LUKA 20

1Lun do, Isa tun be moxolu xaranna x'e waaju xibaru Dimanŋo la Alabatusuba xono. Sadaxalasibaxa kuntigolu nin sariya karanmoxolu nin moxobalu nata. 2I x'a ŋininxa xo: «Fanga joman x'é bula ɲin ku innu kela? Jon x'é yanmaru?» 3Isa x'e jaabi xo: «Nte du be nala alu ŋininxala ku kilin na. Alu a fo ń ɲen, 4men xa Yaya bula batiselo la, Ala ba, fo moxolu?» 5I xo i ɲoxo ɲen xo: «Nin n xo: “Ala le x'a ki”, a s'a fo xo: “Mun dun na alu man la a la?” 6Nin n dunnu xo: “Moxo lelu x'a ki”, jama bee si n bun kurolu la xa n faxa, katugala moxolu bee be Yaya mutanin kila do le ti.» 7Wo to, i x'a jaabi xo: «Ntelu man a lon, men x'a ki x'a xa na moxolu batise.» 8Isa xo: «Awa, men xa fango di nte ma xa ɲin ku innu ke, nte du nte wo fola alu ɲen.» 9Wo tumo, Isa xa ɲin tali in la moxolu ɲen, a xo: «Xe do le, a xa resenfuuto bo, x'a xarifa senekela dolu ma, xa taxama waxati jan xono. 10Resenmo tumo sita tumo men, a x'a la jonŋo do ki a la resenfuuto senebaxolu ma, xo i x'a la resenmo di a ma. Bari resenfuuto senebaxolu x'a la jonŋo buwo, x'a bulutoxulunŋo lakoppa. 11Fuututigo x'a la jonŋo do xote ki. I xa wo du buwo, x'a nani, x'a bulutoxulunŋo lakoppa. 12A xa jonxe sabananŋo ki. I xa wo du joogi, x'a bula banto to. 13Wo keninma, resenfuututigo xo: “Ń si mun ke sa? Ń si ń dinxe baato ki i ma; a do to i si wo bunɲa.” 14Bari kabirin resenfuuto senebaxolu ɲa lata wo xan, i xo i ɲoxo ɲen xo: “A ketabaxo fele. Alu na, alan x'a faxa. A ke si ke alan ta ti.” 15I x'a fili resenfuuto xo ma, x'a faxa.» Isa xo i ɲen xo: «Awa, resenfuututigo si na mun ke i la? 16A si na xa wo resenfuuto senebaxolu faxa, x'a la resenfuuto xarifa moxo xotelu ma.» Moxolu xa wo me tumo men, i xo: «Ala mu n kisila wo ma!» 17Bari Isa x'e mafele, a xo: «Ɲin xuma in xoto mu mun ti xo: “Kurubunlolalu x'e ban kuro men to, wo keta bunŋo jusigikuro ti”? 18Moxo wo moxo je boyi wo kuro to, wo tigo si tote. A je boyi men to, a si wo tigo nooni.» 19Sariya karanmoxolu nin sadaxalasibaxa kuntigolu tunnu be feere ŋininna xa Isa muta wo waxato fan, bawo i x'a lon x'a faamu, xo a la tali in be ite lelu xan. Bari i silata jama ɲa. 20Wo tumo la, i x'a damuta xa Isa lakorosi. I xa naafigo dolu ki, xo i x'e fannu ke moxo tilinninŋolu ti, nin i si Isa muta a fan na xumolu xono, walasa i x'a dun fango nin goferenero bulu. 21Wo moxolu x'a ŋininxa xo: «Karanmoxo, n x'a lon xo í be xumala xa moxolu laxaran kuwo mennu ma, wolu be tilinnin. Í nte moxo bola moxo to, bari í si moxolu laxaran Alasilo ma x'a xoyiya. 22A be dagenin ba n xa sagallo sara Rome mansaxe ma, walla a nte dagenin?» 23Bari Isa x'e la korojugaya lon. A xo i ɲen xo: 24«Alu deɲe xaalisi ganan kilin yita ń na. Jon kunxulo nin jon toxo be a xan?» I xo: «Rome mansaxe le mu.» 25Wo tumo la, a xo i ɲen xo: «Awa, mansaxe ta mu men ti, alu wo di a ma, xa Ala ta di Ala ma.» 26I man sin x'a muta a dalaxumolu ma jama ɲala. A la jaabo x'e dabaro ban. I x'e de. 27Sadusen diino moxo dolu nata Isa bata. Wo lelu xo, xo furelu nte kunila. I x'a ŋininxa ten xo: 28«Karanmoxo, kila Musa x'a fo xo nin xe do sata, x'a tara a musu man din soto, a badinxe xa xan xa wo muso ta, xa dinŋo do soto a ma, a badinxe saninŋo ɲen. 29Awa, badinxe woorowula tun be je. Folo xa muso ta, a sata, a man din wulu a ɲen. 30Fulananŋo x'a ta, 31wo xo sabananŋo. I moxo woorowulo bee x'a ta, xa sa, a man wulu i si ɲen. 32Wo xo, muso du sata. 33Furekuniyo xo, musu in be kela i to jon kilin musu ti? Bawo a keta i woorowulo bee musu ti.» 34Isa xo i ɲen xo: «Ɲin duniya in to, xebalu si muso futu, musolu si sigi xe kun. 35Bari xelu nin musolu mennu xa xan xa kuni duniya kuto xanma, wolu nte futu kela sinin. 36I me sa tugun, bari i si ke í xo melekiyolu be ɲa men. I mu Ala dinŋolu ti, bawo i kunita xa bo furelu to. 37Musa x'a yita xo sikka nte furekuniyo to. Dula men be xumala fitaare mananinŋo xan, Musa xa Marigi kili non xo Burehima la Ala, Nsiyaxa la Ala, anin Yaxuba la Ala. 38Ala nte furelu la Ala ti, nilamalu la Ala le mu, bawo wolu bee nilama le mu Ala bulu.» 39Sariya karanmoxo dolu x'a jaabi xo: «Karanmoxo, í la xumolu benta!» 40Wo xo, i man fatiya x'a ŋininxa fusi la tugun. 41Isa x'a fo i ɲen xo: «Mun na moxolu b'a fola xo Kirisita mu Dawuda Mamarinŋo ti? 42Bawo Dawuda fan x'a fo Jaburu kitaabo xono xo: “Marigi x'a fo nte Marigi ɲen xo: Í sigi ń kininŋo xoto, 43fo nte xa í jaxolu ke í sinxotofenŋo ti.” 44Wo ɲa ma, Dawuda be a kilila xo Marigi: Wo to, a dun si ke a mamarinŋo ti ɲa di?» 45Isa x'a fo a la xarandinŋolu ɲen a lamebaxolu bee ɲala xo: 46«Alu i korosi sariya karanmoxolu ma, a xa di wo mennu ɲen x'e yaala dorokebalu xono. Moxolu x'e xonton beralu to, wo xa di i ɲen. Alabatusuwo xono, ɲafesigilanŋolu xa di i ɲen. Domolibadulalu, ɲafesigidulalu xa di i ɲen. 47I be musujaxelu bulufenŋolu bee mutala i la, wo xo, xa taxa Alamatara janŋolu ke, x'e fannu yita. Wo le x'a tu, i la kiito si xoleya bete.»

will be added

X\