LUKA 19

1Isa dunta Yeriko, xa gallo tofara. 2Xe do bota, a toxo Sake; sagallemutalalu la kuntigo do le mu, naafulubatigo le du mu. 3A tun b'a fe xa Isa je x'a lon, bari a tun me a je no jama kun, bawo a xa sutu. 4A x'é bori xa taxa ɲa, xa yele yirijuwo do to, nin a s'a je, bawo Isa tun xa xan xa tanbi non na. 5Isa sita a ma tumo men, a x'a ɲa xotota, a xo a ɲen xo: «Sake, í tariya xa jigi, bawo ń xa xan xa jigi í bata bi.» 6Sake x'é tariya xa jigi. A ɲaɲaninŋo xa Isa jigiya a bata. 7Moxo fen fen xa wo je, i ŋuunuŋuunuta x'a fo xo: «A taxata jigi Alaɲasilanɲabalo bata.» 8Sake wulita x'é lo, a xo Marigi ɲen xo: «Marigi, ń xa ń na naafulo tala, x'a tala di segebaxantunŋolu ma. Nin ń xa men na fen nanbara, ń si wo ɲoxon naani saagi wo tigo ma.» 9Isa xo a ɲen xo: «Kisilo dunta ɲin lu in xono bi, bawo ite du mu Burehima bonsonŋo do le ti. 10Moxo Dinxe nata le, men sankota, xa wo ŋinin, x'a kisi.» 11Xa moxolu tu a lamela, Isa xa ɲin tali in la i ɲen. A tun sutiyata Yerusaleme la, a tun be moxolu ɲen xo Ala la Mansaya je na le, wo no bee to. 12A xa men fo, wo fele: «Mansaxedinŋo do taxata jamanujanŋo do xan, x'a be taxala mansaya ŋininna a fan ɲen, wo xo, x'é koppa. 13A taxato x'a la jonxe tanŋo kili, xa xaalisixoyi ganan keme di i kilin wo kilin ma, x'a fo i ɲen xo: “Alu jaago ke ɲin xaalisi in to, jannin ń be ń koppala.” 14Bari a la jamano moxo tunnu nte a fe; i xa kilalu bula a xofe x'a fo xo: “N nte a fe ɲin xe in xa sigi n kunna.” 15A xa mansaya soto tumo men, a x'é koppa. A tun xa xaaliso di jonŋo mennu ma, a x'e kili, walasa i xa tono men soto jaago to, a xa wo lon. 16Folo nata x'a fo a ɲen xo: “Marigi, nte xa í la xaaliso ɲoxon tan soto, x'a kafu í ta ma.” 17Mansaxe xo a ɲen xo: “Wo benta, í keta jon beto ti. Í keta lannayamoxo ti kundinŋolu to. Wo xanma, ń x'é lasigi galluba tan kunna.” 18Jon fulananŋo nata x'a fo a ɲen xo: “Marigi, í xa men di ń ma, ń x'a ɲoxon luulu soto tono ti.” 19Mansaxe xo wo du ɲen xo: “Ń x'é lasigi galluba luulu kunna.” 20Wo xo, jonŋo do xote nata x'a fo xo: “Marigi, í la xaaliso fele; nte xa faano murugumurugu a ma, x'a lamara. 21Nte silata í ɲa, bawo í la kuwo xa xole. Í man fenŋo men bula je, í be wo le tala, í man fenŋo men lan, í be wo le tegela.” 22Mansaxe xo a ɲen xo: “Jon jaxu in! Ń b'é la kiito tegela x'a la í fan na xumo xan. Í tun x'a lon xo ń na kuwo xa xole; xo ń man men bula je, ń si wo ta, ń man men lan, ń si wo tege. 23Mun na í man ń na xaaliso bula bangi la, walasa ń koppaninŋo xa ń na xaaliso nin a tono soto?” 24Mennu be lonin je, mansaxe xo wolu ɲen xo: “Alu a la xaaliso muta a la. Tanŋo be men bulu, alu a di wo ma.” 25I xo a ɲen xo: “Marigi, tan be wo bulu xa ban!” 26A x'e jaabi xo: “Nte b'a fola alu ɲen xo, fen be men bulu, do si di wo ma; bari fen nte men bulu, haali dondinŋo men b'a bulu, wo si muta a la. 27Nte jaxolu kennu, mennu tunnu nte a fe nte xa sigi i kunna, alu na i ti jan, x'e faxa ń ɲala.” » 28Isa sotoninma wo xumolu la, a bulata jama ɲa xa taxa Yerusaleme. 29A sutiyata Betefaje nin Betani la tumo men, fo xa si kuro do senbo to, xo Oliwe kuro, a x'a la xarandin fula ki. 30A xo i ɲen xo: «Alu taxa gallo to, men be alu ɲafe. Nin alu sita doron, alu si falindinŋo do tara sitinin je, moxo bada man yele men xan folo. Alu si a firin xa na a ti. 31Nin do x'alu ŋininxa xo: “Mun na alu b'a firinna?” Alu s'a fo a ɲen xo: “Marigi le haajo b'a ma.” » 32Kiladinŋolu taxaninŋo, Isa x'a fo i ɲen ɲa men, i x'a tara wo ɲa ma. 33X'e tu falindinŋo firinna, falitigolu xo i ɲen xo: «Mun na alu be ɲin falindin in firinna?» 34I xo: «Marigi le haajo b'a ma.» 35Wo xo, i taxata falindinŋo ti Isa bata. I x'e la faanolu feene a xan, xa Isa layele a xan. 36A taxato, moxolu x'e la faanolu feene silo to. 37Isa sutiyaninŋo Yerusaleme la, xa si Oliwe kuro jigindanŋo dula, a la xarandinŋolu jama bee ɲaxalininŋo boyita Ala tantula xanba to, i xa kawakuwo mennu bee je xanma. 38I xo: «Mansaxe men nato fele Marigi toxo la, duwawo be wo fe! Heero xa ke sanŋo to, tanto xa ke Ala ɲen sanjanbalu to!» 39Farisiya do tunnu be jama xono, wolu xo Isa ɲen xo: «Karanmoxo, xuma í la xarandinŋolu ɲen i x'e de.» 40A x'e jaabi xo: «Nte b'a fola alu ɲen xo, nin ɲinnu x'e de, kurolu si feten!» 41Isa sutiyaninŋo Yerusaleme la fo x'a gallo je, a xasita a la kuwo la. A xo: 42«Bi lun in, nin í tun x'a lon men si heero di í ma! Bari saasa, wo be dugunin í ma. 43Lunŋolu si na í ma, í jaxolu si sigi í da la, x'é laminin tato la, xa dinxolu jaga, x'é xaranda í boxo bee la. 44I s'í te, x'é xono moxolu halagi. I me haali kuru tu kuru xan, bawo Ala nata í deemalo xanma tumo men, í man wo tumo faamu.» 45Isa dunta Alabatusuba xono, x'a damuta xa je fiirikelalu xoyi. 46A xo i ɲen xo: «A be safenin Kitaabo to xo: “Nte la bunŋo si ke Alamatarabunŋo ti.” Bari atelu kennu x'a ke boyinxannilalu dugudula ti.» 47Isa tun be moxolu laxaranna Alabatusuba xono lun wo lun. Sadaxalasibaxa kuntigolu nin sariya karanmoxolu nin dugo moxobalu tunnu be ɲa ŋininna, i s'a faxa ɲa men. 48Bari i tunnu man a lon i s'a ke ɲa men, bawo a la xumo xa jama bee kunŋo muta.

will be added

X\