LUKA 2

1Wo waxato, Rome mansaxe Ogusiti x'a latege, xo xa duguxulo moxo bee toxo safe. 2Wo toxosafe folo xa Kirinisi tara goferenereya la Siri kunna. 3Moxo bee taxata i safe i wulugallo to. 4Yusufu du bota Galile gallo do to, xo Nasareti, xa taxa Yude maro to, xa taxa Dawuda la gallo to, Betileheme, bawo Dawuda bonsonŋo nin a la xabiilo moxo do le mu. 5A nin a mamutamuso Mariyama taxata i safe je, x'a tara wo xonoma. 6X'e tu je, Mariyama wulutumo nata si. 7A wuluta a dinxe folo la. A x'a lala faano to, x'a bula marafen daŋininxulunŋo xono, katugala i man dula soto luntanjigidula. 8Saaxanegaanilalu tunnu be non namininŋo to. Wo tunnu be sila i ɲala wulo xono, x'e la marafenŋolu korosi. 9Marigi la melekiyo do nata i ma. Marigi nooro keneya x'e laminin. I silata fo xa danmatanbi. 10Melekiyo xo i ɲen xo: «Alu xana sila, katugala ń nata xibaru dimanŋo le fo alu ɲen. Wo xibaro si moxolu bee nitodiya. 11Kirisita wuluta alu ɲen bi, mansaxe Dawuda la gallo to. Ate le mu Kirisita nin Marigi ti. 12Ɲin si ke alu ɲen taagumanseedo ti: Alu si deenano murugumuruguninŋo tara lanin faano to, marafen daŋininxulunŋo xono.» 13Wo no bee to, melekiyolu kiika kafuta wo melekiyo ma, xa Ala tantu. 14I xo: «Tanto be Ala ɲen, men be sanjanba to. Heero xa ke duguxulo xan, a la moxo sugandininŋolu ɲen.» 15Melekiyolu taxaninma sanŋo to, saaxanegaanilalu xo i ɲoxo ɲen xo: «Alan xa taxa fo Betileheme, x'a je men keta, anin Marigi xa men yita n na.» 16I x'e tariya xa taxa; xa Mariyama nin Yusufu je, xa deenano je lanin marafen daŋininxulunŋo xono. 17I x'a je tumo men, men fota i ɲen deenano la kuwo to, i dunta wo ɲa to, x'a fo. 18Moxo fen fen xa negaanilalu la xumo lame, wolu bee dabaro banta. 19Mariyama du xa wo kuwolu bee mara a hakilo la, x'é miiri i xoto ma. 20Wo xo, negaanilalu x'e koppa. I taxato tun be Ala bunɲala x'a tantu, katugala i xa men me, i xa wo je, í xo a fota i ɲen ɲa men. 21Dindinŋo tun xa xan xa ɲaxa lunŋo men, nin wo mu a wuluwo tili sago lunŋo ti, a toxolata xo Isa. Melekiyo tun xa toxo men fo jannin a na x'a xono ta, a toxolata wo le la. 22Mariyama senuyalilunŋo sininma í xo Musa la sariya x'a fo ɲa men, i nin dinŋo taxata Yerusaleme xa taxa a di Marigi ma, 23bawo a be safenin Marigi la sariya xono xo: «Dinxe fololu bee xa ke Marigi ta ti.» 24Marigi la sariya xa sadaxo men fo xo: «Tubandin fula walla jenetubandin fula», i xa wo sadaxo bo. 25Xe do tun be Yerusaleme, a toxo xo Simeyon. Wo xe tun mu moxo tilinninŋo nin Alaɲasilanɲabaxo le ti. A tun be Banisirayila la kisilo laxononin. Ni Senunŋo tun nin a be i ɲoxo fe. 26Ni Senunŋo tun x'a yita a la xo a me sa, x'a tara a man Marigi la Kirisita je. 27Ni Senunŋo taxata a ti Alabatusuba xono. Isa wulubaxolu nata a ti tumo men, walasa xa sariya la foninŋo dafa, 28Simeyon xa dindinŋo ta a bulo to, xa Ala tantu xo: 29«Marigi, í x'é la lahido latimme: Saasa í s'í la jonxe bula a xa sa heero to. 30Bawo ń fan ɲa xa í la kisilo je, 31í xa wo kisilo men toben siyalu bee ɲen. 32Í x'a ke keneya ti, men si í yita siyalu la, xa nooro la Banisirayila, í la moxolu xan.» 33Isa fa nin a na dabaro bee banta Simeyon na xumolu la. 34Simeyon duwata i ɲen, x'a fo Isa na Mariyama ɲen xo: «Ɲin din in si ke moxo kiika laboyi sabaabo nin i lawuli sabaabo ti Banisirayila xono. A si ke Ala la taagumanseedo ti, soosolo si ke men na kuwo to. 35Wo si moxo kiika la miiriyalu la keno xan. Ite ken, diminŋo do s'í soxo í jusukunŋo to í xo tanbo.» 36Kila musuma do tun be je, a toxo xo Ane. Fanuyeli dinmuso do le mu. A bota Asere xabiilo to. A tun xotobeteta. A xarafa fututa xe men ma, a xa sanji woorowula ke wo kun, wo xo, wo xe sata. 37Wo xo, a tuta futubaliya la. A siyo be tan sagi sanji nin sanji naani la. A man Alabatusuba bula. A tun be baaro kela Ala ɲen sunŋo nin mataralo la, su nin tili. 38A du nata wo waxato fan; a tun be Ala tantula, moxo fen wo fen tun be Yerusaleme kunbolo laxononin, a xa Isa la kuwo fo wolu bee ɲen. 39Isa wulubaxolu xa Marigi la sariya bee dafa tumo men, i nin a x'e koppa Galile maro ma, xa na i la gallo to, nin wo mu Nasareti ti. 40Dindinŋo tun be bunɲaxan xa barako soto. Hakilitigiyaba tun b'a fe, Ala la neemo tun b'a xan. 41San wo san, Isa wulubaxolu tunnu si taxa Tanbinxansallo ke Yerusaleme. 42Isa xa san tan nin fula soto sanŋo men, i taxata wo sallo to, x'a la laado xan. 43Sallo tilolu tanbininŋo xo, i x'e koppa. Isa dindinŋo tuta Yerusaleme, bari a wulubaxolu tunnu nte wo xalama. 44I tunnu ɲen xo a be i taxamaɲoxolu to. I xa tili kilin ke Isa ŋininna i badinŋolu nin i lonɲoxolu to. 45I man a je tumo men, i x'e koppa Yerusaleme ma, xa taxa a ŋinin. 46Tili saba tanbo xo, i x'a tara Alabatusuba xono, siginin sariya karanmoxolu to; a be wolu lamela, x'e ŋininxa. 47Moxo fen fen x'a lame, wolu bee dabaro banta a la lonŋo nin a la jaabolu ma. 48A wulubaxolu x'a je tumo men, i dabaro banta. A na xo a ɲen xo: «Ń din, mun na í xa ɲin ke ntelu la? A fele, nte nin í fa xonotofilininŋo b'é ŋininna.» 49A x'e jaabi xo: «Mun na alu be ń ŋininna? Alu man a lon ba, xo ń xa xan xa tara ń Fa la luwo xono?» 50Bari wolu man a la wo xumo faamu. 51Wo xo, a nin i taxata Nasareti. A tun be a wulubaxolu bunɲala. A na ken tun be ɲin ku innu bee marala a xono. 52Isa tun be bunɲaxan, do tun be kafula a la lonŋo ma. A la kuwo tun xa di Ala ɲen, a xa di moxo dulu bee ɲen.

will be added

X\