LUKA 6

1Tofoɲolunŋo do, Isa xa alixaamafuuto dolu tofara. A la xarandinŋolu xa kunŋo dolu tege x'e moɲonxo i bulo to, x'e keso ɲimi. 2Farisiyalu dolu xo i ɲen xo: «Men nte dagenin tofoɲolunŋo, mun na alu be wo kela?» 3Isa x'e jaabi xo: «Wo tumo, Dawuda xa men ke, alu man wo xaran ba, tumo men, xonxo x'a nin a nofemoxolu muta? 4Xonxo x'a nin a nofemoxolu muta tumo men, a dunta Ala la bunŋo xono. Buuro mennu be dila Ala ma sadaxo ti, a xa wolu ta xa do domo, xa do di a nofemoxo dulu ma. Wolu domo be dagenin sadaxalasibaxolu doron nelu ma.» 5Wo xo, a xo i ɲen xo: «Tofoɲolunŋo tigo mu Moxo Dinxe le ti.» 6Tofoɲolun xote, Isa dunta Alabatusuwo xono xa moxolu laxaran. Xe do tun be je, a kininbulo be sanin. 7Sariya karanmoxolu nin Farisiyalu tunnu be Isa korosinin nin a tun si moxo do kendeya tofoɲolunŋo, walasa i s'a jalagi ɲa men. 8Bari Isa tun x'e la miiriyalu lon, a xo xe bulu saninŋo ɲen xo: «Wuli, í x'é lo jama temo to.» A wulita x'é lo. 9Isa xo i ɲen xo: «Ń be alu ŋininxala nin a be dagenin xa ɲuma le ke tofoɲolunŋo walla jaxumanŋo? A be dagenin xa moxo kisi ba walla x'a faxa?» 10A x'a ɲa laxalan i bee to, wo xo, a xo xe ɲen xo: «Í bulo tosaba.» A x'a bulo tosaba. A woman in bulo kendeyata. 11I diminbeteta, x'e ɲoxo je, i si na men ke Isa la. 12Wo waxato, Isa taxata kuro to, xa Ala matara. A xa suwo bee ban Ala matarala. 13Saxo yeleninma, a x'a la xarandinŋolu kili, xa tan nin fula sugandi i to. A xa wolu kili xo kiladinŋolu. 14Wo kiladinŋolu fele: Simon, a xa wo kili xo Piyere, anin wo doxoxe Andere nin Yaxuba, nin Yaya, nin Filipe, nin Baratelemi, 15nin Macu, nin Tomasi, nin Alife dinxe Yaxuba, nin Simon Seloti, 16nin Yaxuba dinxe Yudasi, anin Yudasi Isikariyoti. Wo le keta Isa janfabaxo ti. 17Isa nin a la xarandinŋolu jigita xa bo kuro to. A x'é lo keneba do xan; a la xarandinŋolu kiika tun be non. Jamaba du tun be je, i bota Yude maro dula bee, anin Yerusaleme nin xooxojida la jamanolu to, nin Tire anin Sidon. 18I nata Isa lame anin walasa i la jangarolu xa kendeya. Jinnolu tunnu be moxo mennu degunin, wolu bee kendeyata. 19Jama moxo bee tun b'a ŋininna x'e maxa Isa la, bawo barako tun be bola a to x'e bee kendeya. 20Wo to, Isa x'a ɲa xotota, x'a la xarandinŋolu mafele, a xo: «Atelu mennu mu fangantanŋolu ti, heero be alu ɲen, bawo Ala la Mansaya mu alelu ta ti. 21Xonxo be ate mennu la saasa, heero be alu ɲen, bawo alu si fa. Ate mennu be xasila saasa, heero be alu ɲen, bawo alu si ɲaɲa. 22«Nin moxolu be alu jaxuyala, x'alu xoyi, x'alu doxoya, x'alu jikuwa Moxo Dinxe la kuwo koso, heero be alu ɲen. 23Alu ɲaɲa x'e don wo lunŋo, bawo baraajiba be alu ɲen sanŋo to. I mamaxe dulu xa kilalu tooro ten ne. 24«Bari atelu naafulubatigolu, bone be alu ɲen, katugala alu x'alu la heero soto xa ban. 25Ate mennu be fanin bi, bone be alu ɲen, katugala alu si xonxo. Ate mennu be jelela saasa, bone be alu ɲen, katugala alu si nitokuwa xa xasi. 26«Bone be alu ɲen, nin bee be alu toxoɲuma le fola, katugala i benbalu xa kila fanolu bunɲa wo ɲa le ma.» 27«Ń namebaxolu, ń b'a fola alu ɲen xo: Al'alu jaxolu xanu, moxo mennu nte alu fe, alu ɲuma ke wolu ɲen. 28Moxo mennu be alu dangala, alu duwa wolu ɲen. Mennu be alu mutakujaxula, alu Ala matara wolu ɲen. 29Nin do x'é te í tulu do to, í si do du yelema a ɲen. Nin do x'é la dorokeba muta í la, í xana a bali í la dorokexotobulo du ti. 30Moxo wo moxo x'é tara, wo so. Nin moxo do x'é bulufenŋo do ta, xana a maŋininxa a la. 31Alu b'a fe moxolu xa men ke alu ɲen, alu dulu xa wo ɲoxon ke i ɲen. 32«Nin alu be alu xanubaxolu doronnu xanula, alu si tantu wo la ba? Haali Alaɲasilanɲabalolu, ń xo i b'e xanubaxolu xanula. 33Mennu be ku beto kela alu ɲen, nin alu be ku beto kela wolu doronnu ɲen, alu si tantu wo la ba? Haali Alaɲasilanɲabalolu, ń xo i be wo ɲoxon kela. 34Nin alu be julo dunna moxolu doronnu la, alu yilo b'a ma mennu si alu sara no, alu si tantu wo la ba? Haali Alaɲasilanɲabalolu si julo dun Alaɲasilanɲabalolu la, i yilo be mennu la saralo ma. 35Al'alu jaxolu xanu, xa ku ɲuma ke, alu julo dun x'é hakilo bo a saralo ma. Baraajiba si ke alu ɲen, anin alu si ke Ala Xototaninba dinŋolu ti, katugala ate xa bete kuɲumalonbalolu nin moxo jaxolu ma. 36Alu hinna, a be í xo alu Fa Ala si hinna ɲa men.» 37«Alu xana kiiti tege moxo xan, kiiti me tege alu dulu xan. Alu xana moxo jalagi, alu dulu me jalagi. Alu yaafa, yaafo si ke alu dulu ma. 38Alu moxolu so, alu dulu si so. Badan butunninŋo, fo xa bon a da la, wo si yelema alu kun; x'a la a xan alu be tolu ta sumanna sumannilanŋo men na, alu dulu ta si suman wo la.» 39Isa xa ɲin sanda in du fo i ɲen, a xo: «Fiyonto si fiyonto la guma saba no ba? Nin wo keta, i bee me bula dinxo xono ba? 40xarandinŋo man bun a karanmoxo ti. Bari nin xarandinŋo xaranbeteta, a si ke í xo a karanmoxo. 41«Mun na dokkondinŋo men be í badinŋo ɲa to, í be í ɲa lola wo to, x'a tara salo men be í fan ɲa to, í ɲa nte wo la? 42Í s'a fo no ɲa di í badinŋo ɲen xo: “Ń badinŋo, í lo, dokkondinŋo men be í ɲa to, ń xa wo bo je,” ite men ɲa nte salo la í fan ɲa to? Fulankafu in, salo bo í fan ɲa to folo. Nin wo keta, í si jelo ke a ɲa ma, xa dokkondinŋo bo í badinŋo ɲa to.» 43«Yiri ɲuma me din ke no, men man ɲin. Yiro du men man ɲin, wo me din ɲuma ke no. 44Yiro bee be lonna a dinŋo le ma: Turodinŋo me xati ŋaninjuwo la; resen moninŋo me xati ɲogonsaase la. 45Moxo ɲuma si ku ɲuma labo a sondonme ɲuma la. Moxo jaxo si ku jaxo labo a sondonme jaxo la, bawo moxo sondonmo be fanin men na, a da be wo le fola.» 46«Mun na alu be ń kilila xo: “Marigi, Marigi”, x'a tara ń be men fola alu ɲen, alu nte wo kela? 47Moxo men je na nte ma, xa ń na xumolu lame, x'e ke, a nin men xa xan, ń si wo fo alu ɲen: 48A be le í xo bunlola do, a xa duguxulo jaga, x'a jaga, x'a la bunŋo jusigi fataxulo xan, xa bunŋo lo wo xan. Waamo nata, xa woyo ke wo bunŋo xan, bari a man boyi, bawo a tun be lonin bete. 49Bari nin moxo men be nte la xumo lamela, nin a nt'a kela, a nin men be bonin, ń si wo du fo alu ɲen: A be le í xo moxo do, men x'a la bunŋo lo duguxulo xan. A man jusigilan ke a xoto. Woyo nata a xan, wo no bee to, a boyita guran. Wo bunŋo boyiɲa laxasayata kujaxu.»

will be added

X\