LUKA 4

1Isa faninŋo Ala Ni Senunŋo la, a bota Yuruden bada la. Ni Senunŋo taxata a ti wulo xono. 2Sentane x'a xotobo tan naani tili xono. Wo waxato, a man fusi domo. Wo tilolu tanbininma, xonxo x'a muta. 3Wo to, Sentane xo a ɲen xo: «Nin í mu Ala Dinxe le ti, a fo ɲin kuru in xa yelema xa ke buuro ti.» 4Isa x'a jaabi xo: «A be safenin Kitaabo to xo: “Moxo nte balula domolifenŋo doron na.” » 5Sentane taxata a ti sanŋo to, xa duniya jamanolu bee yita a la nondin kilin to. 6A xo a ɲen xo: «Ń si ɲin jamanu innu bee kuntigiya nin i naafulo di í ma, bawo wolu dunta nte bulu le; a xa di ń ɲen x'e di men ma, ń s'i di wo ma. 7Nin í x'é ɲongi ń xoto xa ń batu, i bee si ke í ta ti.» 8Isa x'a jaabi xo: «A be safenin Kitaabo to xo: “Í si Marigi í la Ala batu, xa baaro ke ate kilin doron ɲen.” » 9Sentane bulata a ɲa tugun, xa taxa a ti Yerusaleme, x'a lalo Alabatusuba sanŋo to, x'a fo a ɲen xo: «Nin í mu Ala Dinxe le ti, í tu jan x'é butun dugo ma xo, 10bawo a be safenin Kitaabo to xo: “Ala si a la melekiyolu bula í lakantala. 11I s'í ta i bulolu to, í sinŋo me xosi kuru la.” » 12Isa x'a jaabi xo: «A fota Kitaabo xono xo: “Í xana Marigi í la Ala xotobo.” » 13Sentane x'a xotobo xa ban tumo men, a x'é soobo a la fo waxati xote. 14Isa x'é xolasaagi Galile ma, a nin Ni Senunŋo barako. A toxo bota jamano dula bee. 15A tun be moxolu laxaranna i la Alabatusuwolu xono. Bee tun b'a bunɲala. 16Wo xo, Isa taxata Nasareti, a bunɲata gallo men to. Tofoɲolunŋo, a dunta Alabatusuwo xono í xo a dalita x'a ke ɲa men. A wulita x'é lo kitaabuxaranŋo xanma. 17I xa kila Esayi la kitaabo dun a bulu. A x'a dayele, xa dula do je x'a xaran. A safeta wo dula xo: 18«Marigi Niyo be ń fe, bawo a xa nte sugandi nin ń si xibaru Dimanŋo fo segebaxantunŋolu ɲen, xa kasolamoxolu hooroyalixumo fo. A xa ń ki xa fiyontolu ɲalu yele, xa toorobaxatolu bo i toorobaxolu bulu, 19xa Marigi la neemasanŋo gangu.» 20Wo xo, a xa kitaabo dataxun, x'a dun baaradinŋo bulu, x'é sigi. Alabatusuwo xono moxolu bee ɲa tuta lonin a to. 21Wo to, Isa xo i ɲen xo: «Alu birin bola Kitaabo xumo men namela, wo dafata bi, alu x'a lame tumo men.» 22Bee tun be Isa la ɲumaya fola. Xuma ɲuma men tunnu be bola a da, wo xa bee dabaro ban. I xo: «Ɲin nte Yusufu dinŋo ti ba?» 23A xo i ɲen xo: «Ń x'a lon pere, xo alu si ɲin sanda in fo ń ɲen xo: “Jaaralikela x'a fan jaara folo. Í xa fen fen ke Kaperenahun, n xa wo bee me; jan men mu í fasuwo ti, wo ɲoxonnu ke jan du.” » 24A xo i ɲen tugun xo: «Tonɲa la, ń b'a fola alu ɲen xo kila si me bunɲa soto a fasuwo la. 25Xa tonɲa fo alu ɲen, musujaxe tun xa sa Banisirayila kila Eli la waxato. Wo tumo le, sanjiyo xa san saba nin xaru wooro ke, a man na; xonxoba nata jamano bee xono. 26Bari Eli man ki wo musujaxelu fen si ma. A kita Sarepeta musujaxe do le ma. Sarepeta, wo be Sidon jamano le xono. 27Bagito tun xa sa Banisirayila kila Elise la waxato; bari fusi man kendeya wolu to fo jamanu xote moxo do, nin wo mu Siringa Naman ti.» 28Alabatusuwo xono moxolu xa wo xumolu me tumo men, i bee juso bota. 29I wulita, xa Isa labo gallo xo ma. I la gallo be siginin kuro men sanŋo to, i taxata a ti wo malanŋo da la, xo i b'a laparatila non na. 30Bari Isa bota i te la xa taxa. 31Isa taxata Galile gallo do to xo Kaperenahun. A tun si moxolu laxaran Yahudiyalu la tofoɲolunŋo. 32A la xaranŋo x'e dabaro ban, bawo barako tun be ate la xumolu to. 33Xe jinneto do tun be Alabatusuwo xono. Wo fetenbeteta xo: 34«Heyi, Nasareti Isa, mun x'é si n ma? Í nata n halagi le ba? Ń x'a lon pere xo í mu Ala la Senumanŋo le ti.» 35Isa x'a madigaamu xo: «A sukki a la, í xa bo ɲin xe in to.» Jinno x'a laboyi jama to, wo xo, a bota a to. Bari a man fusi ke a la. 36Moxolu bee dabaro banta. I tunnu be i ɲoxo ŋininxala xo: «Mun xuma mu ɲin ti? A be xumala jinnolu ɲen barako nin sintigiya to, i be bola moxolu to.» 37A toxo bota jamano bee xono. 38Isa boninma Alabatusuwo xono, a taxata Simon na luwo ma. Xandi fatin tun be Simon bitanmusu la. I x'a ŋinin Isa fe xo a xa a deema. 39A x'é jimi a kunna, xa xuma xolen xando ɲen. Xando fatata a ma. Wo no bee to, a wulita x'e haajolu ke. 40Tilo boyo xo, moxolu nata i la jangarutolu bee ti a bata. A x'a bulolu la i bee kilin kilin xan, x'e kendeya. 41Jinnolu fetento bota moxo kiika to. I x'a fo xo: «Í mu Ala Dinxe le ti.» Bari a xa wolu madigaamu. A man son i xa xuma, bawo wolu x'a lon xo a mu Kirisita le ti. 42Saxo yeleninma, Isa bota xa taxa wulo xono. Jama wulita a ŋininno la. I x'a je tumo men, i tunnu b'a fe x'a tomuta, walasa a xana bo i bata. 43Bari Isa xo i ɲen xo: «Ń xa xan xa Ala la Mansaya xibaru Dimanŋo waaju gallu to dulu to; bawo Ala xa ń ki wo le la.» 44A taxata Yude maro xono xa waajulo ke i la Alabatusuwolu xono.

will be added

X\