LUKA 5

1Lun do, Isa tun be lonin Genesareti dalaba da la. Jama tun be i ɲoxo digila Ala la xumo lamelo nofe. 2A xa xulun fula je danxanŋo la. Ɲegemutalalu tunnu bota wolu xono x'e la jalalu ku. 3Isa dunta xulunŋo do xono, wo xuluntigo toxo xo Simon. A x'a ŋinin Simon fe xo a nin xulunŋo x'é soobo dandanŋo la dondin. Wo xo, a x'é sigi xulunŋo xono xa jama laxaran. 4A x'é soto xumo la tumo men, a xo Simon ɲen xo: «Í nin xulunŋo xa taxa dinoya to, x'alu la jalalu fayi.» 5Simon x'a jaabi xo: «Karanmoxo, n xa suwo bee ban, n man fen muta. Bari í la xumo xan, ń si jala fayi.» 6I xa jalalu fayi, i xa ɲege kiika muta, fo i la jalalu boyita farala. 7I x'e bulo fayi i toɲoxolu ma xulun do xono, xo wolu xa na i deema. Wolu nata i deema, xa xulun fulo lafa ɲego la, fo xulunŋolu be ŋinin xa dun jiyo xoto. 8Simon Piyere xa wo je tumo men, a x'é ɲongi Isa xoto x'a fo a ɲen xo: «Marigi, í soobo nte la, bawo nte mu junubeto le ti.» 9I xa ɲege kiika men muta, Simon nin a toɲoxolu bee silata wo la. 10Simon kafuɲoxolu, nin wolu mu Sebede dinxelu ti, Yaxuba nin Yaya, wolu dulu silata. Isa xo Simon ɲen xo: «Simon, í xana sila. Silan, í be moxo lelu ŋininna x'e lasi Ala ma.» 11I nata i la xulunŋolu bula danŋo la, xa kuwo bee bula, x'a lo Isa nofe. 12Xa Isa tu gallo do to, xe do tun be je, bago bota a balo bee ma. A xa Isa je tumo men, a x'é fili dugo ma a ɲada xan, x'a matara xo: «Marigi, nin a xa di í ɲen, í si sin no xa nte kendeya, anin xa ń senuya.» 13Isa x'a bulo tosaba x'é maxa a la. A xo: «A diyata ń ɲen, senuya!» Wo no bee to, bago x'a bula. 14Isa x'a xoleya a ma xo: «Í xana fen fo moxo si ɲen, bari taxa í yita sadaxalasibaxo la. Kila Musa xa sadaxo men waajibiya, wo bo, men s'a yita i la xo í senuyata.» 15Wo bee nin a ta, Isa toxo bota xa taxa a fe. Jamaba tun be kamarila a bata x'a lame, anin, nin i la jangarolu si kendeya. 16Bari Isa kilin tun be tula xa taxa wulo xono, xa Ala matara. 17Lun do, Isa tun be laxaranno la. Farisiya dolu nin sariya karanmoxolu tunnu be siginin a bata, xa bo Galile nin Yude gallolu bee to anin Yerusaleme. Marigi la sintigiya tun be Isa to. A tun b'a ma xa moxolu kendeya. 18Wo to, moxo dolu nata xe muruxunte do ti, a be lanin laranŋo to. I x'a ŋinin x'a ladun bilo xono, x'a lala Isa ɲa xoto. 19I korita a ladunna jama kun tumo men, i yeleta bilo sanŋo to, xa dula do lawuli, x'a nin a la laranŋo lajigi wo dula fe, x'a lala jama temo to, Isa ɲa xoto. 20Isa xa wo moxolu la lannaya je tumo men, a xo xe muruxunte ɲen xo: «Xe, í la junubolu yaafata.» 21Sariya karanmoxolu anin Farisiyalu x'a fo i xonoto xo: «Ɲin xe in mu jon ti, nin a be Ala toxo tiɲala ten? Jon si junubolu yaafa no, nin Ala kilin nte?» 22Isa xa i la miiriya lon, a xo i ɲen xo: «Mun na alu be ɲin miiriya in tala alu jusukunŋo la? 23X'a fo: “Í la junubolu yaafata”, walla: “Wuli, í x'é taxama.” Wo xuma fulo to, joman fo xa di? 24Bari ń b'a fe le alu x'a lon xo a sinŋo be Moxo Dinxe ɲen xa junubolu yaafa duguxulo xan». Wo to, a xo muruxunte ɲen xo: «Ń x'é yanmaru, wuli, í x'é la laranŋo ta, xa taxa í bata!» 25Wo no to, a wulita i bee ɲala, x'a la laranŋo ta, xa taxa a bata. A tun b'a ma xa barako bula Ala ɲen. 26I bee dabaro banta, i keta a ma xa barako bula Ala ɲen. I silata, i xo: «N xa dabariban kuwolu je bi.» 27Wo tanbo xo, Isa bota je, a xa sagallemutala do je, wo toxo xo Lewi, a be siginin a la baaradula. Isa xo a ɲen xo: «A lo ń nofe.» 28Lewi wulita xa kuwo bee bula, x'a lo a nofe. 29Wo xo, Lewi xa domoliba dara a ɲen a la luwo ma. Sagallemutala kiika nin moxo xotelu nin i xa domolo ke. 30Farisiyalu nin i la sariya karanmoxolu kiika ŋuunuŋuunuta; i xo Isa la xarandinŋolu ɲen xo: «Mun na alu nin sagallemutalalu nin kujaxukelalu be domolo nin minno kela i ɲoxo fe?» 31Isa x'e jaabi xo: «Moxo kendolu maaku nte dogotooro la, jangaruto lelu maakuwo b'a la. 32Moxo mennu be i fannu jaatenin moxo tilinninŋolu ti, nte man na wolu kili; nte nata junubeto lelu kili, xo i x'e xodi i la junubolu la.» 33Moxo dolu xo Isa ɲen xo: «Yaya la xarandinŋolu be sunna kiika ti, xa Ala matara, anin Farisiyalu la xarandinŋolu; bari ite la xarandinŋolu kennu be domolo kela, x'e min.» 34Isa x'e jaabi xo: «Alu hakilo la x'alu s'a no ba xa maaɲoxe toɲoxolu bali domolo kela, x'e nin maaɲoxe tu i ɲoxo fe? Ayi, alu me wo no! 35Bari lunŋo si na, maaɲoxe si buusi i la, nin wo lunŋolu sita, i si sun.» 36Isa xa ɲin tali in du fo i ɲen xo: «Moxo si me do fara faanu kuto la, x'é be wo beterela faanu xoto ma. Nin wo keta, faanu kuto faraninŋo si tu, faanuxonokutun kuto du me na ben faanu xoto ma. 37Moxo me resenji kuto ke sumalle xotolu to. Nin wo keta, resenji kuto kumuto si fuunu, xa sumalle xotolu te, xa bon. Sumallolu si tiɲa. 38Bari resenji kuto kedula mu sumalle kuto lelu ti. 39Moxo si du nte resenji kuto fe, xotomanŋo minŋo xo, katugala a s'a fo xo: “Xotomanŋo le xa ɲin.” »

will be added

X\