LUKA 23

1Jama bee wulita xa taxa Isa ti Goferenere Pilate bata. 2I tunnu b'a jalagila xo: «N xa ɲin xe in tara n na siya lafilila x'e lamuruti. A tun b'a fola xo sagallo xana sara Rome mansaxe ma, xo ate le fan mu Kirisita nin mansaxe ti.» 3Wo to, Pilate x'a ŋininxa xo: «Í mu Yahudiyalu la mansaxe le ti ba?» Isa x'a jaabi xo: «Nte mu wo le ti, a be í xo í x'a fo ɲa men.» 4Wo to, Pilate xo sadaxalasibaxa kuntigolu nin jama ɲen xo: «Nte man jalagikun si je ɲin xe in na.» 5Bari i x'e sinsin a xan, x'a fo xo: «A be jama lamurutila a la xaranŋo la Yude maro bee to. A x'a damuta Galile, fo xa na a bula jan na.» 6Pilate xa wo me tumo men, a xa ŋininxalo ke fo xe in mu Galilengo le ti. 7A x'a me tumo men, xo a be bola Herode la maro xono, a x'a bula xa taxa wo bata. Wo waxato xa Herode fan tara Yerusaleme. 8Herode xa Isa je tumo men, a ɲaɲabeteta, bawo a tun x'a toxo me. A tun b'a fe x'a je, kabirin tuma jan. A tun yilo b'a ma x'a la kawakuwo do je. 9A x'a ŋininxa ku kiika la, bari Isa man jaabi si di a ma. 10Sadaxalasibaxa kuntigolu nin sariya karanmoxolu tunnu be je, xa feten, x'a jalagi xuma jaxu kiika la. 11Herode nin a la sorodasolu x'a doxoya, xa jele a ma. Wo xo, i xa mansadoroko dun a xanna, x'a lakoppa Pilate ma. 12Wo lun, Pilate nin Herode keta xanuntelu ti; i dun tunnu me ben. 13Pilate xa sadaxalasibaxa kuntigolu nin ɲamoxolu nin jama kili. 14A xo i ɲen xo: «Alu nata ɲin xe in ti nte bata, xo a be moxolu lafilila, x'e lamuruti. Ń x'a ŋininxa alu fannu ɲala, alu x'a jalagi kuwo mennu to, bari nte man jalagikun soto a la wo kuwolu to. 15Herode du man jalagikun soto a la, bawo a x'a lakoppa n ma. Ɲin xe in man fusi ke men si faxalikun bo. 16Wo to, ń s'a buwo, x'a bula.» [ 17Tanbinxansalli wo Tanbinxansalli, Pilate tun si kasolamoxo kilin bula jama ɲen.] 18Bari i bee fetenta x'a fo xo: «Ɲin xe in faxa! Í xa Barabasi bula!» 19Barabasi tun bulata kaso la murutilo do nofe gallo xono, anin moxofaxakuwo to. 20Pilate tun b'a fe xa Isa bula; wo to, a xumata jama ɲen tugun. 21Bari i fetenta xo: «A gengen yiro ma! A gengen yiro ma!» 22Pilate xo i ɲen a sinɲa sabananŋo to xo: «A xa mun kujaxu le ke? Nte man faxalikun si je a ma. Ń b'a buwola, wo xo, x'a bula.» 23Bari, i x'e balan a to, xa feten xo: «A gengen yiro ma!» I la fetenŋo xanma, sonŋo keta i la fo ma. 24I tunnu be men ŋininna, Pilate x'a latege wo xa ke. 25Men bulata kaso la murutilo nin moxofaxo to, a xa wo bula, í xo i x'a ŋinin ɲa men. A xa Isa ke i sago ti. 26I taxato Isa ti, i nin xe do benta, a toxo xo Simon. Sireningo le mu. Wo tun be bola wulo to. I xa wo muta, x'a bula Isa gengenyiro tala a nofe. 27Jamaba x'a lo a nofe. Muso dolu tunnu b'e to, wolu b'a ma x'e xaro juri, xa xasi Isa nofe. 28Isa x'é yelema wolu ma x'a fo i ɲen xo: «Yerusaleme musolu, alu xana nte xasi! Bari al'alu fannu nin alu dinŋolu xasi! 29Bawo lunŋolu si na, a si fo xo: “Muso mennu keta wulubalo ti, mennu man din soto, anin mennu man din nasuusu, heero be wolu ɲen.” 30Wo lunŋolu, moxolu s'a fo kurubalu ɲen xo: “Alu parati n xan!” x'a fo kurundinŋolu ɲen xo: “Alu n dugu!” 31Nin ɲin be kela yiri kerenŋo la, mun si ke yiri jaro la?» 32I nin kujaxukela fula du taxata, mennu nin Isa be faxala i ɲoxo la. 33I sininŋo dula do xo «Kunxuludula», i x'a nin kujaxukela fulo gengen non. Kilin b'a kininŋo, do b'a numanŋo. 34Isa xo: «Ń Fa, yaafa i ma, bawo i be men kela, i man wo lon.» I xa dokkolo ke a la faanolu xanma, x'e tala i ɲoxo te. 35Jama tun be je xa wo kuwolu mafele. Yahudiyalu la kuntigolu tunnu be jelela Isa ma, x'a fo xo: «A xa dolu lakisi! A dun me a fan kisi xo, nin a mu Kirisita le ti, Ala la Sugandininŋo.» 36Sorodaso dulu x'e sodun, xa jele a ma, xa binegaro di a ma, 37x'a fo xo: «Nin í mu Yahudiyalu la mansaxe le ti, í fan kisi xo!» 38Safelo do tun b'a kunnamato xo: «Ɲin mu Yahudiyalu la mansaxe le ti.» 39Kujaxukela mennu gengenta, wolu to kilin tun b'a nanila xo: «Ite nte Kirisita ti ba? Í fan kisi xo, xa n dulu kisi!» 40Wo kafuɲoxo x'a laxosi xo: «Í me sila Ala ɲa ba, ite men b'a la tooro ɲoxon xono? 41Ntelu kennu nin n na tooro xa xan, bawo n be n na kujaxu keninŋo lelu tooro xono; bari ate man kujaxu si ke.» 42Wo xo: «Isa, í hakilo tu nte la, nin í nata tumo men xa ke mansaxe ti.» 43Isa x'a jaabi xo: «Tonɲa la, ń b'a fola í ɲen xo, í nin nte si ke arajanna bi.» 44Taxanin tilinkunte ma, dibo dunta jamano bee xono, fo xa si wura ma. 45Mitiyo dunta tilo ma. Faanuba men tun be Alabatusuba xonototegenin, wo farata fula ti a temo to. 46Isa fetenbeteta xo: «Ń Fa, ń be ń niyo bulala í bulu.» X'a tu wo fola, a sata. 47Sorodasi jalatigiba xa wo kuwo je tumo men, a xa barako bula Ala ɲen. A xo: «Tonɲa la, ɲin xe in tun mu moxo tilinninŋo le ti!» 48Jama men bee nata, wolu xa wo kuwo mafele. I xa wo kuwolu je tumo men, i x'e koppa, xa ke a ma x'e xarolu malippa jusuxaso bulu. 49Isa xanubaxolu bee, anin muso mennu b'a nofe kabirin Galile, wolu x'e lo dulajan, xa wo kuwolu mafele. 50Xe do tun be Yahudiyalu la Kiititegekafo to, a toxo xo Yusufu. A bota Yahudiyalu la gallo do to xo Arimate. Moxo ɲuma nin moxo tilinninŋo le tun mu. A tun be Ala la Mansaya nalo laxononin. A tun man son a toɲoxolu la xumolu nin i la kewalolu ma. 52Wo taxata Pilate ma, xo a xa Isa fure di a ma. 53Wo xo, a x'a fure lajigi gengenyiro xan, x'a kasanke, xa taxa a lasi xaburo xono. Wo xaburo tun be jaganin kuro to. Moxo si tun man nasi non folo. 54Tofoɲolunŋo tobenlunŋo le tun mu, tofoɲolunŋo tun be ŋinin xa damuta. 55Muso mennu be Isa nofe kabirin Galile maro la, wolu x'a lo Yusufu nofe, xa xaburo mafele, anin Isa lasiɲa. 56Wo xo, i x'e koppa i bata, xa sumadiyalanŋolu nin tulu sumadimanŋolu toben. Tofoɲolunŋo, i x'e tofoɲo í xo sariya x'a fo ɲa men.

will be added

X\