LUKA 22

1Buurufuunulantan sallo, nin wo mu Tanbinxansallo ti, wo tun sutiyata. 2Sadaxalasibaxa kuntigolu nin sariya karanmoxolu tunnu be feere ŋininna xa Isa faxa. Bari i tunnu be silanin jama ɲa. 3Wo tumo la, Sentane dunta Yudasi to, men kilita xo Isikariyoti, xarandin tan nin fulo to do le mu. 4Yudasi taxata xuma sadaxalasibaxa kuntigolu nin Alabatusuba lakorosibaxolu ɲen, a si Isa dun i bulu ɲa men ma. 5I ɲaɲata wo la, i benta a to xo i si xaaliso di a ma. 6Yudasi sonta wo ma, a x'a damuta xa waxati ɲuma ŋinin a si Isa dun i bulu ɲa men, x'a tara jama man bo a xalama. 7Buurufuunulantan sallo lunŋo sita. Tanbinxansallo sadaxa saaxandinŋo xa xan xa faxa wo lunŋo. 8Isa xa Piyere nin Yaya ki x'a fo i ɲen xo: «Alu taxa Tanbinxansallo domolo toben n ɲen.» 9I xo: «Í b'a fe n xa taxa a toben min?» 10A xo i ɲen xo: «A fele, alu dunto gallo xono, alu nin xe do si ben, jidaxo be siginin a kun. Alu s'a lo a nofe. A je dun luwo men ma, alu xa dun non. 11Alu s'a fo wo lutigo ɲen xo: “Karanmoxo xo, xo a nin a la xarandinŋolu be Tanbinxansallo domolo kela bunŋo men xono, wo be min?” 12Wo xe si bunba do yita alu la sankansuwo sanŋo to, miranŋolu b'a xono. Alu si domolo toben non.» 13I taxata, x'a bee tara í xo a x'a fo i ɲen ɲa men. I xa Tanbinxansallo domolo toben je. 14Waxato sininma, Isa nin a la kiladinŋolu x'e sigi domolo kunna. 15A xo i ɲen xo: «A diyata ń ɲen haali, ń nin alu xa ɲin Tanbinxansalli in domolo ke, jannin ń be toorola. 16Bawo ń s'a fo alu ɲen xo, ń me a domo tugun fo a kuwo xa dafa lunŋo men Ala la Mansaya xono.» 17Wo to, a xa minfen jipoto ta, xa barako bula Ala ɲen, a xo: «Alu ɲin minfen poti in muta, alu x'a tala i ɲoxo te; 18bawo ń b'a fola alu ɲen xo, kabirin saasa, ń me resenŋo jiyo min tugun, fo Ala la Mansaya xa na lunŋo men.» 19Wo xo, a xa buuro ta, xa barako bula Ala ɲen, x'a tokutun, x'a di xarandinŋolu ma, x'a fo i ɲen xo: «Ɲin mu ń balo le ti, men dita alu xanma. Alu ɲin ke x'alu hakilo jigi nte la.» 20Wo ɲa ma, i sotoninma domolo la, a xa minfen jipoto du ta, x'a di i ma, x'a fo xo: «Ɲin minfen jipoti in mu Ala la Kafuxan Kuto minfen jipoto le ti, men tata ń jelo to, xa bon alu ɲen. 21Bari alu a mafele: Men be ń dunna bulo to, wo be jan, a nin ń be domolo la! 22Sikka nte a to, Moxo Dinxe si sa í xo Ala x'a latege ɲa men; bari moxo men be nala a dunna bulo to, bone be wo tigo ɲen!» 23Wo keninma, xarandinŋolu keta a ma x'e ɲoxo toŋininxa, xo jontigi be nala wo kuwo kela. 24xarandinŋolu wulita ɲoxomasooso la, xo jon si jaate i bee to moxoba ti. 25Isa xo i ɲen xo: «Mansaxelu be i la jamanolu marala fango la. Fankamalu b'a fe jamanudinŋolu x'e kili xo ɲumakelalu. 26Bari a man xan xa ke ten atelu bulu. Alu to moxoba xa ke í xo alu bee doxo; alu to ɲamoxo xa ke í xo alu la baaradinŋo. 27Jon xa bun? Men be siginin domolo la ba, walla men be baaro la? Men be siginin domolo la, wo le man bun? Bari wo bee nin a ta, nte be le alu to í xo baaradinŋo. 28Alu nin nte tuta ń na xoleyalu xono; 29Ń Fa xa Mansaya di ń ma ɲa men, ń du be Mansaya dila alu ma wo ɲa in. 30Alu nin ń si domolo nin minno ke ń na Mansaya xono, alu si sigi mansasigilanŋolu xan, xa kiito tege Banisirayila bunda tan nin fulo xan.» 31Isa xo: «Simon, Simon! Sentane x'a ŋinin x'a be alu surundula í xo ɲo; 32bari ń xa Ala matara í ɲen walasa í la lannaya xana tiɲa. Nin í x'é koppa nte ma tumo men, í badinŋolu jusudun.» 33Piyere xo a ɲen xo: «Marigi, nte be tobennin haali ń nin í xa dun kaso la anin xa sa.» 34Bari Isa xo: «Piyere, ń b'a fola í ɲen xo, jannin duntunŋo xa kokori, í si í xaro í xo sinɲa saba, xo í man nte lon.» 35Wo xo, Isa xo i ɲen xo: «Ń x'alu bula xa taxa tumo men, x'a tara alu nin silafanda nin fudi nin samata man taxa, mun dasata alu la?» I xo: «Fusi man dasa n na.» 36Wo to, a xo i ɲen xo: «Bari saasa silafanda be men kun, wo x'a ta, fudi be men kun, wo x'a ta. Fan nte men kun, wo x'a la dorokeba san xa fanŋo do san. 37Bawo ń b'a fola alu ɲen xo, waajibo le mu Kitaabo ɲin xuma in xa dafa nte la kuwo to xo: “A jaateta kujaxukelalu fe.” Men safeta ń na kuwo to, wo be kela le.» 38xarandinŋolu xo: «Marigi, fan fula fele.» A x'e jaabi xo: «A waseta ten.» 39Isa bota, xa taxa Oliwe kuro to, í xo a dalita a kela ɲa men ma. A la xarandinŋolu x'a lo a nofe. 40I sininma je, a xo xarandinŋolu ɲen xo: «Alu Ala matara, walasa alu xana xotobo.» 41Wo xo, a x'é soobo i la kuru fayininŋo dandula ɲoxon na, x'é ɲongi, xa Ala matara ten xo: 42«Ń Fa, nin a xa di í ɲen, ɲin tooro jitafe in soobo nte la. Bari nte sago xana ke, ite ta le xa ke.» [ 43Wo to, melekiyo do x'é yita a la, xa bo sanŋo to, xa barako di a ma. 44Isa niyo tooroninba xa do kafu Alamatara ma. A tarajiyo keta í xo jelo be tondila dugo ma.] 45A wulininma xa bo wo Alamatara la, a nata a la xarandinŋolu bata. A x'e tara sinnoxonin jusuxaso bulu. 46A xo i ɲen xo: «Mun na alu be sinnoxola? Alu wuli xa Ala matara, walasa alu xana xotobo.» 47X'a tu xumo la, jama nata. Isa la xarandinŋo do, xo Yudasi, wo tun be wo jama ɲa. A x'é sodun Isa la, x'a baataya xonton. 48Isa xo a ɲen xo: «Yudasi, í be Moxo Dinxe dunna bulo to baataya xontonno le la ba?» 49Isa kafuɲoxolu x'a je tumo men, men be nala kela, i xo: «Marigi, n xa fanŋolu ta i xanma ba?» 50I to do xa sadaxalasibaxa kuntigiba la jonxe kininbulu tulo carun. 51Wo to, Isa xa xumo ta, a xo: «Alu a tu ten.» A x'é maxa wo xe tulo la, x'a kendeya. 52Wo xo, mennu nata Isa muta, nin wo mu sadaxalasibaxa kuntigolu nin Alabatusuba garadi kuntigolu anin moxobalu ti, a xo wolu ɲen xo: «Alu nin fanŋolu nin gumalu nata nte xanma, í xo nin nte mu boyinxannila le ti. 53Ń tun nin alu be Alabatusuba xono lun wo lun, alu man nte muta de. Bari ɲin waxati in mu alu ta le ti, anin dibo fango ta.» 54I xa Isa muta, xa taxa a ti sadaxalasibaxa kuntigiba la luwo ma. Piyere x'é tu dulajan, x'a lo i nofe. 55I xa ta lamana lukeno temo to, xa sigi a la. Piyere x'é sigi i bata. 56Baaradinmuso do x'a je siginin tasinŋo la. Wo x'a ɲa lo a to, a xo: «Ɲin xe in du tun nin a mu le!» 57Bari Piyere x'é xaro a la, a xo: «Muso, nte man ɲin xe in lon.» 58Wo xo dondin, do xote x'a je. Wo xo a ɲen xo: «Í du mu i do le ti!» Piyere xa wo jaabi xo: «Nte nte i do ti de!» 59Wo xo, leere kilin ɲoxon, do xote x'a fo x'a xoleya xo: «Sikka nt'a to, ɲin xe in du tun nin a mu le, bawo Galilengo le mu.» 60Piyere x'a jaabi xo: «Nte man a lon, ite b'a fe xa men fo.» X'a tu xumo la, wo no bee to, duntunŋo do kokorita. 61Marigi x'é xofele, xa Piyere mafele. Marigi tun xa xumo men fo a ɲen, a hakilo jigita wo kun xo: «Jannin duntunŋo xa kokori bi, í s'í xaro nte la í xo sinɲa saba.» 62Piyere bota, xa taxa xasi bete. 63Isa tun be xe mennu bulu, wolu jeleta a ma, x'a buwo. 64I x'a ɲa siti, x'a ŋininxa xo: «Kilaya ke! Jon x'é lippa?» 65I xa nanili kiika xotelu fo a ɲen. 66Saxo yeleninma, jamano moxobalu nin sadaxalasibaxa kuntigolu anin sariya karanmoxolu kamarita, xa na Isa ti i la Kiititegekafo ɲa xoto. 67I x'a ŋininxa xo: «Nin í mu Kirisita le ti, wo fo n ɲen.» Isa x'e jaabi xo: «Nin ń x'a fo alu ɲen, alu me la a la. 68Nin ń x'alu ŋininxa du, alu me ń jaabi. 69Bari kabirin saasa, Moxo Dinxe si sigi Sinŋobeetigi Ala kininŋo xoto.» 70I bee xo: «Wo to, í mu Ala Dinxe le ti ba?» A x'e jaabi xo: «Alu fannu x'a fo, nte le mu.» 71I woman innu xo: «N maakuwo be seedeyali joman na tugun, bawo n fannu x'a me a da la?»

will be added

X\