LUKA 24

1Alahado, saxo ma junna, musolu taxata xaburo da la, i nin sumadiyalu, i xa mennu dara. 2I x'a tara xo kuro birigintinta xa bo xaburo da la. 3I dunta xaburo xono, bari i man Marigi Isa fure je. 4X'e hakilo ɲaxamininŋo tu wo kuwo la, xe fula x'e lo i senbo to, i la faanolu be ŋelenxula. 5I silata x'e kunŋo buti dugo ma. Wo to, wo xelu xo i ɲen xo: «Mun na alu be nilama ŋininna furelu to? 6A nte jan, a kunita xa bo furelu to. A xa men fo alu ɲen x'a tu Galile, al'alu hakilo lajigi wo la. 7A tun x'a fo xo: “Waajibo le mu, Moxo Dinxe xa dun junubekelalu bulu, xa gengen yiro ma, xa sa, xa kuni xa bo furelu to, a sa tili sabo.” » 8Wo keninma, i hakilo jigita Isa la xumolu la. 9I bota xaburuda la, xa taxa wo kuwolu bee laxali xarandin tan nin kilinŋo nin tolu bee ɲen. 10Magidala Mariyama nin Janne nin Yaxuba na Mariyama le tunnu mu. Wolu nin musu tolu men tunnu mu, wo dulu xa wo ku kilinŋo lelu laxali Isa la kiladinŋolu ɲen. 11Bari musolu xa men fo, kiladinŋolu xa wolu mafele xuma xalantanŋo lelu ti. I man la i la. 12Bari Piyere ken wulita, x'é bori xa taxa xaburuda la. A x'é majigi, a man fen xote je fo lenfaano doron, men keta kasanke ti. Wo xo, a x'é koppa xa taxa a bata, a dabaro tun be bannin wo ku keninŋolu to. 13Wo lunŋo fan, xarandin moxo fula tun be taxanin gallo do to xo Emayusi. Non nin Yerusaleme te si kilometere tan nin fula ɲoxon bo. 14Kuwo mennu bee keta, i tunnu be xiidefatala wolu xan. 15X'e tu xumo la, Isa fan x'é sodun i la, a nin i xa taxa i ɲoxo fe. 16I tunnu ɲa b'a la, bari a keta í xo fen do tun b'e balinin x'a lon. 17Isa x'e ŋininxa xo: «Alu taxamato be mun fola i ɲoxo ɲen?» I ɲatositininŋo x'e lo. 18I to do, nin wo mu Kilewopasi ti, wo xo a ɲen xo: «Kuwo mennu keta Yerusaleme ɲin waxati laban in, ite kilin ne keta je nin í man wolu lon de?» 19A xo i ɲen xo: «Wolu mu ku jomannu ti?» I x'a jaabi xo: «Men keta Nasareti Isa la dun! Kila barakeninŋo le tun mu. A xa wo yita a la kebaarolu nin a la xumolu la, Ala nin moxolu bee ɲala. 20N na sadaxalasibaxa kuntigolu nin n na ɲamoxolu x'a dun bulo to, walasa xa kiito tege a xan, xo a nin faxalo xa xan, x'a gengen yiro ma. 21N tunnu yilo b'a ma xo ate le be Banisirayila bola bulo to. Ɲin ku in dunnu ko tili sabananŋo le mu bi ti. 22Wo bee nin a ta, n na muso dolu xa n dabaro ban. I tunnu taxata xaburuda la saxo ma junna. 23I man a fure tara je tumo men, i nata x'a fo xo melekiyo dolu x'e yita i la x'a fo i ɲen xo a nilama mu. 24N kafuɲoxo dolu taxata xaburuda la. Musolu x'a fo ɲa men, i x'a tara ten. Bari i man a fan je.» 25Wo to, Isa x'a fo i ɲen xo: «Moxo hakilintanŋolu, alu kennu nte lala kilalu la xumolu la junna. 26Waajibo tun nte ba, Kirisita xa tooro ten folo, jannin a xa dun a la nooro xono?» 27Wo xo, men safeta a la kuwo to Kitaabo muume xono, a xa wo ɲa fo i ɲen. A x'a damuta Musa la kitaabolu ma, xa taxa ɲa kilalu bee la kitaabolu la. 28I sutiyaninŋo i taxadula la, Isa x'a ke í xo nin a be taxala ɲa le. 29Bari i x'a matara xo: «Tu n bata jan! Tilo jigita, suwo je ku!» A woman in dunta, xa tu i bata. 30A nin i sigita domolo kunna, xa buuro ta xa barako bula Ala ɲen, x'a tokutun, x'a di i ma. 31Wo to, i ɲalu yeleta, i x'a lon. Bari a sankota i ma. 32I xo i ɲoxo ɲen xo: «A be xumala n ɲen silo fe tumo men, xa Kitaabo ɲafo n ɲen, n niyo sewoninba le ken tun mu.» 33Wo no bee to, i wulita x'e koppa xa taxa Yerusaleme. I xa kiladin tan nin kilinŋo nin i kafuɲoxolu tara kamarinin non. 34Wolu tunnu b'a fola xo: «Tonɲa, Marigi kunita le! Simon x'a je!» 35Men keta silo to, i dulu woman innu xa wo ɲa fo, anin i xa Isa lon ɲa men x'a tu buuro tokutunna. 36Xa xarandinŋolu tu xumo la, Isa fan lota i temo to. A xo i ɲen xo: «Heero xa ke alu fe.» 37I silata fo i xonotolafilita. A keta i ɲen xo fure le x'é yita i la. 38Isa xo i ɲen xo: «Mun x'alu xonotolafili? Mun na hakili fulanfulanŋo be alu la? 39Alu ń bulolu nin ń sinŋolu mafele, x'a lon xo nte le mu. Alu i maxa ń na, xa ń je. Subu nin xulu nte ni ma, í xo alu ɲa be wolu la nte ma ɲa men.» 40A xa wo fo tumo men, a x'a bulolu nin a sinŋolu yita i la. 41Ɲaɲo nin dabaribanŋo x'a tu i korita lala a la. Wo to, a x'e ŋininxa xo: «Domoli be alu bulu ba?» 42I woman innu xa ɲegetelen janininŋo ta x'a di a ma. 43A x'a muta, x'a domo i ɲala. 44Wo xo, a xo i ɲen xo: «Xa nte nin alu tu i ɲoxo xan, ń tun xa xumo mennu fo alu ɲen, wolu fele: Xo waajibo le mu, men safeta nte la kuwo to Musa la sariya xono, kilalu la kitaabolu nin Jaburu xono, wolu bee xa dafa.» 45Wo to, a x'e hakilolu dayele, nin i si Kitaabo xumolu faamu. 46Isa xo a la xarandinŋolu ɲen xo: «Men be safenin, wo fele: Kirisita xa xan xa tooro, xa faxa. A tili sabananŋo, a si kuni, 47xo waajulo si ke siyalu bee ɲen ate toxo la, walasa i xa tuubi nin i la junubolu si yaafa. Wo waajulo si damuta Yerusaleme ma. 48Ate lelu mu wo kuwolu bee seedo ti. 49Ń Fa du xa men lahido ta, nte si wo lajigi alu xan. Alu xa tu Yerusaleme gallo xono, fo alu xa barako soto tumo men xa bo sanŋo to.» 50Wo xo, Isa taxata i ti gallo xo ma, fo xa si Betani senbo to. A x'a bulolu xotota xa duwa i ɲen. 51X'a tu duwala i ɲen, a nin i talata. A layeleta sanŋo to. 52Xarandinŋolu x'a batu. Wo xo, i ɲaɲaninba x'e koppa xa taxa Yerusaleme. 53I tunnu be Alabatusuba xono tuma bee, xa Ala tantu.

will be added

X\