LUKA 7

1Isa x'e soto a la xumo bee la jama ɲen tumo men, a dunta Kaperenahun gallo xono. 2Sorodasi jalatigiba do be je, jonxe do be wo kun, men tun na kuwo xa di a ɲen haali. Wo jonxe tun man kende, a tun be saya dakunŋo to. 3A xa Isa toxome tumo men, a xa Yahudiyalu la moxoba dolu ki Isa ma x'a matara, nin a si na a la jonxe lakendeya. 4Wolu nata Isa bata, x'a matara bete xo: «A nin deemalo xa xan, 5bawo a be n na siya fe, ate le xa n na Alabatusuwo lo.» 6Isa nin i taxata, a sutiyaninma luwo la, sorodasi jalatigiba x'a xanunte dolu ki a ma xo: «Marigi, í fan segekujaxu nte ten, bawo nte nin a man xan í xa dun nte la luwo ma. 7Wo le du x'a tu nin ń xa ń fan jaate xo ń xa doxo í taxanbato ma. Bari xuma kilin fo, ń na jonxe si kendeya. 8Bawo kuntigo dolu be nte kunna, nte du be sorodaso dolu kunna. Ń s'a fo do ɲen xo: “Taxa,” a si taxa. Ń s'a fo do xote ɲen xo: “Na,” a si na. Ń s'a fo ń na jonxe ɲen xo: “Ɲin ke,” a si wo ke.» 9Isa xa sorodasi jalatigiba la xumolu lame tumo men, a dabaro banta. A x'é yelema a nofejama mafan, a xo: «Ń b'a fola alu ɲen xo: Haali Banisirayila xono, ń man ɲin ɲoxon lannaya je moxo la.» 10Sorodasi jalatigiba la kilalu koppaninma, i x'a tara xo jonxe jangaruto kendeyata. 11Wo xo, Isa taxata gallo do to xo Nayin. A nin a la xarandinŋolu nin jamaba taxata i ɲoxo la. 12I be sila wo gallo dunda la tumo men, i nin moxolu benta, fure be i bulu, i be taxanin a lasila. Wo tun mu musujaxe do le dinxe kilinŋo ti. Galluxonomoxolu jamaba tun be wo muso nofe taxanin furelasidula. 13Marigi xa wo muso je tumo men, a hinno x'a muta. A xo muso ɲen xo: «Í xana xasi!» 14A x'é sodun x'é maxa furetalanŋo la. Fure tabaxolu x'e lo. Isa xo: «Xamarindinŋo, ń b'a fola í ɲen xo: Wuli!» 15Fure wulita x'é sigi, xa xuma. Isa x'a di a na ma. 16Moxo bee silata, xa barako bula Ala ɲen. I xo: «Kilaba wulita alan to. Ala nata bo a la moxolu ma.» 17Isa la wo kuwo meta Yude nin a lamininŋo bee to. 18Yaya la xarandinŋolu x'a lalon wo kuwolu bee la. A xa fula kili 19x'e ki Marigi Isa ma, xo i x'a ŋininxa xo: «Kisibaxo men na naxumo fota, ite le mu wo ti ba, walla n xa xan xa do xote le laxono?» 20I sininma Isa ma, i xo: «Batiselila Yaya xa n ki i ma xo, men xa xan xa na, ite le mu ba, walla n xa xan xa do xote le laxono?» 21Wo waxato fan, Isa xa moxo kiika kendeya: Jangarutolu nin dimintolu nin jinnetolu, xa fiyonto kiika ɲa yele. 22A xo i ɲen xo: «Alu xa men je, anin alu xa men me, alu taxa wo fo Yaya ɲen xo: “Fiyontolu be ma xa dula je, sin kilinŋolu b'e taxamaxan, bagitolu be senuyaxan, tuluxutiyolu be ma xa melo ke, furelu be kunixan, xibaru Dimanŋo be fola fangantanŋolu ɲen.” 23Moxo men man sikka nte la kuwo to, heero be wo tigo ɲen.» 24Yaya la kiladinŋolu taxaninma, Isa x'a damuta xa xuma jama ɲen Yaya la kuwo to. A xo i ɲen xo: «Alu taxata mun fen mafele wulo xono? Alu taxata badoxala gansanŋo le mafele ba, foɲo be men namaxala? 25Alu dunnu taxata mun fen mafele? Faanubetetigo ba? Bari faanubetedunnalu, anin mennu be bendiya xono, wolu be sotola mansaxelu la luwo lelu xono. 26Alu dunnu taxata mun ne mafele? Kila do le mu ba? Iyo, kila do le mu. Nte b'a fola alu ɲen, xo Yaya xa bun kila ti. 27A be safenin Kitaabo to ate le la kuwo to xo: Ala xo: “Ń fele ń na kiladinŋo kila í ɲa, xa í la silo toben í ɲen.” 28«Nte b'a fola alu ɲen xo: Din man nala dinnalaranŋo to, men xa bun Batiselila Yaya ti. Bari, wo bee nin a ta, Ala la Mansaya xono, moxolu bee to doxomandinŋo xa bun Yaya ti. 29Jama bee x'a lame tumo men, haali sagallemutalalu, wolu bee xa tilinninɲa saagi Ala ma, xa batise í xo Yaya x'a fo i ɲen ɲa men. 30Bari Farisiyalu nin sariya karanmoxolu x'e ban Ala la ku lategeninŋo to i ɲen, bawo i x'e ban xa batise. 31«Ń si bi moxolu xaaɲan jon ma? I nin munnu xa xan? 32I be le í xo dindinŋolu be siginin bera to, x'e ɲoxo kili xo: “N xa fule fo alu ma, alu man i don. N xa sanŋabundala donkilo do la, alu man xasi.” 33Bawo Batiselila Yaya nata, a tun nte domoli kela, a nte dolo minna. Bari alu xo a ma xo: “Jinno le b'a to.” 34Moxo Dinxe nata, a be domolo kela, x'é min, alu xo: “Ɲin xe in mu nuxuma nin dolominna le ti. A xanunte mu sagallemutalalu nin junubekela lelu ti.” 35Bari moxo mennu bee sonta a ma, a yitata wolu bee fe xo Ala la hakilitigiya be tilinnin.» 36Farisiya do xa Isa kili, xo a xa taxa domolo ke a bata. Isa taxata a la luwo ma xa sigi domolo kunna. 37Musu jado do tun be wo gallo to. A x'a me tumo men xo Isa be domolo la Farisiya bata, a nata kurudaxandin daxolenŋo do ti. Wo be fanin tulu sumadimanŋo la. 38A xasito nata í lo Isa sinŋolu mafan. A xa Isa sinŋolu ɲigin a ɲajiyo la, x'a kunsino ke x'e masuusa, x'e suusu, xa tulu sumadimanŋo bon i xan. 39Farisiya in men xa Isa kili domolo ma xa wo je tumo men, a xo í xonoto xo: «Nin ɲin xe in tun mu kila le ti, ɲin musu in men je maxanin a la, a tun s'a lon a mu men ti. A tun s'a lon xo musu son bete nte.» 40Isa xo: «Simon, xumo do be ń kun x'a fo í ɲen.» Simon x'a jaabi xo: «Karanmoxo, xuma.» 41Isa xo: «Julumandintigo do le, a la julo tun be moxo fula la. A la deɲe xaaliso keme luulu tun be kilin na, tan luulu tun be do la. 42Bari fen tun nte i bulu x'a sara. A woman in x'e fulo bee la julo yaafa. Wolu fulo to, joman s'a xanu bete?» 43Simon x'a jaabi, a xo: «Nte la miiro to, xaalisiba tun be men na, wo le xa xan x'a xanu bete.» Isa xo: «Í xa tonɲa fo!» 44Wo xo, a x'é yelema muso mafan, a xo Simon ɲen xo: «Í ɲa be ɲin musu in na de? Ń dunta í la luwo ma, í man sinmakuji di ń ma, bari ate xa ń sinŋolu ɲigin a ɲajiyo la, x'a kunsino ke x'e suusa. 45Í man ń xonton dasuusuwo la, bari ate, kabirin ń dunta, nin a be ń sinŋolu suusula. 46Í man tulu bon ń kunŋo xan, bari ate xa tulu sumadimanŋo bon ń sinŋolu xan. 47Wo le x'a tu, ń b'a fola í ɲen, xo muso la xanuyaba x'a yita, xo a la junube kiika bee yaafata. Bari dondin yaafata men ma, wo la xanuya xa doxo.» 48Wo xo, a xo muso ɲen xo: «Í la junubolu yaafata.» 49A domoliɲoxolu xo i xonoto xo: «Ɲin mu jon ti nin haali a si junubo dulu yaafa?» 50Isa xo muso ɲen xo: «Í la lannaya x'é kisi: Taxa heero to.»

will be added

X\