toxo xo Jarusi. Alabatusuwo kuntigo le mu. A x'é boyi Isa xoto x'a matara, xo a xa taxa a la luwo ma, 42bawo dinmusu kilinŋo men b'a kun, nin a siyo be san tan nin fula la, wo be ŋinin xa sa. Isa taxato non, jama tun b'a ma x'a digi. 43Muso do tun be je, laada banbalo b'a la kabirin san tan nin fula. A x'a la naafulo bee di jaaralikelalu ma, bari wolu si man a kendeya. 44A x'é sodun Isa la a xo ma, x'é maxa a la dorokexuwo la. Wo no bee to, jelo lota. 45Isa xo: «Jon x'é maxa ń na?» Bee tun b'e son xo itelu nte. Wo to, Piyere xo: «Karanmoxo, jama le b'é xarandanin, anin x'é digi.» 46Isa xo: «Do maxata ń na, bawo ń x'a lon xo sinŋo do bota ń to.» 47Muso x'a je tumo men x'a fo xo a xa men ke, wo me tu no dugunin, a jarajarato nata í boyi Isa xoto, x'a fo jama bee ɲala, kunŋo men x'a tu a x'é maxa a la, anin a kendeyata ɲa men, no kilinŋo to. 48Isa xo a ɲen xo: «Ń dinmusu, í la lannaya x'é kisi. Taxa heero to!» 49Xa Isa tu wo xumo la, do nata xa bo Alabatusuwo kuntigo bata, x'a fo wo ɲen xo: «Í dinmuso sata. Xana karanmoxo sege bitugun!» 50Bari Isa xa wo me tumo men, a xo Alabatusuwo kuntigo ɲen xo: «Í xana sila! Lannaya ke doron! Í dinmuso si balu tugun.» 51Isa sita luwo ma tumo men, a man son a nin moxo xote xa dun non, fo Piyere nin Yaya nin Yaxuba anin dinŋo na nin a fa. 52Bee tun be xasila dindinŋo kunna xa xuure. Isa woman in xo: «Alu xana xasi. Dindinŋo man sa. A be sinnoxonin ne.» 53I jeleta a ma, bawo i x'a lon xo a sata xa ban. 54Isa woman in xa dindinŋo muta a bulo ma, xa feten xo: «Dindinŋo, wuli!» 55A niyo saagita a to, wo no bee to, a wulita. Isa xo, xo i xa domolo di a ma. 56Dindinŋo wulubaxolu dabaro banta. Isa x'a xoleya i ma xo men keta, i xana wo fo moxo ɲen.

will be added

X\