LUKA 3

1Rome mansaxe Tibere la mansaya san tan nin luulunanŋo le tun mu, Ponsi Pilate tun be Yude goferenereya la. Wo waxati kilinŋo xa Herode tara Galile kunna; a badinxe Filipe, wo be Iture nin Terakonite jamano kunna; Lisaniyasi, wo tun be Abilene kunna. 2Ane nin Kayife le tunnu be sadaxalasibaxa kuntigiya la wo tumo. Wo waxato, Ala la xumo sita Sakariya dinxe Yaya ma, x'a tu wulo xono. 3Yaya taxata Yuruden basenbo jamano bee to, xa moxolu waaju xo i x'e xodi i la junubolu la, xa batise, nin i la junubolu si yaafa. 4Ɲin tun safeta kila Esayi la kitaabo to xo: «Moxo do fetenxanŋo si bo wulo xono x'a fo xo: Alu Marigi la silo toben, x'a la sila mesenŋolu latilin. 5Xonoonolu bee si lafa, kurolu nin tintolu bee si majigi. Sila dogininŋolu si latilin. Dula jaxolu si toben. 6Hadamadinŋolu bee si Ala la kisilo je.» 7Jama men tunnu be naxan Yaya ma xa batise, a tun b'a fola wolu ɲen xo: «Fofoonedinŋolu, jon x'a yita alu la, alu si kisi ɲa men Ala la diminŋo ma, men be nanin? 8Alu kewalolu ke mennu s'a yita xo alu tuubita. Alu xana a fo i xono to xo: “N mu Burehima mamarinŋolu ti.” Ń b'a fola alu ɲen, xo Ala si sin no xa ɲin kuru innu yelema x'e ke Burehima bonsonŋolu ti. 9Ŋendo tata yirolu lillo tego xanma xa ban. Yiri wo yiri nte din ɲuma kela, wo si tege xa fili ta to.» 10Jama tun be Yaya ŋininxala, xo i xa xan xa mun ke. 11A x'e jaabi xo: «Doroke fula be men kun, wo xa kilin di feetoto ma. Baluwo be men kun, wo xa do di xonxoto ma.» 12Sagallemutalalu dulu nata xa batise. I xo Yaya ɲen xo: «Karanmoxo, ntelu xa xan xa mun ke?» 13A x'e jaabi xo: «Alu xana fen muta moxo la xa tanbi sariya xan.» 14Sorodaso do dulu x'a ŋininxa xo: «Nte dunnu xa xan xa mun ke?» A x'e jaabi xo: «Alu xana moxo diyakuwa x'a la xaaliso muta a la. Alu xana xaro la moxo la. Alu muta ke alu la sara ti.» 15Jama ken tun nin a be siginin, xo kuba do be kela, i bee b'e miirila nin Yaya me tara Kirisita ti. 16Yaya x'e bee kafuninŋo jaabi, a xo: «Nte ken be alu batisela jiyo le la; bari do be nala, men barako xa bun nte ti. Haali x'a la samatolu firin, nte nin wo man xan. Ate si alu batise Ala Ni Senunŋo nin ta la. 17A la ɲosurundulanŋo b'a bulu, x'a la ɲo surundu. A si a keso ke a la kurukuro xono, bari ŋaɲa, a si ta sabalo ke xa wo jani.» 18Yaya xa xuma xote kiika fo moxolu ɲen x'e tonben, xa Ala la xibaru Dimanŋo fo i ɲen. 19Mansaxe Herode x'a badinxe musu Herodiya muta a la. Yaya x'a jalagi wo to, anin a tun xa kujaxu kiika xote men dulu ke. 20Herode xa kujaxu xote kafu wolu ma, a xa Yaya bula kaso la. 21Moxolu bee batiseta tumo men, Isa du batiseta. X'a tu Ala matarala, sanxulo dayeleta, 22Ni Senunŋo balama jigita a xan í xo jenetubanŋo. Xumaxanŋo do bota sanŋo to xo: «Í mu ń Dinxe baato le ti, í la kuwo xa di bete nte ɲen.» 23Isa b'a la baaro damutala waxato men, a siyo tun be taxala tan saba san ma. Moxolu x'a jaate Yusufu dinxe ti, Yusufu bota Yeli to, 24Yeli bota Matati to, Matati bota Lewi to, Lewi bota Melesi to, Melesi bota Yanayin to, Yanayin bota Yusufu to, 25Yusufu bota Matitiya to, Matitiya bota Amosi to, Amosi bota Nahumu to, Nahumu bota Esili to, Esili bota Nagayi to, 26Nagayi bota Mate to, Mate bota Matitiya to, Matitiya bota Semeyin to, Semeyin bota Yoseki to, Yoseki bota Yoda to, 27Yoda bota Yokanan to, Yokanan bota Resa to, Resa bota Sorobabeli to, Sorobabeli bota Salatiyeli to, Salatiyeli bota Neri to, 28Neri bota Melesi to, Melesi bota Adi to, Adi bota Kosame to, Kosame bota Elimadame to, Elimadame bota Ere to, 29Ere bota Yosuwe to, Yosuwe bota Eliyesere to, Eliyesere bota Yorime to, Yorime bota Matati to, Matati bota Lewi to, 30Lewi bota Simeyon to, Simeyon bota Yuda to, Yuda bota Yusufu to, Yusufu bota Yoname to, Yoname bota Eliyakime to, 31Eliyakime bota Meleya to, Meleya bota Menna to, Menna bota Matata to, Matata bota Natan to, Natan bota Dawuda to, 32Dawuda bota Yese to, Yese bota Yobede to, Yobede bota Bowasi to, Bowasi bota Sala to, Sala bota Nason to, 33Nason bota Aminadabe to, Aminadabe bota Ademine to, Ademine bota Rami to, Rami bota Eseron to, Eseron bota Faresi to, Faresi bota Yuda to, 34Yuda bota Yaxuba to, Yaxuba bota Nsiyaxa to, Nsiyaxa bota Burehima to, Burehima bota Tara to, Tara bota Nasoro to, 35Nasoro bota Seruse to, Seruse bota Rehu to, Rehu bota Pelegi to, Pelegi bota Ebere to, Ebere bota Sala to, 36Sala bota Kenan to, Kenan bota Arafakisade to, Arafakisade bota Semu to, Semu bota Nuhun to, Nuhun bota Lameke to, 37Lameke bota Metusela to, Metusela bota Enoke to, Enoke bota Yerede to, Yerede bota Mahalaleli to, Mahalaleli bota Kenan to, 38Kenan bota Enose to, Enose bota Seti to, Seti bota Adama to, Adama bota Ala to.

will be added

X\